誰是湊B最佳人選

 佢：“搵你阿妹湊濼言，你每日來回4程車喎~不如請工人啦”

我：“唔請”

佢：“我畀啦”

我：“唔請”

佢：“咁請保姆啦”

我：“搵咗幾個，唔好，唔請”

佢：“點唔好？””

我：“冇期、唔照顧初生BB,貴。質素冇保證、好難查資歷”

佢：“咁我叫阿姨辭職，過嚟湊濼言”

我：“人哋有工做，點解要辭職嚟湊BB”

佢：“佢份工辛苦呀！而且佢應承，搵唔到人湊，佢嚟幫手”

我：“妹妹話會幫手”

佢：“你搭咁多程車，都辛苦”

我：“到時再算”

佢：“要安排喇”

我：（發呆、抓手）

佢：“唔駛擔心，我都係畀多個選擇你。可以再諗嘅”

我繼續發呆。返到補習社，又爆喊。

（佢係咪唔信我？佢怕我傷害濼言嗎？我真係搞得掂？我係咪真係咁冇用？1星期4日，每日搭4程車，每程個幾鐘，仲要轉車，我得唔得？

請保姆，如果佢擲濼言落地呢？亂餵嘢佢食呢？

請一哥阿姨，我哋相處到嗎？同奶奶食過幾次飯咋喎~）

究竟我真係湊得掂BB嗎？補習時，應該點樣安置濼言？育嬰院？每日搭入大埔放低，出嚟荃灣補習，再返去湊濼言，返葵涌家？請時薪兼職保姆？放去暫託中心？

諗到呢度，好攰。

都係妹妹好。

妹：“佢嘅擔心係啱嘅。冇人一開始，就識做人爸爸媽媽。頭個半月，陪月在時，妳盡量學，妳都會識得湊濼言。

陪月做到11月中左右，之後我幫手照顧濼言。試行2-3個月，到時再檢討、安排咯。冇嘢係唔改得嘅。

女嘅想畀女家湊，男嘅又想男家照顧BB,好正常㗎喎。因為最信得過嘅，都係屋企人丫嘛。

一哥都係驚你辛苦，擔心你。你唔好太快去咗感覺、情緒嗰邊先。

你有條理咁講返你嘅諗法、考慮、決定，佢一定會同你有商有量，搵到大家都滿意嘅方法。

好多嘢，都係傾出嚟嘅~”

如果一哥阿姨湊，我既擔心婆媳糾紛，又唔知佢點湊BB,可能仲擔心。今晚奶奶話，阿四提議畀$1萬佢，幫手湊孫。但佢工作薪酬遠高於此，加上阿四經常跳槽，分分鐘冇錢畀。所以佢拒絕咗。

上媽媽谷問，谷友分享咗2個Facebook pages,佢哋成功喺度搵到保姆。

呢段時間，外傭未到，大家都爭住請保姆。薪酬水漲船高。冇經驗嘅退休阿嬋，時薪$100-$130。有經驗嘅，唔考慮兼職。

以下係我聯絡保姆，得到嘅回應：

似乎僱主現時嘅bargaining power極弱。

搵咗育嬰院資料：

但聽媽媽谷嘅人講，育嬰院好多時人手唔夠，BB喊好耐，先有人理會。甚至有人試過，BB在育嬰院，被傳染玫瑰疹。咁似乎唔係好選擇。

社區保姆，時薪$45, 但好搶手，好難夾到時間。

問心，我一直只考慮搵妹妹幫手湊濼言。唔想有任何變動。我亦唔識亦唔想學習同陌生人溝通。湊小朋友，方法人人唔同。我係唔開電視，亦唔主張用電子奶咀嘅。小朋友應該多看書。
仲有，妹妹煮食，少鹽少油，好健康。
佢開朗樂觀，正能量爆燈，表達能力超強。
相信佢會教到濼言同佢一樣。我唔想濼言好似我咁，內向怕事。

每當情緒掣壞咗，妹妹都有辦法，幫我修理好。佢EQ高，做事理性又顧人感受，我唔駛顧慮太多。

妹妹要求$3000/月，幫我照顧濼言1星期4-5日。而且妹妹家好大，已經執咗間房，畀濼言擺衫擺床、玩具，仲有韆鞦、BB浴盆、high chair,學行車，連BB車都有3架 （我葵涌有2架）。
而且濼言有柏霖、珮琳陪佢玩，又有我媽咪幫手睇吓，妹妹超級細心，我真係可以好放心。