Wednesday, April 28, 2021

搞掂濕疹,又到夜尿、便秘


這幾晚,根本就睡不了。

樓上唔知邊層樓,冷氣機滴水。好不容易睡著,pat pat又痛到我醒過來。有時起身夜尿,有時餓醒,有時痛醒。
總之,冇覺好瞓。

之前濕疹,痕醒。睇仁愛堂嘅流動醫車,醫師畀嘅藥都好work. 皮膚冇再痕,那些紅點,慢慢褪色、甩焦。
連續兩星期,醫師都叮囑: 唔好食煎、炸、辣。戒生冷食物、戒水果、蔬菜。如果食菜,只可以食菜心,仲要滾水烚完,用薑快炒。我唔識煮,索性連菜都唔食。

星期一,睇返廣華醫院嘅中醫師。佢終於由內地返嚟喇。
食咗佢開嘅藥,我經常有便意。中藥要飯後服。一哥一向夜收工,我哋 10 點左右食完晚飯,返屋企沖藥食。食完藥,20分鐘左右,已有便意。去完厠所,諗住沖涼瞓覺。瞓前,又有便意。睡了個幾鐘,又要去厠所。然後,斷斷續續,去咗3個幾鐘去厠所。
再然後,屁股像火燒一樣。

昨天開始,無論坐、企、行,都超痛。內褲、面褲,都濕晒,仲有血絲。
一哥昨天休息,建議我用衛生巾。
不夠個幾鐘,條巾已經濕到滴血水。
今日補習5 個鐘,又係咁,不斷要換巾。而且,灼熱疼痛感覺,變本加厲。我坐著,就不想站。站著,就不想坐。就算稍為移位,已經痛到喊。上課時,我只能叫學生,自己去影印機拿練習、筆記。今日,甚至沒有下課後,出店外和家長交代學生的學習進度、上課情況。

如果可以,我寧願趴在床上,一動不動。
我不知道,為甚麼妹妹懷柏霖、珮琳時,還能天天頂著大肚子上班,追數。
我不敢想,解決這次毛病後,下一個難題又會是甚麼。

懷孕,對42歲的傻貓,本來就不是易事。
可是,我沒想過懷胎已經這麼辛苦。最近天天在哭,但告訴一哥,他總是憂心忡忡,怕我產前抑鬱,又叫我想法要正面。
道理我都懂,但我真的好痛、好辛苦。

本來,約了Rebecca這星期五行山,她提議行龍門郊遊徑,說是輕鬆易行的路線,我超級期待。
今日,實在疼得不行。我無奈通知她,這星期的行山活動,要取消了。
行山,是傻貓最喜歡的活動。現在,痛得連山都行唔到,我開始討厭還未出世的BB了。

之前有咗冇耐,就開始暈車浪。跟住,肚愈來愈大,腰背痛舊患復發。然後,從來冇濕疹嘅我,成腳都係濕疹,連背脊、乳房、頸,都有。現在到夜尿、便秘。


他/她,究竟要折磨我到幾時? 他/她,是不是很討厭我? 
他/她,出世後,會為我帶來的煩惱,大概不會比現在少。
我真的可以做一個好媽媽嗎? 我有資格嗎?

好痛,眼淚又不爭氣不斷掉下。
以前是好恨有BB, 現在,我開始憎恨他/她了。

19 comments:

  1. 覺得師姐這情況,應看專業婦科西醫,較為進取做法,始終中醫師調理身體藥性較溫和及緩慢,或許將這情況請教有經驗人仕(也可跟妹妹商量),方為上策,要不然無抑鬱,都變多一個抑鬱病症,治亂世用重典,治婦女多元化濕疹症及其它,相信也不例外,香港有很多優秀醫生人材,使乜驚呀,大前題自己也要改變思維,看西醫的重重顧忌想法,理財或許閣下心思細密,但身體的毛病,還是留待醫療專業團隊把關,Take care 奷爸爹!:)

    ReplyDelete
    Replies
    1. 我覺得中西醫係要配合用
      簡單D頂得住就靠中醫磨, 頂唔住就搵西醫即時止咳
      一旦被病痛不適影響心理狀況, 乜都補唔返

      --Dogdogchi

      Delete
    2. 今日一口氣,睇晒中醫、西醫了。

      Delete
  2. 會唔會考慮用成人紙尿褲,吸索力較強,減低滲漏和更換頻密情況。

    濕疹,之前買樓也發作過,說:"從來冇濕疹"是否有出入。身體有病反映現時受者生活習慣或/和情緒需要調整,它是給我們的警號。

    是誰選擇不吃菜?不吃高纖食物有便秘是必然的事。

    你丈夫曾勸過停止工作,妳有沒有接受?當身體不適仍繼續工作,可能又覺得自己沒有達成平時要求,又多重壓力。暫停工作好處是夜間睡得不好,日間可回補休息。

    你訴說曾經在與前夫分開後患抑鬱,現在是否要迫到自己重覆發生情緒失控到冇能為力地步?

    從BB的角度:

    他/她有沒有自主權來入胎?

    "好恨"有BB,上天聽到應許了,當時的反應妳記得嗎?

    他/她有沒有能力反抗母親一次又一次想殺害的念頭?想放棄他/她的原因妳記得嗎?

    導致種種事情發生的人是誰?

    妳會考慮放低工作嗎?情緒崩潰要算有多少層物業,有多少錢還有用嗎?

    在家中安心休息,有興趣靜下來坐正,閉目放鬆。留意呼吸,從頭到腳心中告訴自己將頭 頸 肩 手 胸 下腹 大腿 腳全身放鬆,用意念放鬆各個內臟。腹式細慢長地數呼吸。這些可能妳都知,會執行試試嗎?

    可考慮經常對BB說:

    對不起

    原諒我

    感謝你/妳

    我愛你/妳



    ReplyDelete
    Replies
    1. 之前買樓時,只是手部生粒粒。未至於痕到瞓唔到,成腳成手連背部、頸都有。
      當時冇睇醫生,搽寶膚靈就ok了。今次睇中醫,話係濕疹。
      會聽師姐妳講,試著放鬆,練習腹式呼吸減壓。
      謝謝妳。

      Delete
  3. 即使準媽媽不是高齡,也都會面對到你面對的問題。
    其實你宜家既問題都系好小事,但可能因為怀孕令到自己諗太多野。
    晚餐其實你可以食先,唔需要一定等老公先食,早食早消化會健康D.
    有時飲完中藥會不停去TOILET,你下次同醫生講,醫生會調節返的。
    便秘問題可以TRY下食其他品牌的補充劑,可能會有改善。

    唔好怪BB啊,唔系因為佢唔乖媽媽先辛苦架,人人唔同反應,同一個媽媽每胎都唔同反應。
    最重要的是,諗下坐月點補下身體好過,買定補品俾自己,唔好淨系掛住買BB野。

    ReplyDelete
    Replies
    1. 多謝妳嘅建議
      我第一胎,乜都唔識,所以乜都驚,乜都擔心
      有時冷靜下來,都會覺得自己太緊張
      今日見中醫、西醫,都係叫我放鬆
      藥物本身只係輔助,個人心態更重要

      坐月、補品,好貴,我冇諗過
      只想快d生完,返去補習
      或者遲d先考慮吧?🤔

      Delete
  4. https://www.mombaby.com.tw/articles/16350
    An article for your refernce. Stop working, go to the doctor and have a check.
    By the way, I don't think any fetus may hate / love its mother, but it's the mother who could.

    ReplyDelete
    Replies
    1. Checked
      The baby is healthy with strong heartbeats
      U r right
      I shouldn't have blamed the innocent fetus
      Probably my lifestyle and negative thoughts are the culprit

      Delete
  5. 辛苦媽媽了!懷胎10月真的不易,加油!

    ReplyDelete
    Replies
    1. 妳要教養2位小公主,又忙工作,且兼任賢內助,才真的不容易👍
      佩服👍👍

      Delete
  6. 我的同事懷孕時有做孕婦瑜珈,做完後,人比較放鬆同瞓得好,你可以考慮一下😊

    ReplyDelete
    Replies
    1. 我忽然諗起係疫情期間,上孕婦瑜珈未必係好建議,始終室內上堂都有風險。我同事之前懷孕係未有COVID 19

      Delete
    2. 我今日有在YouTube, 跟Coffee做孕婦瑜伽操
      不過身體狀況,仍未容許
      希望遲些可以完整地做完

      Delete
    3. 加油💪 慢慢做,做唔到就做唔到,唔好逼自己~
      呢兩個月,我幾乎每日午餐時間都做瑜珈,每次做完,身體都覺得好輕鬆,再沖個涼,晏晝反而覺得精神咗

      Delete