港股期權 4 : Long call 阿里爸爸、 比亞廸

之前講過: 

買long side 期權，要有輸晒的心理準備。

正股跟隨大市，股價上漲，我高位套現咗少少，多了一筆資金，做少少投機。
近日股市有時高開低走，有時相反。我嘗試留意某些熱門股，低位時撈long call.
不過，全部都超短線，以免股價橫行，蝕時間值。
同時，也驗證一下自己在第二期權班學的技術分析圖表技巧，是否派得上用場。

買入原因: 阿里爸爸股價一直偏低，但睇圖，又喺上升趨勢線之上。

於是，我long call 咗20 張，3月到期的爸爸，成本$74500

年三十買完，過咗農曆年假，我見爸爸升幅唔大，怕佢橫行，沽咗。賺$2077, 當發少少新年財。

第二天，看到比亞廸跌幅頗大，我在$262 左右，買左5張long call.
買入原因: 正股只因一則新聞: 晶片短缺，導致全球首季減產近100萬架電動車，而下跌。
但比亞廸一向自製晶片，而且產能過剩，有能力外銷。

食完晏，股價回升至$266, 沽咗。賺$3438.2
沽貨原因: 少少事都可以一早跌咁多，市場應該唔係熱炒緊電動車。$266唔算靚價，畀我會$245左右才買入正股。如果股價橫行，又係蝕時間值。雖然股價冇跌穿上升趨勢線，都係走咗先，之後再睇。

今日，谷友隻6606, 已經在$80左右食咗。我手持現金，冇參與。大市氣氛似偏弱，大部份股票都微跌。加上好多新股排隊上市，大市資金又進一步吃緊。到時再睇餸食飯。

最後，留意到自己就算投資金額唔大，每次萬幾至幾萬蚊，仲定埋止蝕位，但只要手上有long call, 而正股又唔多郁，我已經相當擔心。
相反，投資正股，例如TSM,  TSLA, 盈富, 福壽園, 維他奶, 友邦, 騰訊, 我可以好放心，短期升跌，話之佢啦。股票基本面不變，長遠都係會反映落股價，仲有股息收。
(昨天我又趁股價回調，買咗5股TSLA.)

而short side, 我有正股在手做short call, 有錢接short put 的貨，我就可以安心等時間過。最近開始試做超長期的short put TSM, 權金相當可觀。始終台積電業務清晰簡單，盤數易明，短期見唔到有競爭對手，市場需求大，技術門檻高，有加價能力。
如果到時可以低價買入這些優質股，就算我變賣其他股票，抬錢接貨，我都心甘情願。

昨天有谷友分享: 他的比亞廸long call, 帳面蝕$55000, 但全個月合共賺咗$70萬。

我第一個反應是: 嘩!!! 好勁呀!
第二個想法是: 我做唔做到?
然後，我知自己好怕輸。而且輸得多，我會麻木，唔識止蝕。這是long side的大忌。
再long下去，賺粒糖，輸間廠，就係我未來的寫照。

Long call 係刺激，暫時都賺到少少錢。但心理壓力相當大。
我諗我都係要壓抑一下自己的賭性，繼續研究多d好股票/指數ETF, 回報或者未必咁快咁多，但風險亦冇咁大。
當然，知易行難。總之，一定要控制注碼。而且，留意自己整個portfolio, long side佔幾多，係咪自己可以承受的風險。唔好高估自己。