帶毛孩搭車

 

又一架了。

"希望下一次幸運些吧～"傻貓心想。

巴士又到了。傻貓盡量把袋子往身後挪，忐忑地登車。

"小姐，你個袋入面，係咪寵物? 狗唔可以上車。"司機斬釘截鐵地說。

"就幾個站，佢喺袋入面，唔吠唔郁，絕對唔會騷擾人㗎~唔該你啦～"傻貓苦苦央求。

"總之，狗就唔可以上車。請你馬上落車。"

聞言，傻貓只能再次下車，再呆等20分鐘，祈求遇上隻眼開、隻眼閉嘅好心司機。

在東歐，經常遇上狗主帶著狗狗，在cafe悠閒地歎咖啡、在超市蹓躂、在公園漫步，同坐巴士、地鐵。

台灣也自2008年開始，容許狗隻進入捷運、公車。2017年開始，台北更開辦「友善狗狗公車」。

可惜，這裡是香港。

巴士、地鐵、小巴，都不得携犬上車。

每次出行，都令人頭痛。

最近，Muimui排血尿，傻貓下課後，急忙帶她看獸醫。多次闖關失敗，只能花幾百元，搭的士。

Muimui年紀大了，腎功能減弱，泌尿系統不太好。她自知經常失禁，寧願強忍口渴，終日不喝水。

為免她情況惡化，傻貓經常擠出時間，帶她行山。行累了，她就會討水喝。

曾經相約山友跳島綑邊，因為多番被拒登車，單單候車就花了近1時。小巴雖然可以接載狗隻，但司機有權拒載。最後，無奈搭的士，由林村去西貢黃石。車資高昂，只好減少參加西貢一帶的行山活動。

為解決交通問題，傻貓嘗試考車，無奈視力太差，又不諳機械操作，三次學車，屢試屢敗。

每次搬家，傻貓都盡量選擇可寵的樓宇/屋苑: 粉嶺的花都廣場、大角咀的港灣豪庭、荃灣的荃威花園、大埔的村屋，以及現時的新居。

可是，面對僵化的運輸、交通政策，傻貓實在無計可施。連入狗袋，都不能登車，我還可以怎樣?

Muimui 16歲了，在她有生之年，恐怕都沒有機會，堂而皇之地乘車、逛公園。生於香港，跟著一個沒有用的主人，不懂駕駛，又冇錢出出入入都搭的士，Muimui真可憐。

不過，我承諾: 永遠不會丟下妳。以後的路，無論多難走，我們都會一起走下去。

擁抱與聆聽

 

晚飯後，傻貓呆坐一旁。

「貓貓？你唔練琴？你可以睇吓書、玩吓德文。廚房嘅嘢，我執得喇。唔好咁擔心啦～」
一哥今日放早，返嚟就開始搞衛生，冇停過。

「 唔係呀～我好似好嬲，好唔知點咁～
好似好多情緒喺入面，但係獨立去睇每件事，又唔應該咁～
好多畫面喺度不斷彈出嚟～我同自己溝通緊～」

一哥放下掃帚，瞄我一下：「咁好啦，你有嘢，可以慢慢同我講。」

幾分鐘後，傻貓整理好：「你知道竹內結子嗎？」
一哥搖頭。

「佢自殺了。」

一哥停下手上的工作，眼定定望住我。

「佢係日本嘅藝員。我冇乜睇日劇，唔識佢。

不過，今日好多媒體都講呢件事。

佢可能產後抑鬱，４０歲就喺屋企衣帽間，上吊自殺。

佢老公凌晨２點幾，返屋企先發現。」

一哥走過來，攬住我，靜靜地聽。

「佢嘅情緒，唔會係突然咁起變化。

但係佢老公真係冇發現？

40歲先有BB, 佢應該好重視呢個小朋友。

但係，佢寧願丟低自己嘅初生BB, 選擇呢一步， 一定好痛苦。

最近裝修，你成日都講 "你覺得 ok 咪 ok 咯"~ 

但其實我唔係你，唔知你覺得乜嘢地方唔ok. 

我估你想點，估到好攰。

如果真係有小朋友，你又覺得佢做得唔好，又講 "你覺得 ok 咪 ok 咯"，咁我會覺得好無助~

彈出嚟嘅畫面，係竹內結子喺衣帽間上吊嘅情境~

唔知點解，我睇真d, 會見到個樣，係我自己~

我好驚~好唔開心~又好嬲~好無助~

我唔知點解會咁~我又唔識佢~

而且，我哋連小朋友都未有喎~呢d係自尋煩惱~

仲有，最近睇中醫，每次食完藥，就不斷肚痛、肚瀉~

我體質一向虛寒，虛不受補~

我哋會唔會以後都冇小朋友？」

傻貓一口氣講完，抬頭凝望佢。

一哥攬實我：「裝修嘅嘢，其實都七七八八啦～

有時，我知道嗰刻講嘢，會表達得冇咁好～

不過之後，可以慢慢傾返～唔會收埋收埋，唔同你講～

小朋友嘅嘢，有冇都唔緊要喔~

我哋而家冇小朋友，都生活得好好，係咪？」

貓點點頭。

「你最近好多嘢諗咁～係咪好多嘢做？」一哥關切地問。

傻貓開始扁著嘴細數：「係呀～我覺得我好蠢呀～

明明唔駛返全職，每日都係做幾個鐘頭嘢，一星期仲要放兩日假～

但係好多好多嘢未做～多到唔知做邊樣先～」

一哥輕揉傻貓嘅頭髮：「不如試吓逐樣寫低？

睇吓邊樣緊要嘅、需要盡快處埋嘅，做咗先？

重要又唔急嘅，就過兩日，放假先做？

千祈唔好將所有嘢，堆埋一齊～

咁樣你會好辛苦」

「知道喇～」
望住手上清單，傻貓知道雖然有好多好多嘢未做。

不過，可以逐樣做，無力感、壓力，紓緩咗少少。

一哥讀書冇我咁多，但佢嘅情緒智商、逆境智商、待人接物，都比我好。

從佢身上，我學到好多書本上冇嘅嘢。

流行曲故事：矛盾一生

 

近日重新安裝Telegram,  阿傑主動打招呼。相隔近兩星期，傻貓今日終於記起他，以及那段荒唐的過去。

 

嚴格來說，我們只是網友。

在社交網站認識，網上聊天，感覺不錯，就約會。始終，線下的世界，最真實。

 

第一次約會地點：太子民華餐廳。

阿傑這個選擇，很奇怪。傻貓之前約會的網友，有中學副校長、教師、精算師、事務律師、會計師、工程師、電腦程式員、醫生、售賣醫療用品的售貨員、社工、投資銀行的交易員、marketing director, 政府AO, EO.   通常首次約會的地區，不是尖沙咀、銅鑼灣，就是傻貓工作的荃灣區。而且，約會地點：清一色，環境較清靜的西餐廳。

 

難道阿傑真的在尋覓：願意陪他捱一輩子茶餐廳、麥記的女人？

他的提議，實在令人失笑。

不過，即使見面後，不合心意，多認識一個朋友，無傷大雅。就見見唄。

 

初次見面，相處挺不錯。

阿傑說話直率，甫見面就自我介紹：他做水警，民華餐廳是警察的另類飯堂。碰口碰面都是舊同事，有親切感。他的工作不定時。已離婚，有一個兒子。孩子跟媽咪生活。他並不想安定下來，只是閒著無聊，上網找人聊天。

安靜聽畢他的話，傻貓知道眼前這個人，不會是理想對象。閒時聊聊天，練習一下說話技巧，了解一下教育圈子以外的世界，倒還好。

 

往後，我們看了幾齣電影、吃過幾次飯，就這樣了。就好像較談得來的朋友。

 

直至那一晚，我們約好參加山友舉辦的燒烤活動。

阿傑遲遲未出現，傻貓開始擔心：是迷路嗎？是九華徑燒烤場太大，太難找人嗎？

 

煙霧彌漫，但我彷彿看見熟悉的臉龐。但濃煙薰得我的隱型眼鏡也乾了。

再眨眨眼，人影已消失無蹤。

 

旁邊的帥哥，和我同住大角咀，熱愛行山，他還主動抄牌。

不理會了。也許只是我看錯了。阿傑由始至終，都沒出現。

 

但我錯了。凌晨一點，回家的路上，打開手機，阿傑連發了多個短訊，還有他在燒烤場門口的自拍照。

不知怎的，傻貓突然覺得阿傑很傻氣，傻得很可愛。

他說折騰了半晚，還沒吃晚飯。我決定陪他吃完宵夜，才回家。

 

手機到中環就沒電了。阿傑說可到他的迷你倉充電，我同意了。

 

去到才知道，那是警察宿舍。不過阿傑一向文質彬彬，大家又不是很親密那種關係。就陪他吃完外賣宵夜，才離開吧？傻貓沒有多想，跟著上去。

當然，你想不想，和事實的發展，是兩回事。

 

可惜，那次經歷：不刺激，也沒有欲仙欲死。

外表運動型的阿傑，平時鍾情越野單車，穿上全副裝備踩車的照片，英姿颯颯。可是，在床上，他花了半小時都站不直。更糟糕的是：他連門口都找不到。後來，他說進去了。我伸手一摸，卻是他的手指。大家都尷尬死了。最後，實在太累太睏。既然努力過，不成功，乾脆放棄。出軌失敗。

 

英姿颯爽的阿傑

回家，男朋友依舊亮著燈，等我回家。看著酣睡的他，嬰兒般純潔的臉龐，後悔、自責、內疚，百感交雜。我淚如雨下。

 

「得到一刻開心過後 不開心

怎麼都不開心 誰責任」

 

誠實面對自己：我真的好壓抑，非常不開心。

明明五年前，已經知道眼前人，有嚴重潔癖，只能神交。當時還為著找到心靈伴侶，欣喜感恩。為甚麼現在卻這麼難受？他有人群恐懼症，不是新鮮事。不外出，窩在家看韓劇、日劇、美劇，也是拍拖呀。堅持自己的生活方式，不是他的錯。不願意繼續妥協，大概是我的責任吧?

 

「痛定思痛 未來 算吧」

由下載交友軟件開始，結束這段感情，應該是必然的結果。我承認我貪心。我不想面對感情的空窗期。我以為可以等到下一位Mr. Right出現，才悄然引退。而且，男朋友真的超級寵我。不過，這次雖然肉體出軌失敗，精神卻已經完全出軌。事已至此，這段關係，已經失去互信。我看不到將來。繼續留下，對男朋友也不公平。

 

「當你遲遲未改變 就讓我改變吧
這個決定多可怕」

 

故事至此，這段關係，再度劃上休止符。

相連故事: 流行曲故事：夠鐘

前一篇：流行曲故事：嫌棄

生活中的斷捨離

出門食早餐前，一哥淺笑著提醒：“貓貓呀，一陣麻煩妳，幫手攞d衫去洗丫。唔係，我聽日就冇衫著喇。”

貓頷首：“知道喇。”

回家打開衣櫃。一如所料，空空如也。

一哥的所有夏季衣物

一哥的生活方式，潛移物化，令傻貓對物件、人際關係，採取斷捨離。

以前逛街，看到喜歡的東西，貓會毫不猶豫買下。

“千金難買心頭好”嘛！

而且，工作得這麼辛苦，不就是為了讓自己生活得更舒服、更開心嗎？

一哥卻身體力行，以行動說明：生活、快樂，不需要和物質掛鈎。

他熱愛工作，上班是頭等大事。客人欣賞食物，臨走讚他兩句，往往令他樂上半天，回家馬上喜滋滋地分享。工作本身，就是快樂的泉源。

他不需要用物質，換取快樂。

閒時，傻貓愛碌手機，睇facebook, Instagram, 邊個朋友，有咩update, 去咗邊間餐廳食好西、去咗邊度旅行，即時一清二楚。

疫情關係，大家都只能患上"好想飛"症；限聚令，亦令大家失去欣賞美食的熱情、分享發掘到好餐廳的動力。

一哥卻不太喜歡update facebook和IG. 他認為: 朋友，係要見嘅。家人，有嘢想傾，唔會喺網上講。花大量時間，喺網上一年都見唔到幾次面嘅人身上，唔值得。有時間，不如做其他更有意義嘅嘢。

我們都要為自己的需要、渴求，排個優先次序，聚焦在最珍惜的人和事。

貓以前掛在嘴邊的是: "好攰呀。"、"好忙呀。"

每天都非常忙碌。可是，忙甚麼？又答不上來。時間，就在不知不覺間，流逝。

以前，傻貓是工作狂。一星期工作七天。學校放學，趕去上門補習。每晚11點幾才摸黑回家。學校工作，我永冇say no. 訓導cases, 多多都接。心中只祈求: 升職加薪，換取更理想的生活。同時，透過教導私補的名校生，獲取教學上的滿足感。

家，總是不夠大，景觀不夠好。

打開衣櫃，總是找不到想穿的衣服。逛街時，不自覺就買些新衣服回家。

不知道其他人，是不是也一樣?

喺一間港島區名校教書嘅舊同學話: "學生say good morning時，問我點解又著返上星期條裙。係咪冇錢買名牌?"

傻貓這才留意到: 佢嘅手袋、衣服、鞋子，都係名牌。

又有朋友訴苦: 升咗職，唔可以成日著cheap 嘢，怕下屬睇唔起。

做地產、保險代理嘅朋友，名錶、名牌銀包、靚手袋，似乎係必需品。

物質，用來反映人的社會地位，顯示佢哋有能力、買得起。

但這些真是必需品嗎? 

傻貓也認識不少春風化雨的朋友，外表就是一個大叔、師奶，但極受學生歡迎。他們對待學生，就像自己的親生仔女一樣。他們看重的不是學業成績，而是學生的品德、待人處事的態度。同樣，估計學生眼中的他們，不只是當日的衣著打扮，而是他們上課時講的某些生活小故事，一齊玩的遊戲。

另一個例子: 前度很喜歡購買健身器材、食品。他買得愈多，自我感覺愈良好。但其實他買入這些東西，真正原因是甚麼? 他想變得更健康。

這些器材、食品，只是輔助工具。他真正要改變的，是自己的生活方式、飲食習慣。

不過，買入後，他好像覺得目標已經達成，生活方式還是一成不變。

結果?可想而知。

由認識到分手，講足10年減肥，又陀足10年B的東尼

只有清楚自己內心真正渴望的想法，再專注逐步達成小目標，才能夠實現我們的終極目標。真正的斷捨離，不只是物質的割捨，還要學習停止浪費多餘的資金、精神、時間，在不重要的人、事、物上。

同場加映：

新居太細

斷捨離1部光波爐

（直徑、高度：13吋，可解凍/翻熱/焗/燒/烤）

$200

太重，自取

有意請留email address

（後記：已售）

買完又賣TSLA

 1星期冇update了。

好多嘢想寫: 投資心態、學習心態、新居浴室篇、買賣操作+思路。

不過，好忙。

簡單講講買賣TSLA嘅做法+想法先啦。

買賣操作: 

9月9日，買入咗TSLA @ $343.25

9月22日，沽出咗TSLA @ $422.8525

投資心態：

買入時，預咗會再跌10%-20%

以前，傻貓會覺得自己好笨，買乜都跌。

現在，我接納咗自己只係小小散戶，唔可能做到真正撈底。

不過，預期公司中短期業務不錯，股價就會反映真正價值。

所以，我冇再一炮過買入TSLA, 而係打算分2-3注買入，見佢急跌，就入少少咁。

但今次，買入後，就一直升。仲升咗成$100左右。 ($343-440)

咁傻貓就let it ride.

賣出前一日，大家仲等緊電池日，股價衝返上$440, 我好有衝動沽貨止賺。

我見到Elon出email叫員工取消休假的報導，但市場走弱，觀望氣氛濃厚。

Fb, Goog, MSFT, APPL 都跌唔少，只有TSLA暫時企穩。

傻貓決定先定止賺位。

9月22日，真係跌咗。我絕對唔會懷疑: TSLA係一間會改變世界的公司。

不過，我偏向先止賺，保留實力，再喺低位重新入貨。

檢討:

我明白巴菲特講：好股票應該長期持有。但作為小散戶，我唔想睇住隻股票，升完又跌，甚至跌破買入價，得個桔。

本金太少，做唔到期權short call.只能先take risk止賺。更加做唔到高位時short put,以荀價入場接貨。

而家take profit的舉動，比止蝕容易。冇乜心理負擔。

不過，入場易，離場不易，再入場更難。

要靜候再入場的時機，仲有承受股票在沽出後爆升(即係承認之前沽出的決定係錯嘅，令自己賺少咗)的心理壓力，又擔心日後要高追返。

以前買賣冇咁多考慮。現時考慮多咗，做決定時小心咗，期望投資回報，可以持續改善。

後記：

剛看到這篇文章，先儲起，稍後再細讀：

光環之下的暗斑：揭祕特斯拉中國的權力圍城|觀潮

發脾氣，值一萬? (從棄單事件，思考兩性相處之道)

買樓裝修，對唔少人嚟講，都係人生大事。

一諗到間屋係自己嘅，裝修完，靚唔靚都要對足三五七年，大家就不期然會好肉緊。

呢單case,傻貓睇到眼都凸。不過，就令我反思兩性關係嘅相處之道。

 

話說樓主訂咗5道門。

佢一開口，就話人哋係黑店：店家未收錢，就乜都得。收咗錢，態度就開始差。

佢仲埋怨:    店家唔覆佢訊息、遲交貨但冇講交貨日期。

(男仔追你，當然你話乜就乜。

追到了，時間長咗，熱情減退。

佢都有自己嘅工作、朋友、嗜好，你唔可能係佢生命嘅全部。

你仲埋怨: "你點解要瞓覺、點解要做嘢、點解要見朋友、點解要打機。你幾時同我去街？"

表達意願，可以。不過，要睇時機、環境。自己的表達方式、語氣、表情、身體語言，都好重要。)

為咗證明佢冇作大，仲擷取咗WhatsApp對話貼圖。

買門，通常度尺嘅師傅，要負責埋安裝。

度錯尺寸，度門就裝唔到。

店家一早講咗，樓主唔好預計店家負責安裝。

不過樓主就因為咁，嬲嬲豬。

樓主覺得好受氣、好嬲。

咁正常嘅。做客嘅，當然希望得到最好嘅產品、服務。$18000 買5道門，唔係細數目。

但老實講，就算店家態度差，要等客人追問，先肯講交貨日期。咁又點呢?  

 $1萬蚊訂金，已經畀咗。人哋話遲3日送貨。如果係我，我會安靜地等。

(男朋友超冷淡，要等你催婚，佢先肯勉強應承。你已經同佢一齊好多年，青春已經冇乜剩。人哋畀個具體註冊日期你，你唔通唔等?)

單睇對話，真心唔覺店家串咀。

反而樓主一時意氣撻訂，又要再等，唔見得係最好選擇。

其他網友嘅留言，亦非常一面倒，建議樓主等多2日，即係店家承諾的送貨日期，收貨。

樓主卻堅持己見，認為已經因為呢5隻門，拖慢成個裝修進度，決定棄單。

(蝕$5萬訂金事小，但搵過另一間，重頭經歷挑選店舖及產品、度尺、製作、物流、安裝嘅過程，真係好咩?

同樣，一齊咗咁耐，搵過另一個男朋友，重新認識、了解，真係會好過繼續經營呢段關係?)

有心水清嘅網友，提出呢個觀點:

店家話要等一個月左右，才送貨。而家真係等咗一個月，咁點算遲？

樓主嘅答案幾有趣。

不過樓主就係唔等喎。佢認為對方要佢哋唸咒語 (要脅棄單)，先肯畀個送貨日期。好冇誠意。又唔相信店家會如期送貨，決定棄單，委託另一間店舖。

(你三番四次，用分手迫婚。對方真係應承你，畀埋婚期你。你又嫌人哋要你迫先肯結婚。又唔信人哋真係會出現喺教堂，決定悔婚，搵另一個男仔去date. )

同時，有網友指出樓主太串，搞到冇彎轉。

傻貓係現實主義者，所以堅睇唔明樓主嘅邏輯。首先，佢自認唔止一次話要棄單，甚至認為呢句咒語好有效，可以成功得到店家嘅回應。

(有d人，send完訊息，鍾意望實部機，等心上人回應。見到得單剔，死等。雙剔，已讀不回，好傷心。於是，不惜一切咁講講講，期望對方回應。不過，成功等到對方應機，係咪代表你哋關係好咗?

你想對方應機，還是想得到對方嘅關心？)

估唔到呢個post, 成功引到店家，特意申請入谷，正面回應: 

睇到店家嘅回應，冇人再話店家係黑店。 

原來樓主自己落單後，發覺畀錯尺寸，改過單。後來又加大門門線。

到公審店家當日，樓主都仲想改尺寸。

(感情穩定之後，發覺對方唔夠高、富、帥，又冇乜上進心，淨係識礙模型、打機，又諗住一齊之後，可以慢慢用愛去改變對方。

到周街唱衰對方當日，仲想改變對方。

🤣題外話:

我阿媽真係問我:

"點解由得一哥染金毛、食煙、賭錢?

應該要佢改呀～ 佢錫你，真係鍾意你，就會為你改變。"

貓回應:

"媽咪，我愛妳，好愛好愛妳呀～

但我唔鍾意你染黑d頭髮，唔夠自然喔～

你睇粵劇又好嘈，不如陪我學德文啦～"

佢一句車埋嚟:

"我鍾意呀～"

貓答: "係咯～妳鍾意咪得咯，一哥鍾意咪又得咯～得咗")

傻貓睇到店家嘅回應，都明白樓主點解咁嬲。店家實在太坦白了。

對待客人，最重要係完成交易，貨銀兩訖。

面對躁底客人，安撫情緒，澄清事實，一樣重要。

不過，真係只講事實就夠了。

佢係客人，唔係你個仔。你教佢做人道理，佢唔會多謝你喔。

因為，你做多咗。

（面對躁底嘅另一半，你講道理？冇用！　

畀佢冷靜吓，先反映佢嘅情緒，畀佢知道，你明白佢嘅感受。

然後，就事實，重點講建議，或者決定。

解決到件事，就可以喇。）

幸運的是: 樓主嘅老公，好支持太太。一直以來，係老公直接聯絡店家。後來，太太發脾氣，踩上舖頭嘈。傾唔掂數，太太就公審店家。

樓主老公，同樓主一樣，認為店家答 "應該可以"如期送貨，唔夠肯定。所以支持樓主棄單。

（你問幾時結婚，會唔會愛你一世？

唔好玩啦！都話愛咯。

會唔會鍾意第二個？唔會呀。

你唔鍾意呢個答案？覺得唔夠肯定？

咁分手啦。）

過份坦白，結果係: 觀感唔好。其他網友，唔支持樓主。但都覺得店家態度唔好。

最後，店家雖然多次回應樓主的問題，樓主仍然堅持棄單、找另一間公司。

最後，佢成功以一萬蚊嘅代價，棄單。

既然已經決定委託另一間公司，就當一切重新開始啦。

呢單case, 雙輸。

（你要我改，我應承咗你改呀。

你打畀我，我有應機呀。

你係都要走。咁你走啦。你嘅青春時間感情，付出嘅種種，一筆鈎銷。

走咗，就唔好怨，唔好難過。

向前走，唔好望返轉頭。）

傻貓買樓記：申請煤氣錶？

 裝修進度不似預期。

一哥由之前乜都唔理，到而家乜都想理。但佢工時長，想理又理唔到，好躁底。

佢昨晚望住廚房，勁發呆。

然後問貓好多問題，貓唔識答，只好叫佢直接問電工陳生、裝修嘢就搵江師傅。

佢不斷重複：“你叫我自己搵佢哋，我咪自己搵咯！”

嗯，唔知咩事，勢色唔對，貓躲去玩德文、睇書。

成個鐘後，貓沖完涼，佢仲喺廳拎住手機碌嚟碌去。一問先知，佢仲未搵到陳生的聯絡。

（係貓唔好，習慣用英文輸入聯絡人。一哥唔識英文，雖然之前畀咗幾次聯絡佢，但佢根本睇唔明，難怪佢搵唔到。

諗落幾得意：

貓教英文，一哥唔識英文；

一哥做廚，貓連公仔麵都煮得唔好食。）

幾秒鐘，貓用佢嘅WhatsApp對話記錄，search到佢手機嘅電工資料。陳生都好好，秒回。

原來廚房冇留位，做電掣，插雪櫃、洗衣機。陳生答應明天嚟處理。

另外，一哥聯絡裝修判頭。煤氣錶、喉管，現時放在預計洗衣機位背後，必須改位。

（之前江師傅話，廚櫃點設計都可以，我冇預計呢個係問題。

廚房一直擺滿裝修用品，貓唔敢行入去，冇見過個煤氣錶。）

今早早餐時，一哥話，諗住貓都買過幾層樓，裝修過咁多次，冇諗過今次咁多甩漏。

貓都老實認衰。之前買樓自住，次次經驗唔同。一手居屋、二手居屋，唔會郁佢結構性嘅水喉、煤氣喉。

拆晒間村屋嚟重建，用石油氣，唔駛駁煤氣。

之後太子嗰2層，全爆，但用電磁爐。

咁我又點知道，而家用煤氣煮食爐，要安排咁多嘢？

1. 預約師傅，嚟睇位、報價

2. 啱價，去煤氣門市，畀現金

3. 煤氣公司嘅師傅，嚟改煤氣喉、煤氣錶位

4. 等安裝好爐具，再約師傅，嚟接駁煤氣喉、爐具

剛約咗明天早上，煤氣公司嚟睇位，希望趕得切，星期一安裝廚櫃前，完成安裝煤氣錶工程。

----------------------------------------------------------

後記:

煤氣公司職員，嚟睇位後，初步報價$13000。我話好貴，剛買完樓，冇晒錢。佢話計便宜些。

一哥唔肯等。當日下午，已買雙頭電磁電陶爐回家。我們用批發價，由相熟公司購入，$1500左右，香港製造。

第二日，我打上煤氣公司問價: $7840, 換全屋煤氣喉、搭棚。

如果唔要煤氣，$1180, 專人上門拆喉、拆煤氣錶。

我搵江師傅，派人拆咗煤氣錶，關上煤氣喉開關，免費。

兩日後，煤氣公司，派人嚟收返個煤氣錶，塞好煤氣喉嘅排氣位，免費。

-----------------------------------------------------------

對貓來說，每次買樓，都係獨特嘅經驗。

由揀樓到裝修，有d嘢可能差唔多，但身邊人唔同，要彼此得到共識，都唔容易。

要完成一個大project, 能夠加深彼此了解，而又唔影響雙方感情，係一門藝術。

一哥月供 (第8期)

日期	總數量	平均買入價	股價	盈富總價值	股息
9/13/2020	460	HK$25.14	25.26	HK$11,619.60	HK$20.79
日期	總數量	平均買入價	股價	友邦總價值	股息
9/13/2020	157	HK$74.88	80.35	HK$12,614.95	HK$74.64

 

2020 Fu's Financial Portfolio （月供盈富、友邦）
盈富						友邦
	數量	股價	月供金額				數量	股價	月供金額
Feb-20	53	HK$1,500	HK$1,500			Feb-20	18	HK$1,500	HK$1,500
Mar-20	57		HK$1,500			Mar-20	20		HK$1,500
Apr-20	60		HK$1,500			Apr-20	21		HK$1,492
May-20	61		HK$1,500			May-20	21		HK$1,447
Jun-15	58		HK$1,466			Jun-15	20		HK$1,463
Jul-13	55	HK$27	HK$1,460			Jul-13	19	HK$76	HK$1,438
Aug-11	57	HK$26	HK$1,458			Aug-11	20	HK$73	HK$1,452
Sept 11	59	HK$25	HK$1,483			Sept 11	18	HK$81	HK$1,452
總計	460		HK$11,867			總計	157		HK$11,744

一哥最近錢銀鬆動咗，開始玩返牛熊證。👉👈

我留意到: 佢賭嘅銀碼，唔再係幾千，而係萬萬聲。😨

講好咗，層樓前期資金係我畀嘅，買樓首期、裝修、電器，都係我負責。

佢只係負責供樓。

我哋財政獨立，自己賺嘅錢，自己分配。

不過，見佢愈賭愈大，傻貓擔心之餘，潛藏嘅賭性亦誘發返出嚟。💩

前日，星期五，下午搭車返大埔探媽咪，見佢拎住手機，金精火眼。👀

貓探頭看看，原來在落沽盤😥，止蝕隻恒指熊🐻。

（佢怪我呀😣。

佢話我無啦啦伸個頭過嚟，佢窒咗一窒，遲咗幾分鐘，蝕多咗幾格，即係幾千蚊呀！

喂喂，我個貓頭😺，並不構成任何投資建議咯。好唔好？）

咁我望吓個市，走勢唔差，好似暫時跌唔落。就順手買咗隻牛。🐂

一哥知道後，嬲咗一陣😠。佢話: 星期五，通常唔會持貨過夜。

佢唔係睇好股市，先走咗隻熊。只係唔想星期一就被劏。

臨收市前一個鐘，牛熊證都會通通跌、跌、跌。😲

因為大家都唔敢hold貨過夜。

貓唔明白，佢嬲咩呢?😕

佢睇錯市，放假唔hea, 輸咗幾千蚊，心情唔好，我明白喔。

不過，出去玩、飲飲食食，都一樣要駛錢。咁佢用幾千蚊，得到刺激、開心，咪ok 咯。

好多男人，玩模型、音響、車、女人，用嘅錢仲多啦。

每個人都有自己的消費模式、快樂模式。

我已經大半年冇玩牛熊證啦。今次都冇十幾萬咁玩。

(呢一刻，冇咁多錢玩。)

佢自己蝕就ok, 我蝕就鬧。佢覺得唔啱嘅，應該以身作則呀。

如果佢覺得自己玩冇問題，咁憑咩鬧我?😏

上次去柬埔寨旅行，我畀晒去旅行嘅錢佢，佢攞咗去買牛熊證，蝕晒。

仲要飛嗰日朝早，先講我知。

當時，我嬲咗一陣😠，諗住取消行程。

轉念一想，搏一搏，買咗隻牛熊證。

贏咗😃，我哋先有錢、有心情，出發去機場，繼續行程。

最近裝修，手緊到不得了。我先買隻槓桿74倍嘅牛仔，試吓運氣。

佢 so far 畀咗2萬蚊我，但裝修工程，已經$34000. 駁電又$14500. 

後期仲加呢樣嗰樣，又蚊網，又浴屏，厨房鋪地磚、换窗、浴室補牆磚，樣樣都係錢呀。

鬧鬧鬧，係勁嘅，不如直接過多幾萬蚊嚟，搞掂筆裝修費，買埋傢俬、電器丫。😒

(咦，係喎。我今次買牛仔嘅錢，係一哥畀嘅。佢話津貼吓d 裝修費。

咁唔怪得我仲有錢玩，又難怪佢咁嬲......😅)

後記：

升咗，割禾青，走咗。🏃

今次好彩，下次唔知。😐

唔駛蝕，賺幾千，執到啦！🤓

不過下次買賣，唔講畀一哥聽lu. 🤐

費事畀佢鬧。🙄佢雙重標準，唔好玩嘅。

同埋，都係一步一步，買優質股，儲吓好d.😜

火中取栗，刺激但分分鐘引火自焚。👩‍🏫