剛過去的大跌市，大家係嚇到沽清手上嘅貨，走為上著？唔敢睇，抱住「唔賣就唔蝕」嘅心態？興奮地尋寶？還是再等跌夠先買？
傻貓開頭嚇到幾日唔敢睇市。
（更正：係唔敢開緊市時睇市，但收市後就忍唔住睇跌咗幾多。）
咁唔睇市，咪睇書咯。呢本<<財商有價>>，好神奇咁有心靈雞湯嘅效果。作者止凡憑著平日的觀察，指出散戶常見嘅問題。其中一個，就係高買低賣。
價值投資者又係點操作呢？
「買東西應該在人人都對這東西不為意時，在東西又便宜又有價值時買入。」
講就易，到真係周街便宜貨，愁雲慘霧，你夠膽買入超賣嘅股票嗎？
如果可以唔堅持等待最低位入市，而係喺合理價，見抵買入少少，分注慢慢入。應該可行嘅。
早兩日，傻貓就好似睇鬼片咁，又要驚，又要睇，邊睇仲邊尖叫。呢次跌市，傻貓見跌完有少少反彈，先戰戰競競咁，小注買咗隻美股IBKR.
「這個世上總是想發達的人多，但真正發達的人少。」
發夢一定容易過發達。想發達，就要提升財商。
「在這個金錢世界中，我寧願沉悶地贏錢，好過刺激地輸錢。」
巴菲特嘅名言：
"Rule No.1: Never lose money.
Rule No.2: Never forget rule no.1"
問題係當個市波動到股債齊跌，油價都跌時，想贏錢，係咪靠Cash is King? 等大跌市，先入市？
今日低位，可以係日後阻力位喎。
當定期冇乜利息，煤氣恒地又減送股，好多公司都減股息時，點先可以靜靜咁贏錢？
點都好，呢句真：投資沒有捷徑。
如果心存僥倖，只會離開成功越來越遠。
「走得快是沒有用的，如果走錯路，走得快只會令你更快步向失敗；相反，只要走對路，慢慢走也終會成功。」
股市大平賣，只要用合理價買入優質股票，中長線投資，相信最後回報不俗。
另外，要避免賺少少就走人，蝕就鬥長情。
學習堅持保留優質資產，沽出股票時，切勿考慮買入價，而是「考慮這支股票的體質，質優的就保留，生病的就看看有沒有機會好轉。」
「股價回升的升幅及時間會決定回報率」，「回報率是有時間值的，緊抱沒有價值的股票只會令回報率下降，甚至是負回報。」
最後，無論升市跌市，市場最終都會反映股票嘅真正價值。
記住，價值不等於價格。
不少價值投資者，對大升市興致索然，因為價值沒有大變，但價格颷升，股票貴了。
--------------------------------------------------------------
財商有價作者導讀
