Tuesday, April 13, 2021

中醫話我有孕期濕疹

有BB後,身體不斷出現好多紅色粒粒。搽咗寶膚靈就唔痕,但無阻佢哋繼續在不同部位湧現。開始時,只限手背、腳背,然後漫延至小腿,近日連肚皮、頸、背、胸、面都有。

之前睇開嘅中醫,回港日期不斷推遲。我忍咗4個月,由唔敢搽藥膏,到薄搽寶膚靈;由堅持死等張醫師,到打聽邊度有好中醫。終於,我去咗仁愛堂嘅流動中醫診療車。


上次在大圍代課,咳咗3個月,食咳藥水、戒口、飲鱷魚肉湯,都冇效。最後,同事提議我去學校對面嘅仁愛堂流動中醫車,食咗3日藥,就好了。希望今次都係,快d好返,唔好再周身痕,半夜痕醒。

中醫用咗15分鐘問診,結論係孕期濕疹,我脾胃肺都虛弱,加上體質變化,平時寒底嘅我,竟然有濕熱。一日肚瀉幾次。佢開咗d溫和嘅5日藥,睇吓點先。佢哋用沖劑,85度滾水沖完,等3分鐘,飲得。唔駛煲,一哥可以放心,我唔會再燒爛個煲,返屋企開門,唔會好似上次咁,成股黑煙撲埋嚟。


義診,免診金,但藥費共$250. 

濕疹,唔會傳染。但係好多嘢要戒口:

蔥、蒜、洋蔥、所有水果、海鮮、蕃茄、鴨、芋頭、生冷食物及飲品、太鹹太辣太酸的食物、茄子

食菜就只可食菜心,簡單白灼後,即時撈起,加一片薑,炒

佢提醒:寶膚靈可能有類固醇成份,唔可以搽太密太多,以免影響BB.

以前個老爺,見我婚前皮膚差,腸胃炎嚴重到食咩嘔咩,就用柴火,煲金銀花、益母草,畀我飲用、沖涼。沖完,個身嘅火辣辣感覺真係退咗,痕少幾個鐘。

而家,孕婦唔可以用益母草,太寒涼。金銀花,我唔識煲,亦怕煩。只好用彩豐行嘅蔗糖淋浴露,有時用Johnson's嘅溫和親膚淋浴露,沖完涼就搭lotion, 盡量保持皮膚濕潤,減少痕癢感覺。

3 comments:

  1. 師姐保重,加油呀!💪💪💪😊

    ReplyDelete
  2. 消失了早前濕疹的告白,時間總可以治愈一切,保重x2。¨3¨

    ReplyDelete