33 週: 母嬰健康院覆診

 BB size正常，但媽咪少少過重。因為媽咪日日食雪糕、芝麻糊、渣渣、杏仁糊、龍眼, etc.

護士話:"BB半個頭，入咗盆骨喇。(順產機會大咗?)

以後要每2星期覆診。(我補習時間又要改?)

之後唔駛見姑娘，直接見醫生。(有咩唔同?)

記住流啡、見紅、穿水，要即刻去醫院，入產房。(咁快?)"

前幾日，一哥洗咗成機BB衫。我未見過咁細件嘅衫仔，好得意。一齊晾衫，一齊嘻嘻哈哈。

去完BB展，一哥買咗$250/ 5個奶樽、$99/ 1包初生紙尿片+1盒濕紙巾+唔知乜。

我和妹妹攞咗一堆紗巾、奶粉、濕紙巾、包被、沖涼液、消毒液。

仲諗緊紮唔紮肚。$7000好似好貴。做運動唔知有冇同樣效果。時間，我大把。錢，我總係要嚟投資。嚟緊想買間細舖，計劃緊。

呢幾日又游返水，行快咗好多，腳少咗水腫。泳池啲人不時話: "嘩!個肚咁大，都游水呀～"

"媽咪小心啲呀，泳池跣呀～"

我游得快過好多人喎，游完又冇咁腰痠背痛，手腫腳腫，手指小腿又少咗抽筋。

唔好理人哋喇。小心啲行就好，唔好跌倒。

話時話，濼言好似好驚浪花。見到大浪，我好興奮衝埋去，佢就嚇到企直咗。😂😂😂

今晚瞓瞓吓，個右胸硬晒，石頭咁，好唔舒服。 

碌去左邊，濼言又開摩打腳。

仰臥啦～濼言又彈彈跳跳。

搞到我醒晒!大佬，03:45,仲好早喔～

拿來龍眼、Movenpick, 杏仁糊、鮮奶，想求下半晚安睡。但都冇用。

好眼瞓~~~~~

媽媽谷嘅人，話恥骨痛、手指腫到扭唔到毛巾、腳水腫到行唔到。

我好彩暫時冇。

佢哋好多恨放產假，我就只想上多啲堂，開多啲時段，幫多啲學生。

都擔心上課期間，濼言突然出世。不過聽講穿水、陣痛都10幾個鐘。咁上堂忍一忍，分散吓注意力，可能冇咁痛。落堂後，搭的士回家沖涼洗頭，換衫搭小巴去醫院，就唔駛聽到周圍嘅孕婦痛苦呻吟。我耳朵靈敏，細細聲都聽到好清楚。如果好多人慘叫，我諗我會好驚。搭小巴時，要記得打畀一哥，有佢陪產，我應該冇咁驚。

最近開始又乜都驚，乜都擔心。

情緒易激動。妹妹屋企冇雪糕，我都會喊。神經病!

船到橋頭自然直。驚嚟冇用。練吓琴，彈吓巴哈寫嘅曲，平伏吓心情啦～