2023 Jan 股票交易記錄

 今年2023年，不再碰期權了。之前做落嘅，只剩4張騰訊short call, 9月到期，會找機會平倉。

回歸正股懷抱，1 月份，只做了少量交易。
普通散戶，本來就不應該頻繁交易。交易次數一多，出錯機會就增加。

沽出部份正股

1月只沽出 1830 完美醫療。
大家憧憬中港通關，零售股、地產股、美容業會回暖。但股市從來都係炒預期。大家想像得咁美好，只有現實稍有落差，股價就回軟。傻貓比較悲觀，消費習慣不可能一下子改變。就像大家習慣淘寶，不可能突然重拾逛街的熱情。所以先行沽出獲利。微賺 $1685.12

2007 碧桂園，原本買嚟收息。但房地產跌跌不休，見佢反彈，就沽走佢。$6.383買入，$3.09沽出。蝕 $32993.63

9618 京東集團，騰訊派嘅71股碎股，之前冇賣，而家見佢反彈，就 $250.6 沽出 1 手 50 股，賺 $12491.93

TSLA, 上個月 Dec 22 買入15股 Tesla $129.22,  Jan 18 沽出 10 股 $136.5, Jan 25 沽 5股 $145, 扣除手續費 $0.32, $0.4, $0.36, 賺 USD $150.62

Tesla 的反彈力度好強，實屬意料之外。之前的short put $170, 早已平倉。扣除手續費，平手離場。

2023 年，重新月供股票、零存整付，慢慢儲吓錢、股票。
嚟緊會有細B, 我要腳踏實地，好好工作，穩健小心理財，希望大B細B, 都可以有較好的教育機會、生活環境。

現時我們做雙租族，有樓收租，又租人哋地方住。
但物業3，地方太細，只有2房。我們一家4口，連同工人姐姐，不可能搬回去。而且單幢樓，沒有會所，也不利小朋友社交發展。樓下馬路，小朋友如果走出去，會有危險。
未來方向: 儲錢換樓。等3年禁售期滿，翻新沽出換3房單位。

我和一哥年紀大，如果有甚麼意外，濼言和細B, 就連屋企都冇。為咗佢哋可以專注自己的興趣、學業，到時，新物業3只能做低成數按揭。而且我的保險金，要足夠他們好好生活。現時的儲蓄保險、人壽醫療危疾，雖然財政負擔甚重，2月又要交 USD $7284.08，還是咬咬牙，堅持一下吧。

期權交貨

自己財商低，之前股市低位，睇唔到希望，開咗一堆short call. 
而家陸續交貨畀人，資產大縮水。

今個月交咗1手 2800 盈富基金。蝕 $4395

領展供股

2月還要預備一筆資金，為領展供股。現時持有5000股領展，即使7折市價供股，金額仍然不少。對傻貓來說，既要交保險費，又要供股，而且媽咪借我的15萬港元，即將到期，實在非常吃力。

買入領展，本來就為了收息。現時供股，要掏荷包，嘔返之前收的股息，肉赤。

經過一年不斷虧錢，戶口現時只剩169萬。
要東山再起，恐怕並不容易。
不過，慢慢來吧。

2022 Dec 股票交易記錄及反思

 由於 2022年12月，仍然被期權牽著鼻子走，好多正股，都用蝕本價，拱手讓人，完美地錯過了港股爆升的機會。

沒法子，自己好好記著這個慘烈的教訓，以後逐步累積優質資產。

回顧12月，因期權被short call 走了 1299 友邦 ($70), 388 港交所 ($280), 700 騰訊 ($260)
事後回看，當然知道自己在港股低位時，開short call, 是愚笨的做法。
可是，當時投資氣氛低氣壓，大家都覺得港股冇運行，完全見唔到𥌓光。
既然自己有貨喺手，就開short call, 當賺吓零頭咁。
但當正股反彈時，自己就只好蝕讓。

而且，原來我唔齊 700 的正股，搞到要在市場高價買入，低價 short call 畀人。
其實自己主動平倉就好。冇咁麻煩。

反而，Tesla 喺12月，股價低迷，我慢慢低價吸納，暫時回報相當不錯。
最笨是 USD $111.88買的20 股，在 $117.985, 就沽出了。
當時的想法: Tesla 被人唾棄，很多人期權被call loan, 股價腰斬，可能仲有得跌。

Tesla 開始大跌時，由於有 1 張 short put $240, 即使市價只係 $173, 我都要高價接貨。
由於我運用期權不當，不斷高買低賣，又用比市價高的價錢，買入股票，以後必定引以為戒，遠離期權。

另外，這個月，我開始嘗試，擠牙膏般，分段買入，愈跌愈買。這樣心理壓力較細，正股也拿得較穩。
現在Tesla 已經極速反彈。早兩天，已回升至 USD $198了。

濼言有細佬/妹了

驚魂甫定後，今日的起心肝，去診所驗孕。
Positive.

醫生寫咗紙，原來北區醫院、那打素，都冇婦產科。要去威爾斯。

高齡產婦，特別多嘢檢驗。
嚟緊搭嚟搭去，應該都好忙。

第二胎，好多嘢都有心理準備。
雖然要考慮、預備嘅仲有唔少，但係我應該處理到嘅。

以後即使我哋兩公婆，年紀大，同濼言有代溝，佢都仲可以有個細佬/細妹，有商有量。如果好似我妹妹咁，同我互相扶持，都唔錯丫。

從呢兩個月，BB嘅表現，我估計係女。暫時諗咗兩個名。
等照埋超聲波，同埋佢嘅反應，再決定。

生活上，現時不會有太大變動。
細B未出世，我會爭取時間，同濼言相處。
以後佢要做哥哥，即使唔需要佢做好榜樣，都想兩個小朋友，有教養、具同理心，識為人設想，有基本自理能力、語言能力、社交技巧。

很多嬰幼兒物資，不合用的，早已free出，或變賣換錢。
現在起，要留起濼言用過的衣物、玩具、書本，給小小寶貝。

之前唔捨得買DWE, 只係買咗巧虎。嚟緊會儲錢買，兩個小朋友睇，抵丫。
肚未太大前，會先一家三口去旅行。我好想有段親子時光，只係濼言同爸爸媽媽。
會再同濼言影多輯戶外寫真。佢而家識行識走，好可愛。
整本早教書，預備多少少親子互動嘅遊戲、小手工，希望濼言記得媽咪同佢嘅開心時光。

2023兔年：細B?

 

睇返舊文，2021年2月1日，知道有濼言。

我好似有咗

而家，2023年1月28日，知道有細B.

知有濼言時，我好開心㗎。雖然都好多憂慮。

而家只有好多問號。

驗完到而家呢分鐘，都唔知可以點。

冇開心嘅感覺，只係好擔心。

我冇預計呢個，我唔知自己搞唔搞得掂。

當初睇年半中醫，努力調理身體，才有濼言。

又話我子宮寒、年紀大，難受孕？

細B係點嚟㗎？？

我哋呢幾個月，1個月先行埋1次。點解會中？

原本預備畀濼言，讀貴價playgroups,代替N班。佢可以學到嘢，又唔駛全日喺學校，學規矩。

我想佢開心成長，想佢唔駛畀咁多嘢侷限。學咁多規矩，盞綁手綁腳。

讀國際學校要錢，我計過，負擔到。想揀大埔墟挪威國際，或者九龍塘York. 

而家係咪要2個小朋友，讀返券校？😭😭😭

媽咪年紀大，妹妹返返工。邊個得閒湊細B?

請工人，又係額外駛費。

我補習，收入唔穩定，期權騰訊SC條數，仲差$415*400

=$166000

呢刻仲係負數。
當然，如果唔打算接貨，齋平倉，只係蝕$30000幾蚊。

我畀首期買嘅葵涌單位，得372呎，for 1家3口。

得2房，邊有位畀細B和工人?

我年紀大，44喇。生出嚟，唔知健唔健康。

如果好似濼言咁，個個月出入醫院，我乜都唔駛做喇😔

而家1月尾，呢個又係細B. 幼稚園通常揀大B. 到時有咩學校肯收佢？

濼言仲係BB. 16個月咋。剛學叫爸爸媽媽。

佢同細B相處到嗎？家裡2個小朋友，老公工時長，我自己搞得掂嗎？教得到嗎？

投機失敗後的反思

傻貓看投資

投資冇章法，就會被收割。
這世界從來就沒有穩定必贏的投資。
盡快找到自己的投資風格，並專注於此，才能改進投資成績。

投資，如果較少心理負擔，成功機會較大。
賭徒方法既然不成功，就應該腳踏實地學習投資。
以後乖乖買返正股就好。

欲速則不達

宏觀經濟，只能提供投資方向，但是投資的完整邏輯，需要時間慢慢學習、建立。
有沒有更快更有效的學習投資途徑? 其實，投資和語文一樣，都要浸淫。
想少走冤枉路，就要多閱讀。
看書，要選對書，認真思考、吸收，靈活運用，才能改善自己的投資成績。
每個月要閱讀2至4本投資書籍。閱讀比看YouTube快。
狂睇止凡或麥加文的videos,都可以。
現在每隔一天，聽一集止凡的Patreon, 看他的舊文，慢慢改善急躁的性格，學費平和、理性。待人處事、投資，都有得著。

實戰累積成功經驗

投資易學難精。透過實戰，才能累積經驗，提高財商。
投資，貴乎行動。齋諗唔做，冇用。
之前應止賺就乖乖止賺，但要止蝕就冇行動，輸身家。
因為認輸太痛了，即時實現的虧損，無論多少，都是負數。
於是，總是妄想，有天股價會朝自己的預設方向走，或者某天可以恢復失地。
可是，事與願違的情況居多。

遲疑不決的主因，通常是銀碼太大，為自己帶來壓力。
如果事前做足功課，對自己的投資決定有信心，並且分幾注投資，就比較容易採取行動。
既然自己不是一個稱的賭徒，就別裝逼了。

最重要: 要有自知之明，投資技不如人，切勿借孖展。
成功的投資者，跌市時都有充足的持貨能力，才能讓資產增值。

月供股票

投資個股，揀中、買中、坐得定、賣得出、賺到錢，其實不容易。
月供指數基金，比較簡單。
如果明知自己無法跑贏大盤，就用這種懶人投資法吧。

投資須嚴守紀律，不可能贏就袋錢，輸就放手不管。
技術分析、短炒，都要很高技術。

買入股票前，應該仔細研究基本面。
想清楚買入的目的。

期權

Short put, 之前以為可以用折扣價，購入心儀股票，好抵買。
可是，如果長線睇好該股票，該股票股價不斷攀升，甚至以倍數計，當初的折扣價，就變得微不足道。而且，由於沒跌至你的行駛價，你一直未能接貨，個股的升幅，與你無關。

如果想創造現金流，日後個股的股價，好像Tesla般，斷崖式下跌，你就要預備大量現金接貨。
用孖展，開多了幾張，承受能力變弱，股價暴跌時，自己的持貨能力大幅下降，只能舉白旗離場。日後股價回復升軌，亦與你無關。

2022 投資成績表：賭徒性格導致血流成河

性格決定命運。

過去幾年，由牛熊證虧大錢，到努力工作，買幾層樓收租。

然後，學用期權，但財商欠佳，能力不逮，虧損幾十萬。

這種賭徒性格，注定死路一條。

止凡、匯君說得對。你想一輩子這樣，糊裡糊塗，敗光積蓄，還是痛下決心，努力學習，改變自己？

今日的傻貓，賺錢能力還可。只是留給濼言讀書、自己和一哥的退休儲備，都用光了，要重新來過。

傻貓沒有穩定的工作、收入。

幸好工作能力還算可以，過去1年，已入金44萬幾。最近瘋狂工作，3個月內，應可再還40萬，還清所有債務。

妹妹很好，見我工作忙碌得天昏地暗，主動借20萬給我，不收任何利息，可以半年後才還款。

傻貓心知，這是她過去幾個月，重回職場，所得的大部分收入。

不過，我想自己認真面對胡亂投機的惡果。她的好意，心領了。

上星期五，代完一間band 3中學。今早面試，基本上即時就談攏了。2月中至3月，再代課。另外還有幾間學校，都請我去幫忙。要工作，隨時都可以。小學、中學；Band 1 至 3；新界北、新界西、九龍塘、港島、何文田，都有。只要保姆、媽咪，肯照顧濼言，我就可以出去工作。

補習社，近日增加好些新生。這裡偏僻得很，平時walk in學生極少，都是家長、同學轉介為主。這些新生，大概是回應我內心強烈的渴求，而出現幫忙。

最近收到好幾位網上的同學，交來的作文。批改1篇，$50. 視像講解，10分鐘，另加$50. 沒想到反應相當熱烈。我會繼續努力批改，盡快發還，累積口碑、熟客。

代寫論文，本來較高收入。但是很花時間、心力。暫時停止接新job.

物業3，丟空1個月，仍未租出。我要積極些，提高租盤的曝光率，幸運的話，農曆新年前，租出單位，就可放下心頭大石，生活用度也不用錙銖必較。

保守估計，2023，應該是充滿希望的一年。

一切，重新開始。

代課札記: 傻貓眼中的Band 3老師

這裡學生的學術表現，確實強差人意。可是，和學生的表現相比，似乎老師更令人大開眼界。
剛才副校長，問我4至7月，可否代產假。
他先用WhatsApp問我，我已讀不回。然後，他在我監考時找我，面對面問我。我坦言仍在考慮。午飯後，在樓梯碰面，他說: "其實4月咁耐，到時老師可能另有打算。不過，可以應承咗先丫。3月我打畀你時，你真係唔得閒，再講我知都唔緊要喔"
傻貓只好答: "Ok, 多謝副校你先。咁到時再聯絡丫"

監考

這裡的老師，不少都白髮蒼蒼，說話比較慢，工作也頗多蝦碌事件。
前日監考科學，同學只有問題紙。科主任後來說: 出卷老師漏印了答題紙。我只能吩咐學生，在問題紙上作答。
昨天監考，數學老師，印錯題號、頁數。

今日主考老師，在台上開咪，講完規矩，就熄咪: 
"大家都知道我唔鍾意用咪呀可? 聽到丫嘛?
你哋都知我既規矩。
今日考作文，如果題目要求160字，你最少要寫30字；要求400字，你要寫到80字。
寫唔到，唔想寫。冇問題。
我會擺你入作文班，放學後見。
開卷就瞓覺既同學，我會嚟關心你。
呢份卷，我改。你唔試，即係唔畀面。
你唔畀面我，我唔知我會對你點樣。
明白丫嘛?"

同學冇畀反應，不過，開考後成個鐘，真係冇昨天全民皆做趴地熊的盛況。
連最差的班別，都沒人睡覺。
最弱的學生，都將題目重頭抄幾遍，當作自己的作品。目測: 冇一份白卷。

原任老師

原任沒有交帶片言隻語，傻貓不清楚學生的學習進度，就冒眜問聘請我的副校長。
他請原任回覆我。以下是我們的對話:

原任: "你好呀，聽講你要搵我喎"
貓: ＂係呀，想知道教學進度，同有咩特別嘢要跟進＂
他：＂哦～雖然我放緊病假，我都會答吓你嘅。不過，我相信代課老師呢，係專業嘅。首先呢，教學進度，你問學生就得喇。關於英文嘅嘢，你問返英文科主任就可以喇。其他嘢，你睇吓有咩要教就教啦
仲有冇嘢唔清楚?"

傻貓都明白，病假期間，老師有權不工作。只是，從來沒想過，老師這樣有霸氣。無奈，只好乖乖掛線。有甚麼不清楚，不明白的，自己憑經驗、問同事，完成就好。

班主任拍檔

拍檔已滿頭華髮，他說自己已退休，因學校的誠意滿滿，才回來任教。

首日上班，甫踏進課室，已經看見一名學生，罰企在門邊。
升旗禮完畢，拍檔請他站到黑板前。問他知否自己和其他同學，有甚麼分別。
拍檔指出他穿體育服，但當日沒有體育課。
同學頂撞。
拍檔突然箭步上前，擁著他。說擁抱有點男男意味。不過，其他學生似乎見慣不怪。
然後，拍檔用手肘內側，緊鈎同學頸部。同學震顫，低聲道歉。

拍檔滿意地放鬆手肘，請學生向大家說感受。
學生指出另兩名同學，同樣穿體育服。

拍檔請他們站起來，苦口婆心地，提醒他們：遠離出賣自己的朋友。

他說：＂你哋以為佢成日同你哋一齊玩一齊講笑，就係好朋友呀？你哋要帶眼識人呀～佢有白粉，實搵你哋一齊食。不過，畀人拉，第一個就篤你出嚟啦～呢啲朋友? 你哋愈熟，死得愈快呀＂

傻貓不明白賣白粉、指出其他違規同學的行為，兩者有何相關之處。不過，拍檔嘗試孤立該同學的心思，卻如司馬超之心，路人皆見。
另外，老師這樣親密的身體接觸，我實在不敢恭維。
只能說：這裡的學生很純良，怯於這位德高望重的老師全身上下散發的威嚴，不敢妄為吧？！

代課札記：可愛的 band 3 學生

再次任教 band 3 學校。
傻貓之前教過九龍塘、秀茂坪區的 band 3 中學。學生的恤衫腳，總是隨意搖曳；老師上課像在街市叫囂；女生塗脂抹粉；男生句句都滲雜粗口。我擔任級訓導，不時約見家長。不過家長往往不是新移民，就是紋身金髮大漢。

這次卻不太一樣。學生的校服都整整齊齊，只有個別高年級同學，喜歡挑戰權威，穿體育課。

代課首天，就要全日當值。早上守門口，兩個小息、午膳守操場，放學要清場。

同學都很合作，靜靜地在飯堂吃飯，吃完戴上口罩，輕聲交談。個別幾位同學，躲在操場一隅圍圈。走近發現他們在玩硬幣，比賽誰的硬幣，站得最久。看他們一時拍手，一時吹氣，時而興奮大笑，時而低吁短歎，就為了幾枚硬幣，很有趣。

上課時，不經意地離座，和同學囁囁私語。手機放在桌上，不時靜靜窺看老師，期盼可窺準機會，偷偷用一會兒。
書，有些同學總是欠帶。不過，我可以即時拍照放上Teams. 他們用OneNote可當ebook使用。

他們非常樂於助人。作為代課老師，我沒有遙控，不能開關投影機。他們二話不說，就站上椅子，舉手開關。我不懂用 Teams, 他們逐步清晰解說，幫我開課室、分享屏幕，讓跨境學生，同時視像上課。

初到貴境，時間表又沒寫明班房編號，傻貓不時在走廊，截停同學問路。我習慣用英語和同學交談，問路也一樣。同學的反應都是有點愕然，然後努力理解我想去哪裡，再用身體語言、簡單英文生字，指點迷津。有些英文較弱的同學，乾脆親自帶我去目的地。幸好有這些好同學，傻貓少走了很多冤枉路。

Band 3 學校竟然處處都是這樣可愛的學生，實在意外。

2022 回顧：期權輸身家

睇返舊文: 

Trial & Error: 動物篇 （牛熊證)

"短短 6 年間，我已經蝕咗 62萬。

我一直以為，自己係透過牛熊證，賺咗層樓、只不過後來蝕返。

誠實面對自己吧。數字不會說謊。

原來，盈利來源是: 月供股票、零存整付、低買高賣正股、豐厚的股息。

教書的穩定高收入、上門補習的高時薪，就是這樣虧掉了。"

期權操作檢討

低處未算低。當時牛熊被劏，蝕剩嘅錢，仲可以買樓收租。
今日用期權，還極都未還清。Tesla持續下跌，我就算而家平倉，都仲欠IB 近60萬。
2月仲有張TSLA $170 行駛價的Short put 未平。今日已經跌穿 USD $110.

之前只係覺得，long side　輸贏都係運氣，而且睇啱邊，都會蝕時間值，好唔抵。
於是，我轉做 short side. 開始時真係賺好多嘅，每個月幾萬蚊嘅現金流，好吸引。
而且做 short put, 個市牛氣衝天時，即時接咗貨，正股股價都好快彈起，賣出又袋錢。

問題係: 邊個估到騰訊一個月內，彈升幾十個percent? 內房突然復甦、內地突然放棄清零、中概股突然爆升？
又有邊個喺Tesla  USD $402時，預見到短短幾個月，由 9 月嘅　USD $308, 跌到今日　USD $108?

Short call內地股票，雖然全部都係covered short call, 手持一堆正股。不過要折讓價畀貨人。完美地高買低賣。　Short put TSLA, 接極都仲要接貨。

接咗貨後，又未見底，唔知幾時股價重返家鄉。而且，當大家都對收購 Twitter 嘅　Elon 投不信任票，佢自己又當Tesla  係提款機，不斷賣完又賣，話唔賣又再賣時，成手貨嘅人，呢刻真心灰。

我唔係冇開Tesla SC, 只係幾張 expired嘅SC,賺嘅權金，都cover唔到接1張SP嘅震撼力。結果都係要抬錢接貨。
我都有開long put TSLA, 仲成22張。只係時間值損耗太大太快，股價暴跌，但我隻期權已經到期。到期前1日，我HKD $1000 take profit走咗。

IB 最好嘅係唔 call margin. 只要 maintenance value 保持到，就可以。欠70萬，每個月利息都只係　 HKD $2200 樓下。只係心理壓力好大。

自己知自己事：

自視過高：冇技術、財商低、唔肯止蝕。不停睇錯市，賺粒糖就走，但輪咗就由佢。虧損先愈來愈大。

零風險意識：做short side 期權，應該揀股價穩定嘅股票。我揀嘅騰訊、Tesla, 波幅大，冇事就袋權金，有事就接1張都10幾20萬。

炒功差：每次都成功捕捉低位止蝕，高位追貨。高賣低賣。

斷捨離

近日不斷變賣BB 的物品: 玩具、黑白布書、BB車、單車、學行車、防撞枕、健身架、床圍、奶瓶消毒器烘乾機、床鈴、網床、圍欄、波波池，賺返 HKD $2000.
今朝又拎咗870個彩色波波出去交收。
賣剩個忙碌板、韆鞦，仲有幾部單車、學行車、搖搖馬、BB車、彩色布書。

斷捨離真好，屋企整齊些，生活也好像有條理些，頭腦也跟著清晰點。

代課

最近返學校代課，做咗2星期左右，賺咗 $16000左右。

請保姆

物色咗 1 位新保姆。佢可以上課前，來補習社門口接BB, 落堂後，送返嚟補習社。
我唔駛再14:15出門口，送BB去元朗，再趕返荃灣上得1堂:  16:45 補習，18:00落堂，再趕返元朗 19:00 接BB, 然後夜晚晚 22:00 晚飯。
而且，保姆答應我，代課期間，可以全日湊B。 咁我就可以無後顧之憂。

補習社擴班

補習社不斷開班，聖誕假期仍然日日有補習。
嚟緊會再積極尋學生，視像上課、喺圍村內都會貼街招，上門補習。都會開始返網上幫人改作文。至於幫人做功課，寫論文，暫時BB仲係非常痴身，好鍾意埋身食奶，我去邊都醉酒佬咁跟實，可能過幾個月先可以開始。

如果冇計錯數，最長 8 個月，應該可以還清所有債務。
只係擔心物業2，大維修仲未出到價錢，未知幾錢埋身。物業1，又收到信要大維修。

曾經雄心壯志，列出來年resolutions.
今年唔喇。行好每一步路，做好眼前每一件事，就好。

Bye bye 期權

當港股升，我早排跌市卻開了short call. 而家等時間到，拱手蝕讓股票。行駛價距現價，已折讓好多倍。

Tesla跌跌不休，現價$128左右。我$240 short put, 要接1手正股。

2星期前，開了20張long put TSLA. 然後股價回升至$190以上。我嚇死了，後來TSLA股價稍跌，我賺了HKD $1000左右就平倉。

由此可見，我財商低，別人恐懼時，我更恐懼。

用期權，只會加速滅亡。

IB 戶口欠債，高達$565K. 

今個月至今嘅利息： HKD $1648

槓桿升至1.78

6月至今，一直泵水入IB戶口。直至11月底，6個月內，入咗HKD $268098.33

12月又入咗幾萬蚊。

仍然未止血。

萬念俱灰，連平倉都冇心機做。躺平。SC交晒貨，SP接晒貨，再好好賺錢還債。

皮老闆一向唔like收租廢老，佢話：“股有股息，食餅都有餅味。”佢認為坐股票，收吓息，舒服自在得多。

一條咸魚都有佢既用處😅”

但我呢刻，只慶幸自己仲有幾個物業喺手。其中2個仍有正現金流，而且不時有金主提出收購邀約。

磚頭，我唔會日日睇實，買買賣賣。每個月儲錢供樓，可儲幾桶金。收租又有現金流。而且，我做按揭，幾百萬咁借，都冇乜心理負擔。但孖展戶口，欠幾十萬，我擔心到喊。

呢幾個月，我好努力工作，加埋租金收入，我還咗少少錢。不過，我覺得好難過。係自己一手做成呢個局面。每次出門返工，濼言喊到扯蝦、咳，我就好想喊。

近日多咗學生確診，或成為密切接觸者，要請假。考試後，有些學生會休息1星期至半個月。加埋新年假期的holiday mood. 下個月賺唔賺到5萬，我冇把握。好擔心。

開始寄email搵工，但內心又好想多陪濼言，唔想返工。好矛盾。對住最近言語爆發期嘅BB,我好多嘢想教佢講、陪佢做。但因為經常搵唔到人湊佢，令我返唔到長工，我又好嬲佢。佢見媽咪最近不時無聲啜泣，會靜靜走過來，坐在我身旁，用小手捉實我的手，關切地凝望著我。有時還會給我一個大擁抱，吻我的臉。

為了濼言，為了自己，為了這個家，我要停止所有期權操作。這是我能力圈以外的東西，別再碰了。

久休復出的代課札記

這是一份送上門給我的代課工作。

由於港府擾民的抗疫政策，中招者和緊密接觸者，都要居家或到糟糕灣隔離。不少學校都嚴重缺乏老師，所以今次即使我的性罪行查核記錄已過期，又未考基本法、國安法，而且連針紙都不知所蹤，學校仍然透過我的舊同事，聯絡我去代課。

我一直任教中學，小學暫時只是教過一間神校:沙呂小。當日的慘況，我仍然歷歷在目。作為代課老師，除了本身原任的課堂外，我所有空堂，都要去為不同的老師代課。Speaking test 2 天後，就是speaking exam. 我連小息都要幫學生進行speaking test. 午膳時間，我要在課室，看管同學吃飯。但是老師不能吃飯。同學飯後，我要在小息巡邏，避免同學亂跑受傷。還有，考試周，代課老師基本上每天都要監考最少2科。下午，開會，包括英文的級會、IT交流會、宗教、公民教育、班主任的級會。開完會，改卷，試卷是全級批改的。我當時要改兩級的長文、短文。但只有兩天時間批改。我當時帶回家，通宵完成。

今次，因為不好意思推卻舊同事請求，又到小學代課。這次是一間直資的小學，學生英文程度非常好，小一已經可以流俐地全英語交談。同事都很年青，二十多至三十歲左右。大家都很有朝氣。學生也有禮、友善，交功課很準時。而且很奇怪地，很怕老師。上課時，他們卻又很踴躍舉手答問題，爭相自薦派發工作紙、練習簿。

這次教學經歷本來挺愉快，學生都積極學習，同事都埋首苦幹，預備PowerPoint, 討論教學方法，安排教學活動。有同事生日，整個教員室都為她高唱生日歌，一起吃生日蛋糕、拍照。

可是，原任病假中，卻又堅持視像上課，而且拒絕透露Google Classroom的ID, Password, 我很多東西都無法處理。早上點名，她堅持自己入app呈交出席記錄。小息，她會WhatsApp我，幾點去哪裡，檢查手冊、當值。她還會突然通知我，去哪裡開會，以及早上或午膳後，帶領學生，去參加一些學校突然安排的活動。至於視像上課，她也是臨時通知我，Zoom的會議ID, password. 這些通知，學校都透過WhatsApp 通知老師。但代課老師就完全蒙在鼓裡。

除了教學，每日還要不時看手機，避免錯失任何工作。心很累。

原任對自己要求很高，對代課老師也一樣。學生08:30要回到課室。她要求我每天08:10要進入課室，然後告訴她學生的情況。08:25收功課，我除了登記在同學的Homework Record, 也要通知她欠交情況。08:30打鐘，她會突然通知早會安排。小息，除了當值，還要去自己做班主任的班別，逐一檢查同學的家課記錄。放學，有一次，下雨天，學校原來另有雨天的放學安排。原任是下課前10分鐘才WhatsApp我。我上課的特別室，完全聽不到宣佈。我當時正在上課，就錯過了。同學放學時，才發現其他人都離開了。我班大概是全校最後一班放學。

今日上課期間，突然有同事衝進課室，說要全校學生站立默哀3分鐘。我一頭霧水。後來才知道，他們透過WhatsApp,通知全校教師，今日要為前國家領導人: 江澤民默哀。作為代課老師，我當然不知道。不過，這些政治小動作，仍然令我反感。他是六四民運的終結人。作為六四屠城的受益人，他能以90幾高齡辭世，已經沒天理。為他默哀，不好意思。我表面功夫做足，心裡當然另一回事。

小息，我追完學生的改正，剛回到座位，就被告知要代原任，去當值。我的拍檔班主任，昨天才回來上課。她今日說午膳時間很忙，囑我幫忙今日看管同學午膳。然後，其中一位英文級聯絡，通知我今日午膳的小息，要開會:共同備課。

我到職前，原任已經因為傷患，由9月開始，斷斷續續地請病假。11月下旬才到職的傻貓，發現同學差不多從來沒有上過英文課。聽同事說，每位代課來到，一兩天就消失了。傻貓算是做得最長的一位。由Nov 22到Dec 7,足足兩星期。

備課、追趕課程、批改練習、追收改正，令我心力交瘁。每天出門時，濼言撕心裂肺的哭聲，也讓我非常內疚。每日早上，長達近2小時的車程，簡直是折磨。更別提因為放學後開會，令我取消補習社課堂，所造成的經濟損失了。放工後，個半小時車程，回到荃灣，匆匆上課，又花1小時45分鐘，返回林村。很累。而且，撇除我本身一直在學校做中學教師的經驗，現時任教小學，日薪只有$1415，而中學代課每天有$1800以上。感覺上，每天都在做廉價勞工似的。

我已經回覆學校，完成今次任期，明天就是最後一天上班。他們問我會否再考慮，我很直截地拒絕了。

不過，重新做教師，這感覺還是挺好的。最少，我很享受教學，學生由全新接觸一個課題，到差不多完全掌握，臉上的喜悅和成功感，很可愛。他們對老師，又敬又畏的神情，也很有趣。當我稱讚他們時，他們既開心、自豪，又有點尷尬的模樣，也令我印象深刻。

仲價值投資?

價值投資，簡單來說，是低買高賣，真正賺到錢的方法。

價投並不限於特定版塊，投資領展、建行，為的是收息? 投資Tesla, 騰訊，為了增值? 
最重要是清楚自己投資該股票的目的，切忌貪息、妄想撈底。
賺息蝕價，如果買股目的就是收息，沒問題。但如果追求高增長，就不對。
愈買愈跌，很正常。沒有人可以確切知道底部，靠倒後鏡沒意思。應該分段投資，愈跌愈買，可以。但首先要問自己: 自己真的看到市場的大多數人，看不見的價值? 股價不斷下跌，股票的基本面，是否已經改變? 

股價下跌，可以有很多原因。不要見跌就趕著撈底。跌下來的飛刀，接了滿手鮮血。有心理準備才好。

價投千變萬化，不同年代，有不一樣的模式。可是，它的框架，萬變不離其宗。
仔細檢視自己的股票組合，重新配置，有攻有守。增長股、現金流、成長股，都可以。留意個股在組合內的比例。

繼續撲水拆彈

是自己性格問題。
好端端的，明明早已財自，有幾層樓揸手（雖然有按揭，但以租抵按，個個月有現金流）。老公又顧家，又肯做晒所有家頭細務，每朝5點起身煮早餐、午餐，晚餐屋企人又會預備。自己又有補習社，工時短，又可以專注自己鍾意嘅教學，冇任何行政嘢。
而家因為去年年尾、今年年頭開嘅期權short put, 搞到成日都唔夠錢用，仲要不斷左掘右掘，撲水救火。

呢個月出租咗間房仔，收咗兩按一上，又賣咗一些股票。
呢個星期開始代課，日薪$1400左右。
冇再幫濼言，報讀新嘅playgroups.

之前自己做嘅唔同定期存款到期，cash out咗筆錢。左搞右搞，呢個月減咗近20萬債，不過仲欠50萬。有諗過賣埋手頭嘅2百萬股票正股。另外，有個後備戶口，有筆應急錢。保險箱又有一堆金器。妹妹主動問我，駛唔駛借60萬畀我還債。只係未到最後關頭，我都想透過自己努力減債。

手上仲有3張Tesla short put. 都係之前開落嘅。
處理不善，就會係3個新炸彈。每個十幾廿萬港元。

後悔中。

每日谷奶谷到頭痛想喊時，我都會問自己: 點解搞成咁?

取消所有飯局，日日唔係返學校，就係返補習社。
4點半放工，一係返補習社，每日直踩至8點幾。一係返屋企，小組補習、視像上課，去到10點。落堂，一哥由媽咪家，抱濼言返嚟，他通常已經瞓咗。第二天，我6點左右出門時，濼言仍在睡。我好少見到清醒嘅濼言。

第一日補習，濼言就發燒了。平日他傷風流鼻水，埋身飲多幾次奶，他就好快康復。今次媽咪返咗工，他發燒斷斷續續，燒咗4 日。
他的playgroups遍佈港九新界。這星期，是我69歲的媽咪，代我帶濼言，周圍上課。她說這星期，連朋友都少見了，又冇得同朋友飲茶吹水，好唔開心。

家人輪流攞假，幫我照顧濼言。連高薪厚職，但只返咗2個幾月工嘅妹妹，都攞假睇BB.
一哥平日唔肯放假，不過冇人湊BB, 他只好攞假。他放假，意味著茶記得佢細佬一個，喺廚房煮煮煮，煮足一日。替假有時有，有時冇。有替假，一哥份糧就相應少咗。因為要出糧畀替假。

對呀，冇人鍾意慢慢致富。
不過，人大了，要考慮得更周全。風險和回報，要好好計清楚。
股市，專收叻仔、貪心的人。
傻貓今次，懶叻，既估價，又估市。貪心，唔同時期，開咗幾張唔同到期日嘅short put. 自己嘅現金，根本唔夠接貨。加上自己懶、情緒唔穩定，又唔勤力睇市。恃住自己有相當資金，亂咁買嘢。而家自食其果。

N班面試經驗分享

有谷友問：“面試N班，BB有咩技能要解鎖？”

帶著細B (9月至12月出生的小寶寶），他連走路都要扶著傢俬，甚至邊爬邊企，不懂說話，只會哇哇大哭，或者亂指一通。作為媽咪，帶著寶寶去面試，實在惶恐。

因此，傻貓在不同的媽媽谷，收集了一些媽媽的寶貴分享，讓大家初步了解：N班面試有甚麼要求。

迦南

N班zoom in

1.說出自己的名字或禮問候語，例如：早晨、午安、拜拜、Hello

2.指出自己的五官

3.根據老師指令，做動作，例如：

(i)與家長抱抱、錫錫媽咪、與家長擊掌

(ii)學老師按掣，同埋開關樽蓋、疊高高，然後放返好個疊高高

(iii)接住老師碌過去嘅生果，揀生果：比蘋果比媽媽，比橙比自己，比香蕉比老師

(iv)推車仔，然後再推車仔比媽媽

(v)跟隨老師一起跳舞：拍拍手、踏踏腳、摸摸面、摸摸鼻

VEO

1. Group in,

BB自己玩玩具

之後就好似playgroup 咁樣玩音樂 好似playgroup 咁

2. 見家長：

英文問3-4條，中文2-3條

爸媽一齊出席 2個都要答

主要問：關於教育同埋家校合作、點解選擇佢哋

康傑N

Group in(英文對答，老師 單對單 為小朋友評分）&individual in

Only in 小朋友，冇問大人問題，

-同老師say hi bye

-跟音樂老師做動作

-上落樓梯

-音樂行圈拍氣球，音樂停，動作.停

-揀一個顏色豆袋，match with same colour 圈圈

-同金魚say hi bye

-普通話：波波池中，搵鴨放圈圈

Individual in

-餵老師食

-青蛙bb放返媽媽度(clean up)

-疊積木

-揀車＆波，推比老師

-指公仔眼耳口鼻同父/母

康傑K班interview，Group interview同N班一齊

Individual in

-穿珠(約5粒，會問咩顏色)

-形狀配對(圓形，正方形，長方形，三角形）

-指出手偶眼耳口鼻

-幫手偶去另一張櫈拎面包or蘋果

-揀車＆波，推俾老師

-say bye bye/謝謝

分3節，第一節，普通話玩game，跳舞主要玩大肌肉game，第2節，英文聽故事，玩小肌肉game，第3節， Interview，我抽中英文老師

荃灣迦南N

zoom in

首先會問小朋友叫咩阿

識吾識講野，會講咩

Say hello, 問食左早餐未, 

有無刷牙洗面

請學生唱歌，畀反應: 拍下手👏🏻Fing下手

然後請同學選擇喜歡的玩具，和老師一齊玩

推車，推車俾媽媽，推車俾爸爸 

認顏色 紅色同黃色

Say bye bye 👋🏻 

寶雅N

問佢講野未，開始戒片未，日常3餐食咩

點解揀佢學校

馬鞍山Think PN

Group in (普通話） - 播左三首歌跳舞

俾咗個搖鼓跟住拍，同埋跟着老師做動作

Individual （廣東話） -入到房有好多唔同嘅玩具, 小朋友

問家長小朋友平時鍾意做啲乜嘢、誰人照顧寶寶日常起居

點解會揀佢哋學校，喺邊度得知佢哋學校

FreePlay， 老師會過嚟同家長傾偈，同埋問小朋友問題

老師會問小朋友姓名，幾多歲，鍾唔鍾意爸爸媽媽。佢玩緊玩具係乜嘢顏色，面前見到乜嘢動物，同埋其中一個玩具要撳燈掣着燈，老師叫同學撳俾佢睇

Yoga section (英文）- 要除鞋入課室小朋友坐喺咕臣媽媽坐櫈，其他老師會做一啲伸展熱身動作，叫小朋友跟動作，同埋有叫小朋友跟返自己咕臣嘅顏色，老師一叫嗰隻顏色就出去拎貼紙

墟浸面試N

小朋友一邊玩玩具，老師一邊問問題：

叫咩名？邊個陪你黎面試？

問顏色、五官、形狀

冇問家長問題

15分鐘 完

Joyful

分咗三part，頭兩part係group in 分別英文同普通話，英文老師講故仔要小朋友跟住拎啲道具做啲動作，將圓形通粉放碗仔入面 、插支花入杯 、拎牙刷幫動物玩具刷身 、用抹布抹碟、疊返好啲杯、貼岩動物貼紙去塊板

家庭面試，要切生果

普通話就唱歌仔同埋行過幾條平衡木，最後嗰part就係一對一嘅見老師

秀德靈糧N

Part 1: 玩玩具

Part 2: 小組唱遊

藍田啟思N

疊疊高、玩廚具

安仁N

同學踏入校門後，開始做手工。等待面試期間，氣氛嚴肅。

面試時，老師問：叫咩名？邊個同你嚟？手上是甚麼玩具？俾紅色車車老師、疊高高。有兩本故事書，老師會打開問同學，書入面的公仔，在做甚麼。

聖公會面試 

嘉年華會咁，氣氛好好

去跳舞 做勞作 d 老師好high 帶動小朋友 5分鐘左右先再叫入去見老師 

老師問: 圖片中既嘢係咩 （貓狗車個d)，問顏色 鐘意咩色 俾咩色既積木老師 執玩具 ，疊高高 ，問同學姓名，玩形狀、積木、對應落個盒，數貓貓。

屯門啟思

今年N 冇interview, 改左參觀學校，老師從中觀察...

- 入課室玩玩具 (小肌肉訓練嘅玩具)

（去玩具區玩，同埋坐課室台玩玩具（自由發揮），老師和小朋友玩，老師會同家長傾計了解日常生活）

- 參觀學校，老師介紹校內設施

- 入課室上英文唱歌堂...

全程30mins 完

回血中

接咗幾次SP,失血勁多。

最近港股回勇，乘機開咗啲covered SC.

物業2放租多月，仍未租出。聯絡咗3間放咗匙地產，才知道佢哋1間冇帶過人上去，1間話冇客搵呢類細房，另1間帶咗2次客，都嫌細，冇興趣。還價都冇。

把心一橫，自己上單位錄影、影相，upload上YouTube, Facebook 和 IG放租。第1日已經幾十個查詢，第二日都十幾個。搵地產經紀幫手帶咗1個，自己帶咗1個。出post嘅第3日，已經成功出租。

租客本身喺港島有屋企，佢搞音樂，有時好夜放工，所以夠位放床，附近有地方食嘢，交通方便，就可以。佢見到間房好新淨（上手租客搬走後，我換咗鎖、翻新過），環境清靜，好鍾意。前晚睇完，昨天早上覆咗會承租，不過我要時間預備租約。今日簽約、收2按1上。佢完全冇還價，仲好雀躍咁度尺，買傢俬。很有禮貌，聽到會打釐印，都冇異議。似乎係好客。😊

有呢2按1上，每個月有返現金流，唔駛割肉還按揭。心情好多了。

夜晚staycation，外出同媽咪慶祝，食生日飯時，有舊同事打嚟搵我幫手代課。代課日薪千七左右，勤力啲，日頭返學校教書，放學去補習，再收多啲上門補習學生，收入應該有可觀增長。

唔再搞期權，或者只做covered SC, 唔好再開long side,小心謹慎，肯定可以捱過呢個寒冬嘅。

戶口剩五千蚊

之前一直量入為出。

可是今個月戶口只剩 $5101. 踏足社會至今，這是第二次。
其中有三千幾蚊，要交今個月下旬到期的水費、電費、寛頻費用、手機電話費。

今個月利率上升，供樓按揭還款開支增加。3間物業，還款支出很多。
物業3的租客，病逝。女兒沒錢交租，要求退租。要退回按金。
一間套房已空置多月，另外2間套房的租客，都要求延遲交租。

還有，我一口氣幫濼言報讀了幾間收費頗高昂的學校，上不同類型的playgroups.
由於有些學校，要求security deposit, 又收register fee.
有些要 1 期 10 堂, 20堂地交學費，這個月用了萬幾蚊。

其中一份保險，剛交了年費，$15134。
期權操作不當，接了不少正股。加上自己發神經，做了2次long side. 都睇錯。又蝕幾千蚊。
消費券全部用完。
今個月取消了幾天補習，包括星期六，帶濼言去不同學校的open house, 去 messy play, BB gatherings, playgroup補堂. 少收幾千蚊。

睇咗止凡的最新文章，提到他的朋友習慣性地賭錢。
我當時還回應: 影響生活就要識停。
其實卻沒留意: 自己也一樣。

長這麼大，從未試過欠債30幾萬。
IB 孖展利率雖低，而且逐日計息。都5.55厘了。
睇返monthly report: July 收利息: HKD $17.98,
Aug 開始欠債: Aug 利息支出: HKD $20.05,
Sept 利息支出: HKD $650.59,
Oct 利息支出: HKD $842.49

是時候要停一停、想一想，這樣的負債生活，還想繼續下去嗎? 

醒覺牛熊證輸的金額超多，我開始寫blog時，停止了牛熊證操作。
如今發現自己用期權賭錢 (其實一直都係，唔知點解自己覺得係投資)，會重新買賣正股。

跟一哥提到想做折扣優惠，吸新客。
他提醒我: 想清楚要賺多些錢，還是陪伴濼言成長，帶他上playgroups,一齊學習。
可是，June姐的BB, 原來連playgroup都沒上過。

我的圈子，所有媽咪都帶BB去不同的playgroups. 有些還一天去3個playgroups. 1星期7天，從不間斷。但原來不是必須的?
自己都留意到: playgroup導師講故事、唱歌仔、大肌肉小肌肉的訓練，其實和自己的做法差不多。我都是看很多不同的育兒書，學以致用。所以playgroups好像用處不大。而且濼言和表哥表姐，以及北區細B的互動也不少。要練習社交技巧，好像不一定要上playgroups.
或者，減少一些playgroups, 自己持續和濼言一起學習? 
原本有些一星期3日的課程，改1 星期 1日?
既然沒錢，只好貴精不貴多。

之前打算報讀playgroup導師證書課程，學費幾千蚊。現在要重新想想，是否有必要?

要好好檢視自己的理財方式、portfolio.

重複犯錯、飯聚

大概跟我對著幹，就對了

我做親都錯

好冇癮😔

如果繼續錯，咁買物業4嘅計劃就死得

我都係唔好再搞咁多嘢，專心補習、湊仔算啦～

期權愈做愈衰，long side 幾百、幾千蚊咁蝕

short put又成日變高位接貨

昨天跟勁人谷（谷名本身係生活為樂）嘅谷友飯聚，有點劉姥姥入大觀園嘅感覺。在座有Youtuber, 幾位出咗書嘅作家，仲有其他成日隔空傾偈嘅谷友。大家在跌市都從容自若。跌市反而是買樓、買優質股嘅好時機。大家的現金比重都不少，沒有人這麼笨all in. 

飯後，我在想：

5年後的自己，有機會像他們一樣成功嗎？

怎樣才算成功？

是那種生活態度、自信？

不少谷友，年紀輕輕，對價值投資卻很有信念。感覺他們都不會像我胡來。他們似乎都對高風險投資、投機，敬謝不敏。也對。投資金律：不要蝕錢。

我的賭性，總有1天會害死自己。

傻貓11月買賣記錄 （持續更新）

1. Nov 4 平倉FUTU SP （太早平倉，現價不時升穿$40,不過加息陰霾、中概長期積弱。後市不明，唔想接貨。平咗先，換安心)(HKD $1543.71)

BOUGHT 1 FUTU Nov18'22 40 PUT @ 2.28

2. Nov 5 LC TSLA (手痕）

BOUGHT 3 TSLA Nov18'22 260 CALL @ 0.36 

3. Nov 7 SP TSLA 

SOLD 1 TSLA Feb17'23 170 PUT @ 12.8 

4. Nov 7 買入TSLA 正股

BOUGHT 50 TSLA @ 199.8

5. Nov 8 Roll over 騰訊 減少虧損

BOUGHT 4 0700 Mar 30'23 390 PUT @ 147.56 (HKD -$37140.26)

SOLD 4 0700 Sept 18'23 310 PUT @ 19.73 (HKD $7892)

6. Nov 8 SC 碧貴園

SOLD 2 2007 Feb27'23 1.7 CALL (COG) @SEHK @ 0.27

7. Nov 8 平倉止賺 港交所SP (Oct 31至今，1個星期左右，股價回升不少。承接力不強，止賺獲利，減槓桿)

BOUGHT 5 388 Jan30'23 210 PUT (HEX) @SEHK @ 3.38 (HKD $6381)

Oct 31 SOLD 5 388 Jan30'23 210 PUT (HEX) @SEHK @ 16.25

8. Nov 10 LP 騰訊

BOUGHT 20 700 Nov29'22 210 PUT (TCH) @SEHK @ 3.96

(今日兩度跌穿$230. 臨收市買入少少LP, 睇吓下星期表現點樣

(瞇埋眼亂買嘢嘅結果：今日收市後才開app睇，騰訊爆升11%, 我又蝕到趴喺度。下星期一再睇睇，止蝕蝕幾多）

8-10月股票及期權檢討

Nov 3, 2022

現金:		-$205,121.00
股票現值:		$1,530,902.38
帳面賺蝕:		-$997,916.46
已實現盈虧:		-$121,881.26

股市繼續跌跌不休。這兩天反彈少少，做了一些short call.
期權表面賺權金，但這樣持續的大跌市，每次short call的行駛價，愈來愈低。傻貓開始懷疑: 是否一開始止蝕正股，待相對低位買入，反而更好?
現時期權short put不停接貨，已經動用了差不多所有現金。即使股市續跌，我已經沒有無限資金接貨。
之前儲備的待熊基金，已經用完，還出現赤字。但股市卻未有見底跡象。

手上股票的股價已經非常低殘。無論怎樣換馬，意義都不大。
不過每次反彈，開short call, 沽少少貨，套戥些許資金，暫時還能吊吊鹽水。

FUTU

之前跌到得$28, 這幾天反彈至$37.09
它每隔幾個月，就會這樣。暫時做short call, short put, 權金還可以。

TSLA

眼見不少Tesla的大好友bloggers, 之前高位沽少少，期間不時短炒。我也不時落場試試。
不過，他們買賣正股，我就short put, short call.
承受的風險大很多，牽涉的金額也多很多。賺蝕的幅度也大很多。

港股

現時short call為主。上次 Oct 30, 驚見IB戶口，負356K港幣。經過這幾天的調動，以及期權操作，總算回落至負205K.
槓桿水平升至1.46

目標是用3個月時間，2023年1月底前，戶口現金回復正數。

新開的short put, 只有1299, 388.
港股升，388 一定受惠。我開了5張，行駛價 $210, 2023年1月底到期。
1299 我本身已經持有2000股。現時股價遠低於之前做的估值，所以開了1張。不過會審慎處理。

期權

Jan	-$27,635.11
Feb	$16,823.83
Mar	-$21,205.86
Apr	$57,948.49
Jun	$35,980.66
July	$10,036.65
Aug	$27,021.63
Sep	$55,502.98
Oct	$26,092.24
Nov	$46,564.00
Total:	$227,129.51

傻貓期權倉
開倉日	代號	種類	數量	行駛價	合約值	期權金	到期日	預期接貨$	狀態	所得權金
12/05/2022	TSLA	SP	3	$183.33	100	$17.35	Sep 16	$429,000	expired	$40,598.38
15/07/2022	TSM	SC	1	$90.0	100	$2.18	Sep 16		expired	$1,694.39
30/03/2022	388	SP	1	$390	100	$41.73	Dec 29	$39,000	assigned	$4,152.00
06/05/2022	1211	SP	1	$190.0	500	$14.54	Sep 29	$95,000	expired	$7,249.00
07/09/2022	SPY	SP	1	$375	100	$2.33	Sep 21	$292,500	expired	$1,809.21
30/03/2022	700	SP	1	$390	100	$55.21	Dec 29	$39,000	assigned	$5,450.79
26/08/2022	FUTU	SC	1	$48.0	100	$3.55	Oct 7		expired	$2,762.99
18/10/2022	TSLA	LP	3	$195	100	$3.82	Oct 28		closed	$154.04
02/09/2022	TSLA	SP	1	$233.33	100	$9.55	Oct 21	$181,997	expired	$7,442.99
20/09/2022	TSLA	SC	1	$345.0	100	$6.65	Oct 21		expired	$5,178.65
15/09/2022	TSM	SC	1	$85.0	100	$1.46	Oct 28		expired	$1,132.95
13/10/2022	TSLA	SC	1	$240.0	100	$5.10	Oct 28		expired	$3,969.81