傻貓結婚記: 有驚無險結婚了

長文慎入!!

真係低能無上限!!

明知自己抵受唔住壓力，今次已經好堅持要簡單的婚禮: 簽個名就算。

疫情關係，婚姻登記處實施咗婚禮限聚令。

— 根據《預防及控制疾病（禁止羣組聚集）規例》第599G章，除《規例》附表1所指明的豁免羣組聚集外，在憲報刊登的公告的指明期間，不得在任何公眾地方進行羣組聚集。獲豁免的羣組聚集，包括於婚禮上不多於20人的羣組聚集，前提是於該婚禮上並無供應食物或飲品。

因此，在上述期間於婚姻登記處舉行的婚禮，參與人數不得多於20名，包括新人、見證人及觀禮賓客。

咁我順理成章，愈少人愈好。最好得我、一哥、我媽咪、佢爸爸。

最後，媽咪要求請d阿姨，我只好在婚禮前一天，親自打電話畀二姨，whatsapp 5姨丈。
4姨一早講咗會出席，唔駛煩。
2舅父行動不便，唔會嚟。3姨一向冇乜交流，我懶得搵。

一哥有幾個初出來工作時，認識的好友，他們都來見證。小寶仲全家出席，帶埋剛剛識行識走嘅BB.
我只是在Facebook宣佈婚訊，結果: 我一個小學同學，移民前來觀禮；凱思表姐；山友Sara都嚟咗。

好啦，出席名單，總算落實了。

這次結婚，好像不太順利。因為我實在太烏龍了。

首先，登記結婚時，我的身份證不見了。

職員好好，叫一哥先行宣誓，我後補。

我網上預約補領身份證。但是，最早要3月15日，才可以補領。
可是，婚禮日期: 3月2日。

我焦急得如熱鍋上的螞蟻。只好發電郵去入境事務處。
職員幾天後回覆: 我可以隨時親身到入境處補領。
我真係好趕，佢哋話幾日後可以領取。

最後，我昨天一大清早，就趕去領取身份證。
一哥知道我擔心則亂，陪著我去。

離開後，他送我乘車。
最近我總是暈車浪，不敢搭307，太長途。改搭104,到紅磡轉東鐵。

上車後，開始胡思亂想，所有婚禮可能出現的蝦碌場面，上次結婚的恐怖回憶，一幕一幕，湧現眼前，如在昨日。

我記得: 我之前在教堂行禮。入場前，因為太凍，我穿了前一晚的紅色絲絹褲。
入場後，行紅地氈時，我穿不慣高跟鞋，差點絆倒。
一手執起婚紗裙擺，被人舉機拍下裙底的紅褲子。

我記得:
我們找不到婚戒，幾經辛苦才找到。但我太緊張，婚戒跌了。
我們找不到Lisa借出的水晶燭台，後來才發現遺留在車尾箱。
我讀錯誓詞，食晒螺絲。

稍一定神，列車已到南昌站。

我呆了。

東鐵幾時開始有南昌站? 幾時去到太和站?

車門關上前，我衝了出去。

然後，過對面月台等車。

車到了，原來總站是屯門。

兜兜轉轉，終於搭回紅磡站，再轉東鐵。

一個早上，都在遊車河。

回到大埔，已經正午。

妹妹急得不停發號施令。她說我要預留一小時，讓她給我化妝、set 頭。
我心目中，化妝就是塗粉底、唇膏。1分鐘都不用。
頭髮，束起就好。

於是，我提議先吃午餐，再慢慢化妝。
媽咪ordered Pizza Hut外賣速遞，方便快捷。傾呀講呀，又一小時。
我去沖涼洗頭吹頭。媽咪煲湯丸。

我施施然出來，妹妹卻緊張得不得了。
她: "我話咗要1個鐘呀。而家得半個鐘。你坐定，放低電話。"
我乖乖坐定。

妹妹以前雖然做美容院，但業務是激光脫毛。
想不到，她特意為我上網，學化新娘妝。
媽咪成日話: 佢成世人，最成功嘅，就係生咗我同妹妹。
我覺得: 媽咪最好嘅，就係生咗個妹畀我。

當我最灰，最想收埋自己時，佢畀我任性地辭職，在家耕田種菜，一整年不見人。連租都冇收我。
當知道東尼偷拍她出浴後，她沒有像Melody般指責我，作為教師，不肯站在正義一方，向警方指證他。
妹妹無條件支持我任何決定，離婚、復合，她都沒所謂。她說: "最緊要你幸福。"

我在倫敦機場，遺下了3歲左右的小柏霖，她當時也沒有責備我。
只是說: "唉，呢個姨媽。乜都漏得嘅"
然後，大家一齊搵仔。

她開始塗塗抹抹。保濕霜、防曬霜，還有不知名的東東西西。塗了最少6層。
然後，化眼妝。
問題來了。我的眼睛超級敏感。一秒鐘可以眨幾百下。我不停流眼水，她不停重新劃眼線、塗眼影。幸好，她最後放棄幫我貼假眼睫毛。
然後，我發現自己未戴隱形眼鏡。
戴完，一切又重新開始。

她細心地為我set 頭。又熨直頭髮，又電鬈瀏海，又編小辮子，最後定型。
還加上頭紗。

嘩!!! 

看著鏡子中的自己，我在懷疑: 這是我嗎??

穿婚紗了。
妹妹之前幫我用蒸汽熨斗，逐朵花熨直。
昨天，她好努力地幫我將大肚腩，塞進婚紗裡。
她的束衣，我穿不下。只好借媽咪的。效果? "離晒罩"
我開始擔心: 上次婚宴送客時，晚裝掉下事件重演。
妹妹逐條帶解開，我終於塞到自己入去婚紗。

出門了。
子傑特意借來七人車，方便我們一家人，齊齊整整一齊出發。

可是，花了25分鐘，車還是撻不著。沒電。
3點沙田行禮，我們2:25還在大埔林村。
心急也沒用。我心想: 結唔成，就算了。日子還是一樣地過。

子傑成功聯絡到一個鄰居，他馬上飛車回來，過江龍咁，駁電畀七人車。
2:37，成功開車。子傑非常專心駕車，全程大家連大氣都不敢呼。
一哥不停打電話畀我，但我較咗靜音。冇聽到。
佢打畀媽咪: "今日唔係好多對新人，可以遲10分鐘開始。我問咗職員。唔駛急。"
子傑塊面冇咁僵硬。
2:55, 抵達。

不過，原來去錯了。大會堂停車場，不是婚姻註冊處的停車場。

拐個彎，子傑放低我哋。一哥在車邊等候。
他見到我，馬上輕聲安慰: "唔駛急，唔駛緊張。攞身份證先?"
我呆了。"我冇呀"
妹妹出現: "我有，我拎咗。呢張媽咪嘅，攞埋去啦。"
嘩!!妹妹好厲害，臨危不亂。

當我諗緊點解要攞媽咪張身份證時，門口職員要我"安心出行"。
我個app唔知點解用唔到。
手寫登記表，人龍好長。
我又呆了。

原來，整條人龍都是我們的親友。
排第一的Mon姐，讓畀我登記咗先。

入到去，職員畀份唔知咩表，叫我哋檢查。
我睇咗，我個名、爸媽個名，都啱，冇問題。一哥都話佢ok.
不過，職員話唔啱。
一哥串錯咗佢爸爸的英文名。但佢冇發現。我又冇睇佢爸爸身份證，唔知。
職員叫我哋出去影相先，佢哋要重新預備份證書。

出去影呀影，然後入場。柏霖珮琳好乖，幫我拎拖尾。

入到去，我唔知點解又好緊張，對手好痕，看著手掌開始浮現一粒二粒唔知乜。

最後，總算成功簽紙、交換戒指。

職員消失。
我們的親友，一齊圍住我哋。
佢哋畀咗利是、送咗金器。攬住我，齊齊影相留念。

原來結婚有錢收?點解嘅? 我都冇擺酒。

一哥爸爸封利是，成5千蚊喔。

金器，個盒好大個，賣出去應該唔值錢。畀我揀，我想要金粒。🤫
一哥話係朋友的祝福。佢放咗喺鋼琴上面。屋企又多咗一樣裝飾品。

一哥問: 你副眼鏡呢?
我唔知喔。
原來，又漏咗喺媽咪屋企。

一場烏龍百出的婚禮，圓滿閉幕。