買賣期權的三類人

近日股市持續下跌，開始在不同群組，見到有人話要del app, 熄機。

大家都覺得，跌市好難捱。
就算手上一手好牌，但股票跟隨大市下跌，由有盈利，變微賺，再變倒蝕。
這種心情，百般滋味在心頭。

大概都會在悔恨: 點解之前唔喺高位沽貨? 鎖定利潤咪好咯。而家跌市，就有錢撈好嘢啦。

不過，高位，係事後先知。
大牛市時，大家有冇待熊基金? 
跌市，大家有冇跟隨之前的策略: 分注買入，跌8%，入第一注。跌16%，入第二注。再跌20%，第三注。
之前有冇留意: 有邊d 優質股，一直買唔落手? 而家特價時段，人哋要止賺離場，我哋就可以冷手執個熱煎堆喇。

當然，講，永遠容易過做。

我睇住自己嘅Tesla, ARKK, 由賺變蝕，何嘗唔傷心? 點會唔難過?

不過，我仲未沽貨。因為，未到我止蝕位。而且，我曾經止賺咗少少TSLA, 現在暴跌，都唔係好傷。
我覺得: 如果在高位，曾經分段減持，咁日後回調，分段增持，會較為容易。
假設我在高位一股不減，現在就冇錢再買返喇。

亦因為咁，我其實唔係好明，價值投資經常講: 如果你的選股正確、入市時機正確，咁沽出嘅時機，可能永遠唔會出現。
股價，特別係科技股，呢類虧損中，超高PE，用PS估值嘅公司，你點知自己入市時機，係咪正確呢?
傻貓唔係天才，我乜都唔識，只可以用適合自己的步伐，升時推高止賺，跌時盡量stop loss.
冇錯，我沽時通常唔係最靚價，買時亦唔係最低位，但係總算守到盈利，就算蝕，暫時都係可控範圍。之後唔知。

今次投資操作，因為加入期權，出現了兩難局面。

首先，現價的Tesla, 其實我已經覺得可以加第一注。
不過，因為有short put @ $720, 我唔敢加注。
到時接貨後，如果現價繼續尋底，我會蝕入肉。

但short put 到時係咪成功接貨， 係未知數。
TSLA股價波幅極大，到時連升幾日，升穿行駛價，亦有機會。

講開期權，今日有同學仔傳授心法: 買賣期權，大致上分為三類人。

1. 成日話用short put去低位discount 接貨嘅 幼稚園同學
就算10 次有 9 次賺到權金，但最後一次一定會一舖清袋。
特別遇上大跌市，幾隻short put一齊被行駛，咁就大失預算。

2. 已經可以利用 spread去操盤的 小學同學
表面上，用spread係局限咗自己的利潤。
但好處是: 賺你唔會賺好多，但輸亦有保護。
同時，利用 long gramme, 有機會做到delta 0 
大大提升勝率、賠率。

3. Long, short, 鎖倉技術都爐火純青的 博士生
清楚知道幾時開期權 short call, short put, long call, long put
識睇價位，做鎖倉，甚至做反向 long put / long call 
佢哋心理質素極高，而且藝高人膽大，可以做幾百張期權合約。

傻貓自問道行低微，現在還在讀托兒所。
希望繼續努力，好好學習，有一天能夠讀完小學，就心滿意足了。