懷孕初期不適: 濕疹、暈車浪、食欲不振

最近有谷友問我: "心態上，是否已經為bb出生作好準備？"

老實說: "我唔知要準備咩😅"

傻貓的免疫力一向差，最近開始疑惑個B係咪真係存在。

搭8分鐘車，仲係私家車，已經暈車浪。
全身長了好多紅點。唔知係孕期濕疹/妊娠蕁麻疹。

成日冇胃口，但半夜肚餓。
昨晚9點就累得睡死了。最近都是這樣。但又不知道為甚麼自己經常突然疲倦。
工作量增加了一點點，因為收多了一些新學生。
但脾氣開始有時亢奮，有時暴躁。
習慣早起，安靜看書、睇影片上課、練琴。
如今大廈外牆維修，每天噪音不斷。
想心平氣和，專心學習，好像難比登天。

Muimui在大埔，妹妹手傷了，不能拿重物，攞唔到Muimui畀我。
冇得同Muimui行山，我被迫留在家，忍受噪音。
有考慮過出外走走，或者到圖書館看書。但噪音一起，我就hang 機。只會躲進被窩，掩著耳朵。
好低能。
由細到大都係咁，自己都知白痴。不過我真係咁低能。

另外，最近經常冇胃口食嘢，食少少嘢又飽。
但好多時夜晚晚凌晨2點幾至4點，就餓醒咗。
冇得瞓令我非常煩躁。總之，自己的身體，自己控制不到。
感覺完全out of control. 

妹妹、媽咪、Wing 都冇我呢堆問題。我唔知自己點解咁麻煩。心情非常糟糕。

昨晚和一哥，講起最近這堆沒因由的憂慮、身體狀況，說著就想哭。加上幾個谷友，都分享經歴：第一胎好易夭折。我好擔心，好驚。

一哥見狀，馬上過來擁著我。

他分享往事：第一任妻子，曾經有葡萄胎。所以，他不敢抱太大期望，不想太早添置嬰兒用品。

他說：“BB有冇，都唔緊要。最緊要你放鬆d,唔好諗咁多，唔駛擔心。我最鍾意見到貓貓笑，你食嘢個樣最可愛。”

佢仲話：“我知你好想要BB,我都係。我只係擔心，如果BB有咩事，你會唔開心。所以唔會因為有而太興奮。無論有冇BB,我都會喺你身邊，會咁錫你，咁照顧你。唔好諗咁多。”

我個中醫3月29返港，已經預約了。希望她幫到忙。
之前為了有BB, 我已經跟過好幾位朋友推介的神醫，艾炙、針炙、中藥，都試過了。
每次食完中藥，都瀉到十彩，連站都站不穩。愉景往南豐那不足10分鐘的路程，我針炙後，要行半小時。

幸好，最後我遇上這位中醫，她是東華三院的駐診資深中醫，收費低廉，而且好細心問診，提點我生活細節、飲食習慣，並每次根據我的情況，慢慢換藥，逐步調理身體。

開始時，我仍然食完藥45分鐘左右就肚瀉。後來，慢慢改善，冇咁水腫，皮膚過敏亦消失。

這次有BB, 除了一哥上輩子做了超多好事，而且非常細心照顧我的起居外，功勞一定是這位超細心的中醫師。
雖然每星期要特地乘車出去油麻地，可是花的時間非常值得。
而且，搭地鐵好像沒怎麼暈車浪，挺好的。

西醫我唔敢睇，怕藥物影響BB. 經常懷疑佢仲喺唔喺度。
谷友都勸我睇西醫。我當然知道這是最合理的做法。

不過，慳妹一向唔鍾意用錢。
而且，上網睇咗好多人分享，睇西醫都係攞藥膏返去搽。
類固醇最有效，但可能對BB唔好。
咁我寧願另外諗辦法，忍一忍，唔好抓損晒自己；食雜菜湯，去水腫+排毒；每日做最少30分鐘瑜伽。睇吓有冇效先。

下星期去照唐氏，3月尾做產前評估，登記時，職員有講會照結構。不過我唔知係咪同一日。
我想簡簡單單生個B, 唔想好似妹妹咁，又私家又公立。
除咗錢，走嚟走去，都令我覺得好麻煩。
盡量唔駛搭車，就最理想。
希望所有不適，盡快消失。

貓貓乖，靜下來，想想應該做甚麼，才對自己、對BB, 會更好？

最近少咗行山、睡眠不足、飲食習慣改變，如果是荷爾蒙問題，就嘗試慢慢適應、接受。改變不到環境，就改變自己想法、心情吧。理性思考、保持心境開朗、多做適量運動，會更好。別想太多無謂事情，別為明天憂慮。如果BB的出生，是天父的旨意，我不用掛心。如果天父要帶走他，可能祂有其他安排，不用我操心。

放下，自在。加油。