傻貓結婚記: 我的麻煩親戚

 

年初一，媽咪例牌返沙田團拜。我例牌唔出現。

不過今年，因為我簡單在Facebook 公佈婚訊，被大家用作談資。

二姨:"喂，你個女結婚喎~你知唔知呀？"

媽咪一向鵪鶉:"知呀，佢話唔想大搞嘛"

五姨:"佢唔係話唔會結婚咩？畀人搞大咗呀～"

媽咪沉默不語。

妹妹插話:"家姐不嬲都有自己嘅諗法㗎啦。佢想結婚，咪結婚咯。都拍咗咁耐啦"

其實，我真係覺得，結婚係兩個人嘅事。

之前睇咗年半中醫，調理身體，都係想有BB.

而家有咗，咪結婚咯。

結婚，簽個名之嘛。

限聚令下，擺酒可免則免啦～

大家唔駛畀人情，咪幾好。我又少樣嘢煩，數學白痴嘅我，最憎數錢、計數。

第一次結婚，以為一生人一次，又book教堂，又印請帖、擺酒擺成30幾圍。

金都、百樂，行咗好多次，又book攝影package, 又揀回禮禮物，又整banner,婚禮邀請卡。婚紗，試完一件又一件。姊妹裙，大家揀完又揀，試完又試。

新娘化妝，搵咗唔同嘅化妝師，逐一試妝。頭飾、頸鏈，逐個挑選。

單單接新娘玩嘅遊戲、新郎宣讀嘅愛的宣言、婚禮嘅節目表、婚宴嘅座位表、菜單、嘉年華會式嘅獻唱、獻辭、抽獎、魔術表演、新郎吹口琴，仲有婚宴當晚的成長短片、背景歌單，想起我都累了。還未計整晚不停換衫。又裙褂，又婚紗、晚裝。

那天早上，我還腳踏繡花鞋，走在鄉間田隴的小路上，步步為營，唯恐一不小心，就掉落水溝。

抵達夫家，他們燃點超長炮仗，劈劈啪啪燒了5分鐘，耳鳴了，卻不敢喊痛，也不敢掩耳。

然後，一位又一位素未謀面的長輩、外國回來觀禮的男家親戚、村中長老登場。Ex家中排第8. 我逐一奉茶，跪足大半小時，腿都痠了。

離開上水村屋，行半個鐘，返到村口。腳跟已刮損流血，愈行愈痛。馬上趕去西貢行禮。

北風澟澟，我發燒、鼻水長流。

學生做前枱接待賓客、獻唱。

音樂科老師上台表達意大利歌劇的女高音。

朋友吹奏正式蘇格蘭音樂，領我們進場。

當日教堂、酒樓，座無虛席。

我還記得:

我當晚嚴重腸胃炎，食咩嘔咩，緊張得不得了。躲在新娘房，黃膽水都嘔埋。化妝師努力為我補妝、卸妝、重新上妝。妹妹不停哄我、鼓勵我，幫我更衣。我不斷上台，與賓客拍照。

因為食咩都唔吸收，1星期前做final fitting的晚裝、婚紗，全都不再合身。

送客時，我的晚裝突然往下掉。

幸好妹妹在旁，推我轉身、整裝。我再扮若無其事握手。

說到底，我結唔結婚、生唔生仔，關佢哋咩事?

結婚帶嚟嘅巨大壓力，我唔想再經歷多一次。

我有錯咩？

花咁多精神、時間，預備婚禮、婚宴，滿足所有人，但辛苦自己。婚姻是否美滿，與這些前期功夫，一點關係都沒有。

42歲嘅我，只想簡簡單單，同愛我、我又愛佢嘅人，結婚生子，建立自己嘅家。

佢哋又唔係幫我養，一年先見1-2次，憑咩指指點點?