Thursday, February 4, 2021

舊屎沖咗落海啦



早排同朋友傾偈,不時會"話當年"。
我以前讀港大;我以前做翻譯;我以前教書;我以前個ex點點點;我以前間屋點點點。
朋友講得好正: "舊時? 舊屎沖咗落海啦!"

當一個人不斷緬懷過去,你可以想像: 佢嘅光輝歲月,已經到咗盡頭。

以前嘅人靠睇報紙、睇實體書,吸收知識。而家大家睇YouTube, 睇電子書,甚至聽書。
以前資訊唔發達,肯花時間去研究年報,有機會發現錯價的股票。而家,一切資訊,上網彈指之間就搵到。當資訊變得唾手可得,大家憑咩認為自己能早著先機,搵到未被發現、股價低迷的好股票?

一個人,如果決心成功,必定要忘記背後,努力面前。
無論以前幾風光、都要記住: 係時候,放眼將來,揭開新嘅一頁。
否則,你永遠只能活在過去,被世界淘汰,被大家遺忘。

如果大家都話你得,而你覺得自己唔得,咁係你唔夠自信。
但大家話你唔得,而你仲認為大家大錯特錯,咁你就要做一番成績,證明大家睇錯你,令佢哋跌眼鏡。

以前你好勁,ok. 你好勁咯。
咁今日呢? 你以前勁,唔代表而家都咁勁。

先唔講"長江後浪推前浪"。照照鏡,你仲係咪以前嘅你? 
如果你仲係咁勁,咁點解要話當年? 你而家有咩勁嘢,可以分享吓?

好好諗諗: 而家嘅你,仲有咩夢想? 有咩目標? 你成功嗎? 
你活得充實嗎?
你有能力,做一個令自己、令家人、令下一代自豪嘅人嗎?
你可以令這個世界,因為你的存在,變得更美好嗎?

2 comments:

  1. 所謂好漢不論當年勇。間中緬懷下過去無妨,但花太多時間唔向前望就唔係太好。始終,大家要面對的是將來而不是過去。

    如果一個人畢業十年後,還在提自己當年拿什麼榮譽中學唸什麼名校的話,其實只證明這十年間這個人一點能拿出來的成就也沒有呢。

    ReplyDelete