我好似有咗

心情好複雜……
一直都好想有BB, 睇咗幾個月中醫，每次特登搭車出去油麻地東華，又戒晒口，都係好想有BB.

前日，開多咗個tag: "好想有個B"
當時係諗: 根據吸引力法則，慢慢寫低點樣調理身體嘅過程，可能就好似學習理財一樣，逐步見到成效。
而且，我乜都唔識，唔緊要。好多網友，有經驗，只要一個半個肯提點吓我，咁成功機會就會慢慢增加。

今次遲咗嚟M, 一哥叫咗2次，咁我昨晚就驗吓。
次次都唔中，所以冇期望。只係唔想一哥提第3次。
然後，竟然有2條線。

從來未試過2條線，即刻搵張說明書睇。

陽性?

再搵個盒，確認驗孕棒冇過期。有效期: 2021年5月

一哥walk完Muimui返嚟，我即時講佢知。
佢好冷靜。
然後，我哋一齊再walk Muimui. 
佢開始講: "你要同家長講喎"
貓: "點解呀?"
佢: "你要暫停晒所有工作嘛。頭 3 個月，唔穩定喔。你個朋友之前都流產過"
貓冇出聲。

佢: "你自己決定啦"
過咗馬路，佢繼續FF: "可能要叫auntie過嚟，照顧你喎"
貓: "吓??佢連自己都唔識照顧自己喎"
佢: "咁你哋細個，邊個湊大你哋?"
貓: "我由細到大都食公仔麵做晏晝，有時腸蛋，有時腿蛋"
"媽咪成日打牌" "妹妹有咗，媽咪都冇照顧佢呀"

佢: "咁你叫妹妹嚟照顧你啦"
貓愕然: "點解要搵人照顧我??"
佢: "煮吓嘢畀你食，粗重嘢幫你拎吓，行出行入有人陪住嘛"
貓安靜了。早知唔講住。

今朝，我去診所驗孕。
出門口時，步步為營，怕吵醒Muimui.
佢有separation anxiety, 如果知道我唔喺屋企，佢會驚到震，會整爛晒d嘢。
之前部電視櫃、hi-fi, 仲有好多衫、毛公仔、書，都係咁報銷咗。
開咗iPad, 在細房播節目，再三確認Muimui熟睡中，我才靜悄悄出門。

醫生用咗1分鐘，等驗孕棒條線出現，講: "Positive, 可以出去攞信"
前後15分鐘，睇完醫生，返咗屋企。

護士話要去瑪嘉烈排期。我唔明點解要排期，都未生。連肚都未見。
上網搵資料，原來係排期做產檢。
要預備好多文件。葵涌屋企，我冇任何住址證明。
結婚證明? 都冇。
反而，太子我有2個單位，都有差餉、電費、水費單的住址證明。
媽咪屋企，我都有銀行信，做住址證明。

妹妹叫我去太子登記咗先。但我唔知去太子邊度登記。
佢話第二胎時，因為太遲發現，好多嘢要另外畀錢，去私家驗，因為政府排期好耐。

打去瑪嘉烈問，詢問處話: "你張轉介信唔得喎，冇你嘅身份證號碼，又冇最後嚟經期的日子，冇預產期"

佢話："冇住址證明，登記唔到喎，你要去民政事務署宣誓，證明你住喺葵涌喎。"

一陣2點補習，而家趕去荃灣宣誓，又再去瑪嘉烈，好趕喎。
遲一日，應該都唔差太遠。
先練琴，明天再算。
明天一哥放假，佢安排時間，好過我好多。
但妹妹係咁催我去排期: 排期結婚；排期做產檢。

妹妹話: 你哋要即刻結婚，攞結婚證明書。你都唔想BB出世，係單親。
呢樣，我要同一哥商量吓。
結婚，佢結過2次，我又結過1次。
結婚係咪有必要?? 有B, 又係咪要即時結婚?
結咗，如果BB走咗呢? 咁又要離婚嗎?

我唔想影響補習社運作，唔會暫停補習。而家連肚都未見，就停工，咁嚟緊10個月，點搞??
一哥好似比我想像中，更緊張。
所以我而家超級緊張。我同咗妹妹講，妹妹又好緊張。
佢哋都覺得，42歲，高齡產婦，樣樣都要好小心。
我唔知可以點樣小心。唔通連行山都唔行? 補習又唔補? 日日喺屋企做廢人?

一哥好有先見之明: "你一有事，就好多嘢諗"
"唔好有壓力，有咩要講出嚟"
而家我真係好困擾。
好多問號，好多嘢唔知點做，又好多嘢擔心。

好似憂慮多於開心嘅感覺。