投資與投機（傻貓看一哥的期權操作）

近日見一哥經常機不離手，不斷盯著股票報價。好奇一問:，才知道他最近虧損頗嚴重。買咗拼多多之類的中概股long call，跌到一仆一碌。

為甚麼不斷跟貼股市、股價，還是虧錢…?
我知道叫佢del app, 放低手機，唔睇市，完全冇用（我有試過叫㗎）。尤其佢昨日工作時，切咗忽肉，休假至下星期四。這段時間，他只會更加沉迷。交易次數一多，出錯機會就大。虧損，只會愈來愈嚴重。我提議過去行山，信號弱，佢自然要放下手機。但他拒絕了。

傻貓只能做好自己，開始反思：最近一年加入勁人谷後，自己的股票、期權操作。

自從學咗用期權，正股的買賣次數，大幅減少。
無他，我覺得股票是投資，期權是投機。投資像耕田，投機像打獵。

耕田，要有土地（資金），識揀農作物（選股），要望天打卦（唔知幾時價值回歸），要有天時地利人和（最近新經濟股，特別是中小型公司，財報業績亮麗，但市場唔收貨，股價下沉）。當然，農夫要好勤力，日出而作，日入而息（平日訓密密做功課，選股、計估值，等大跌市時，分段低價吸納）。

打獵，要求更高。需時短，投入資本亦少。（正股升跌幾蚊，期權已幾百個percent. Long side,輸有限，贏無限。） 成功有飯食，失敗可能命都冇。（買價外short side 期權，權金少，回報低，但勝在獵物多，唔大貪其實夠食。但long side睇錯邊，唔肯止蝕，就神仙難救。）

一哥話最近主要係期權蝕錢，佢本金少（其實幾萬蚊，都唔少），只會做long side.(即係賭大細）所以唔似我嘅short side,可以roll over,或者直接接貨後，short call出去，將時間值變作金錢。

買賣股票，我會仔細研究財報、基本面、圖表分析。但我見一哥主要睇消息，跟風買賣。單邊趨勢市，例如去年大牛市，佢咁買冇問題，肯入市，已經成功。今年上落市，引伸波幅浮動，股價橫行，時間值損耗快，long side一旦站錯邊，即使不斷止蝕，都會蝕入肉。

我正股交易少，期權都好忍手。值搏率高，勝算大，才會出手。
而且，即使正股股價已經非常吸引，我每次都只會動用小量資金，分段買入。
正股股價急升，我會視乎情況，分段止賺。有些就變零成本持股，慢慢觀察。當基本面出現改變，再考慮加倉，或者減倉，甚至清倉。

當股市不明朗時，一些信心不足的持股，就先行沽清。賣出時，帳面賺蝕，並非考慮因素。

買賣股票、期權，我都習慣未諗贏，先諗輸。

買入股票，或者開立期權合約後，我不會經常看著手機報價。
因為，買入前，我通常已經預計好止賺、止蝕位。同一隻股票，我都會分開核心持股、短期持倉。

當然，為分散風險，我的持倉盡量不會太側重某地區，或者新/舊經濟股。未來，可能還會用行業、版塊、投資標的去劃分。例如，買入CEF, ETF, ETD, 債券, 房託基金。

投資正股，只要相信股市長期走勢向上，中期下跌，不應該做成心理負擔。

但如果一哥堅持要短線操作，就必須磨練自己的選股技巧，並熟習技術分析，買入時，定好最佳買入點、止蝕位、止賺位。而且要大幅提升心理質素，理智冷靜，緊跟策略進行操作，不可以被市場雜音干擾。

期權是雙刃劍，睇啱當然係買得大，贏得大，但睇錯，唔肯止蝕，又或者不斷睇錯，都仲唔識停，就等於倒錢落海。