怒炒陪月

陪月Amy經常掛在口邊: ＂鳩東巧緊要"
偏偏，每次向她反映意見，她都會回應: ＂但係我覺得......"，或者＂咁樣唔得喎，我解釋你聽點解唔得......"。

我從未試過做僱主，雖然曾經為學校聘用兼職教師、代課教師，但是沒試過辭退員工。因此，我以為聘用了這位難以溝通的陪月員，只能認命。而且，聘用期僅僅個半月，我就當作上天為我開的小玩笑吧。

妹妹就不同了。她曾經擔任管理層，處事技巧圓滑，溝通能力更是好得沒話說。連她都按捺不住，要向一哥抱怨。一哥知道Amy的工作方式，親嘗過她的廚藝，給我兩個選擇: 
1. 另聘高明
2. 不用陪月

我不清楚解約安排，聯繫了介紹人菲姨。她來電時，我恐怕自己不懂應對，由一哥代答。他愈說愈激動，將對陪月的不滿，一五一十數說出來。原來，他對我和妹妹說的話，都放在心上。不滿已經氾濫成災。雖然整段對話，他都禮貌周周，句句屬實，只是愈說，聲量愈大。他毫無轉圜餘地的表達方式、熾熱的怒火，實在＂難聽過粗口"。濼言嚇得整個人不斷彈起，我也心跳得極快。他發怒時，實在是生人勿近。

翌日，Amy即將下班時，我請她坐下談談。她似乎有心理準備：＂有咩指教呀？餸菜唔啱口味，可以講喎＂。
我淡然回應:＂妳有冇留意，今日的午餐，我幾乎冇食過?"
佢:"係呀，妳係咪唔肚餓呀?"
我:"呢碟係你之前提過嘅黃酒煮雞?"
佢:"係呀。"
我:"咁d雞你點煮? 有有汆水? 紅棗你有冇浸過?木耳你自己有冇留意塊塊都大過我隻手掌?"
佢:"我有洗乾淨，先放落水烚。紅棗唔駛浸㗎，佢本身就係熟嘅。木耳一向都唔駛整得太細塊。黃酒我落咗好少，煮嘅時候揮發咗，所以冇黃酒味"

我: "如果我跟陪月員嘅工作清單，你絕對係傑出員工。你守時、盡責、幫BB清潔衣物、預備燉湯、代茶、用心預備膳食，而且為人老實，買返嚟嘅餸菜，唔啱我哋口味，你會畀返錢，自己攞返屋企。
呢d都係你嘅優點，我好欣賞。

不過，作為僱主，我希望員工，可以幫我解決問題，唔係製造問題。
你經常強調要溝通丫。咁你有冇留意，無論我哋同你講乜，你都只會回應:"但係"。

你話要買按摩油，我哋買咗。但你冇用過。妹妹提醒你，BB有肚風，最近嘔奶多咗，你話唔需要按摩。
我哋講咗希望盡快幫我補身，因為我趕住返工，之後冇時間進補。你話要由你返工第二日起計，第一星期只能吃豬肉，第二星期只能吃雞。而唔係跟產婦嘅產後調理進程。

你問我哋，你煮嘅粟米粒薯仔雞柳飯好唔好食。問心，將所有食材，一口氣放入去電飯煲煮熟，可以有幾好食?"

Amy: "我自己一向覺得自己煮嘅嘢好好食㗎，呢個飯，我成日煮畀屋企人食，我老公、我個仔都好鍾意食。"

我:"我知道你好認真煮嘢食，但你有冇諗過，客人想唔想食? 
你花3個鐘頭，煮一碗紅豆沙畀我食。用咗好多石油氣，你亦用咗好多精神，但你煮之前，有冇問過我想唔想食? 3 個鐘整1碗紅豆沙，你覺得符唔符合成本效益?

買嚟嘅餸菜，我哋唔啱食，你拎走。可唔可以做多一步，喺買餸前，問吓我哋想食乜嘢? 或者先了解清楚，客人的生活方式、飲食習慣、對陪月員，即係你，嘅要求?"

聽到呢度，Amy開始哽咽: "我明白喇。你唔鍾意我煮嘅嘢食。咁我日日煮，你又唔鍾意食，會唔開心。咁啦，合約係死嘅，人係生嘅。我可以做埋今日就走，唔駛7日通知期。你唔駛賠錢畀我，但你都唔好要我賠錢，好唔好?"

我:"冇所謂，你自己覺得舒服就可以。如果你做晒嘢，可以提早走，唔駛等到6點。"

Amy收拾時，我隨手寫了封推薦信，讓她帶走。她有點訝異，表示沒想過事件會有這麼好的結局。
老實說，這封信，我避重就輕，只寫她的優點，省略了她的缺點。凡事留一線，日後好相見。即使日後未必再遇，我也希望她經一事，長一智。她願意盡心工作，只是處事方式，與我們期待的相差太遠。如果能夠有更多工作機會，或者她就能夠不斷進步，成為一個專業的陪月員。

想不到我乖乖地請了陪月員，卻只工作了11天。沒有陪月員的日子，大概不會差太遠。
可是，星期六起，就要恢復補習。現時近乎全母乳的濼言，到時怎樣?要轉配方奶嗎?
星期四晚，一哥、我、濼言，會搬回葵涌。到時我處理得了嗎? 一哥上班後，只有我獨自在家。我有能力照顧濼言嗎?