產前/產後抑鬱?

最近真係好易喊，睇睇吓新聞就喊，眼淚仲收唔到掣咁，一喊就不停喊。

今朝大埔廣福道嘅車禍，行人綠燈過馬路，的士撞埋嚟，有人被捲入車底，有人死咗，有個37歲的孕婦，陀咗5個月BB, 附近有個4歲小孩，唔知係咪佢大仔，仲有佢老公。
5人受傷。

我一路睇，一路喊。
37歲，盆骨骨折，BB點算? 媽咪之後還有機會懷孕嗎?
4歲小孩，是他們的長子嗎? 被車撞，咁細個，點算?
丈夫一齊受傷，全家的經濟支柱喎，咁呢家人，之後生活點算?

綠燈過馬路，都會被車撞，意外真係嚟得好突然。冇得避。

好多途人見狀，仗義相助，一齊抬起架的士。
仲有人借出雨傘，為傷者遮太陽。

好感動。
香港，還是人間有情吧?

但最近成日喊，一哥好擔心，我自己更擔心。
但我又控制唔到。
我唔知自己點解控制唔到。

一哥放早，打嚟我剛好喊緊。佢知道件事，第一句問: "你識唔識佢哋?"
我呆了一呆: "唔識"
"但其中一個係大肚婆......"
佢:　＂明白。你飲啖水先。意外，發生咗，我哋幫唔到手。
你攞紙巾抹眼淚先。唔係，老公會好擔心你。
深呼吸先。
濼言都會擔心你。
搞掂就離開補習社喇。＂

嗯，今日其實係出去食一哥的生日飯，佢班朋友一個月一次的定期飯局。
我真係要好好控制自己情緒。

但同時，我又擔心自己會產後抑鬱。
好驚自己會傷害濼言、傷害自己。
點解我會控制唔到自己的情緒？
好困擾。