Thursday, April 22, 2021

新手學期指


最近個市呆呆滯滯,正股就冇所謂,牛皮咪繼續坐吓。不過,期權玩法唔同。45日內的期權,時間值耗損好快。正股唔上唔落,但long call, long put, 都勁蝕時間值。

傻貓發現: 睇圖表只可以即日,最多2日有效。
當大市未有方向,市場冇乜好消息、黑天鵝,最好係撓埋對手,乜都唔好做,保留現金。或者,只做short side, 賺時間值,減少損失,甚至增利盈利。但係short put要確保自己有足夠現金接貨,否則好容易賺幾次後,嘔突。

我唔識long 兩邊,做long staddle. 暫時亦唔想搞咁複雜嘅嘢。
總覺得: 投資方式、標的,五花百門。但要成功,好似李小龍咁,一招就夠。段譽都係靠一陽指,每次都化險為夷。
愈複雜,要考慮嘅愈多,中伏位亦多。只要睇漏任何一個細微位,分分鐘萬刧不復。
市場消息天天都多,就算基本面再好、圖表再靚,如果踩中政策風險地雷,或者公司突然宣佈供股、配售新股,只能忍痛止蝕。

咁技術分析、睇圖,係咪完全唔work? 睇谷友分享,又唔係喎。
佢發現用技術分析,炒期指好有用。但個股出現嘅變數太多,好難精準出招。

當然,呢位谷友係勁人中嘅勁人,佢睇圖能力,超乎常人。
單睇1小時、4小時、日線圖,配合線型、陰陽燭,已經揾到入市位、賣出點。
佢炒期指,通常係即日,唔超過2日,就埋單計數。

佢認為: 炒期比炒股易好多。
決勝係幾分鐘內嘅事,下單要夠狠同膽色,其次先係技術面。
始終投資個股,要好勤力,睇好多圖去搵值博率高嘅股票。
炒期? 每朝早兩個鐘就夠。但係心理質素、 臨場判斷、果斷,好重要。

寫到呢度,我記起Tommy兄嘅提醒: 先打好基礎,學好價值投資,才去嘗試其他投資工具。
我嘅睇法唔係好一樣: 只要做好風險管理,唔好貪心,乜嘢都學吓、試吓,先會搵到一樣工具,最適合自己。我冇可能一開始就搵到自己嘅倚天劍,只能夠逐步嘗試,從實戰,甚至錯誤中學習。

所以,你會見到我一開始試用期權時,第一個月,回報只係$700蚊左右。仲要買中long put 騰訊,但係唔識平倉。無端端投資額、回報,歸零。不過,之後幾個月,開始了解多少少期權操作,回報就慢慢改善。如果,一開始因為怕輸、怕死,唔敢試,就唔會學到期權嘅基本操作。

期指,係高回報、高風險嘅工具,傻貓唔會貿貿然衝入去亂嚟。
不過,了解多d, 冇壞。之後,我明白多咗運用期指嘅方法,會先做小型實驗,慢慢摸索、學習。

8 comments:

  1. 師兄講得對,條條大路通羅馬。
    最重要有覺可瞓。

    ReplyDelete
    Replies
    1. 係呀
      投資,千祈唔好有太大心理負擔。始終,財不入急門。
      我嘅理想係:
      好似CIS咁,投資當打機,鋪鋪清,贏固然開心,輸咗無損心情,下一round再甄過,或者擺埋一邊,唔玩一排,都冇乜所謂。

      Delete
  2. Yes,you are right, make it simple in our mind, thereafter, it will find yo
    ur own way. Add oil.

    ReplyDelete
  3. 只要做好風險管理,唔好貪心,乜嘢都學吓、試吓,先會搵到一樣工具,最適合自己。我冇可能一開始就搵到自己嘅倚天劍,只能夠逐步嘗試,從實戰,甚至錯誤中學習。
    Agree no more this statement

    ReplyDelete
  4. 哈哈,竟有人還稱傻貓是師兄(真懷疑理財小師弟,究竟有看妳多少遍五花八門的文章)not good,真係瞓唔着覺。。想請教補習師姐究竟add oil(中文加油),正確英文是甚麼,有時見人說 Frighten。。那個才是正確,新手小學雞上。

    ReplyDelete
    Replies
    1. 南韓人鍾意講fighting, 日本人講奸爸爹
      明就得啦~😉

      Delete