茶記小妹：清潔達人

貓思前想後😔，實在太厭惡搞衛生，毅然辭職。

但輔導話唔夠人~康師傅年紀大，唔想佢咁辛苦~最後，佢叫貓頂多1個月。

反正孤身一貓，晚上冇地方去、冇簿改、冇細路，唔駛睇功課，做多陣啦。

咁既然要做，貓就調整心態，同掃帚地拖互相認識吓～

一輪對望，都唔知點操作，只好厚著面皮，請教同事。

識期超nice, 教貓點拎、點掃，城哥睇到，忍俊不禁，傳授心法。

昨晚，每個卡位，貓都蹲下，逐寸地方、逐個角落打掃。原來唔駛咁樣。地拖，好濕超濕，拖抹好easy. 地面濕咗，就代表抹咗。

掃地抹地，比想像中容易。或者多試幾次，貓都可以成為清潔達人喇😤。

P.S.
收銀的雯雯靜靜告訴我，今日last day；新樓面笑姐，做咗1日就消失咗；今日原本有新人報到，結果no show. 她們說，這裡人工比外面低，又經常畀人鬧，唔好做。

茶記小妹：掃地貓

輕輕鬆鬆鄧梓峯，眨眼23:00,傻貓和同事，合力預備好明日用的餐具和碗碟、更換辣椒油的碟、清空落單紙、抹乾淨所有桌面和椅子，預備收工。

之前3日，客人稀疏，訓導總是21:50左右，臨時叫我提早22:00收工。

今日正常23:00放工，即係有免費麵包攞😋，明天早午餐有著落喇😊。

冷不防訓導發號司令：「貓貓，妳同識期今晚開始，掃地拖地。」 貓走到後巷，找到發臭的地拖和掃帚。🤢嗰種酸臭味，勁想嘔。🤮

😳拎起掃帚，努力在油膩的地上，清掃地上的菠蘿包碎、攝落磚隙縫的牙籤時，城哥閒話一句：「貓貓，妳唔識掃地㗎？掃帚🧹都唔識拎。」
傻貓的玻璃心開始碎裂。💔

我認我唔識掃地抹地。細細個，爸爸認為我嘅強項係讀書📚，分派畀我嘅責任係：帶屋企人衝出公屋。家頭細務，全部由爸媽和妹妹，合力完成。

未畢業，爸爸已退休。一年後，買咗樓。為供樓，傻貓日日早出晚歸，學校放學，就上門補習。後來，屋企請咗工人。傻貓至今掃地次數，5隻手指數完。出租嗰間屋，裝修完，都係請人清潔。
貓貓幾時掃過地？

然後，客人教囡囡要有禮貌：「同清潔姐姐講拜拜啦。」

囡囡好乖跟住講：「清潔姐姐，我哋走喇。拜拜。」

嗰刻傻貓笑住講拜拜，仲讚小朋友乖、有禮貌。心裡堅想喊😢。 如果爸爸知道，我由Miss Lee,變咗清潔姐姐，會吐血😖吧？我幾乎想像到佢嬲到面都紅埋，指住我語無倫次咁狂鬧🤬。

$45時薪，我搭一次的士，由補習社趕返茶記，已經係半晚薪水。我做嚟為乜？
看著濕轆轆的地面，貓已分不清，那是水，還是淚😭。

跌成千點？入市先

今日09:30-15:15上課。下課後開aastocks一看，嘩！！跌過千點！！

開返之前的watch list細看，好幾隻股票都已進入射擊範圍。
觀察名單: 估市的代價
本身在友邦(1299)有好多好多張保單，儲蓄、年金、投資、醫療保險、人壽保險，都有。
上次買入，係16/02/2017，當時股價只是$47.35

由高位$88.17,回落至今日$71.35. 真心覺得好抵。不過，傻貓之前計過，$68才最抵買。於是又再睇其他。

領展(823)都跌咗好多，但最近明顯見到多返人流。最近確診人數冇再急增，大家悶在家這麼久，都想出來走動一下吧？

睇開領展，又睇埋置富(778)。嘩，跌到好低喎。再計計數，好抵。RSI當然低過領展。不過，今次唔敢瞓身買啦。清走咗ＦＩ二南方恒指 (7500), 淨袋$6000, 換入置富。

傻貓正在努力學習美股，已在耀才開了孖展戶口，做買賣。現時對美股０知識，只識VOO, 其他觀察中名單有:
AGNC, CM, VIG, VNQ, TROW, NRZ, TDOC, NEE, TSX:IVQ, MRC

很多bloggers都大力推介IB. 睇咗皮老闆的video, 分析IB的優缺點:

IB壞處：
1.入門門檻較高（10萬美金，但可射倉做抵押）
2.香港冇lite版，要畀月費US$10
（可揀即時報價，值一半月費）
(首3個月豁免月費)
(如果該月支出的佣金達US$10,亦可免月費)
(戶口淨值等於或大於US$100,000，也不用支付手續費)
3. 提款要收手續費
(每月可以免費提款一次。之後提款，每次收HKD$95)
4.操作介面複雜
5.冇美國SIPC保障

IB好處：
1.外幣兌換差價細
2.投資選擇多：
香港：直債、期權、外幣期貨
美國：國債/地方債券/公司債、美股/期權
3.射倉方便（由銀行轉倉去IB)
4.可自設月供美股
5.做margin方便，息低
6. 債券(直債)入場費低

傻貓不需要做孖展，也不敢冒這個風險。IB投資選擇多，但傻貓認為：投資愈簡單愈好，太複雜未必駕馭到。
不過，IB似乎比Firstrade優勝，匯款較快，兌換外幣差價細。門檻雖高，藉著射倉，已可達標。
不過，耀才和IB，孰優孰劣？還是各有勝場？

說到底，對美股認識太少，才是傻貓最大的憂慮。


附送傻貓投資記:

20200201 理財重讀生開倉概況

我的投資啓蒙老師: 龔成

估市的代價

第一次視像教學：大成功！！ＸＤ

睇咗幾個講點用Zoom做視像教學的短片，今日膽粗粗做咗第一次網上實時授課。

實在太好玩!可以睇到學生的即時反應，唔駛學生走嚟走去，仲可以檢測同學嘅專注力。可以即時share screen, 畀同學睇返英文網上字典、中文字筆劃。
上完1日堂，即時問返家長和學生的feedback, 睇吓學生明唔明上課內容，又鍾唔鍾意網上上課。

反應好好！實在太有成功感，太興奮喇！！！
實驗成功，傻貓就聯絡返之前要求視像教學的家長。反應非常熱烈！！

原來之前是給自己的想像力嚇怕了。肯踏出第一步，原來效果也不錯。









以下這些短片，傻貓覺得非常實用：

1.

零基礎應用ZOOM全面視像教室：一次過教你虛擬背景、排程開會、互動白板、分組討論、課室管理、美顏功能

2.

超實用虛擬教室管理小貼士：專注力追蹤、會議鎖定、會議報告、簡易回應

我的舊生租客

傻貓以前教中學的一位舊生，話唔想跟家人住劏房。好啦，反正家中多出一間房，低價租咗畀佢。
對生活有要求，希望改善生活質素，是好事。
不過，唔想大個住劏房，唔等於將來唔會。

要改變命運，就要由今日開始。
傻貓唔識點石成金，亦明白她承受唔到太大風險。
同時，亦希望佢明白，透過自己的努力積少成多、聚沙成塔的重要性。

佢話每個月儲到$500. 商量後, 佢同意傻貓幫佢月供股票：盈富基金。低位咪入多d,高位咪買少d.

希望佢慢慢感受到，投資、理財的重要。
同時，都希望佢學懂善用每分每秒的重要。
你今日點運用你的時間，就代表咗你將來的日子係點。
仲有，試吓減少負面情緒，學吓感恩、擴大社交圈子啦。咁樣，將來條路會易行d．

好多時，佢鍾意問：點解？
其實，點樣做到，更重要吧。

點解呢個世界咁樣，點解人哋咁對我，點解你哋要話／鬧我......不如問吓自己：點樣做得好d，唔駛畀人話。

（話說傻貓去9日旅行，交託咗２條養咗幾年的小魚畀佢。講咗每日餵8粒魚糧。3日後，佢就話條魚死咗，缸水好混濁。唉～
事後，從佢嘅言行舉止，明顯覺得錯不在她。但連小魚都照顧唔到，連餵食的指示都跟唔到，點樣令人覺得佢可靠？）

當有一日，佢唔再咁多框框，覺得呢個世界應該要咁，唔可以係咁。或者，佢唔再覺得人哋針對佢，而係試吓改變自己，認真審視自己，並作出正面改變時，就可以逐步成為一個更好嘅人，變得更成功。到佢改進到自己有能力，幫自己，甚至幫人去解決問題時，自然就唔會咁多唔甘心同抱怨，笑容都會多返，人生都會順利些。

第4期: 經前休息期

明明已經覺得衰緊。返嚟上磅。咦，又唔係喎。
已經由48.55 kg, 降到46.7 kg.

睇返在日本旅行呢段時間，好早瞓：唔夠10點就瞓。
照食零食，不過胃納空間有限，每樣食少少。唔似在香港，一落堂就忍唔住食嘢。通常成包曲奇餅、薯片、蛋卷咁狼吞虎嚥。

既然有少少成果，又試吓繼續。

第四期：經前休息期：

	早餐	午餐	晚餐	其他	運動
Day 22	芝士煙肉漢堡	煨蕃薯、炸鮪魚定食	韓式海鮮烤餅、雜菜卷、炸雞、梨水		3小時單車(三浦海岸)
Day 23	士多啤梨、香蕉奶	生薑燒豚肉飯	菜乾豬骨粥、牛腸、牛肉球、烚菜心
Day 24	香蕉1隻	菠蘿炒飯	牛肉米線、烚菜、皮蛋豆腐		3 hrs 45 mins 行山   (梧桐寨瀑布)
Day 25	火腿通粉、熱檸水	奶醬多 1片、蛋糕仔、蛋卷	啫啫雜菜煲		4 hrs 25 mins 行山 （東澳古道）
Day 26	菜肉餃檬粉、杏仁霜	蕉1, 紅腰豆半罐	雪菜肉絲米、奶醬多、紅豆冰	紅豆水
Day 27	雜菜湯	紅腰豆半罐		紅豆水	31 min 跑步
Day 28	梨1個	雜菜湯	醬汁鴨舌, 流心燒賣, 焗鮑魚酥, 非常山竹, 墨魚汁炒飯	紅豆水	4 hrs 行山   (許願樹至粉嶺)

28日好快咁過咗。明顯係後半個月就開始肥。

用返美國海軍嘅body fat calculator, 計算體脂。

同1個月前比較:
                

Before

After

Before

After

原來1個月就可以由obese（癡肥），減2kg,變返average (中等). 今次去咗旅行，冇戒口。不過周圍走，行咗幾次山，踩吓單車，間中飲紅豆水、食雜菜湯。

又睇吓嚟緊幾時真正減到42 kg / BMI 22.5 % fat.

不過日日記住食咗咩，好煩。之後只寫做咗咩運動，跟自己習慣、節奏去瘦身。

茶記小妹：你睇我唔到

識期疾衝過來 ：「貓貓，救我呀！ 」

張目四望，冇咸蟲、冇鬼佬。貓一臉問號。

識期 ：「我老師嚟咗喔～唔可以畀佢知我兼職㗎！我死梗㗎！ 」
高妹瑟縮在矮佢成個頭嘅傻貓身後，場面超搞笑。

貓：「佢坐邊張枱？」
識期偷偷示意 ：「嗰張。 」
貓：「我哋對調，妳睇呢邊。 」

巡查後，貓狐疑：「佢真係教師？衣著、舉止、語氣、用字，唔似。」
識期超緊張 ：「佢係TA （教學助理），好八卦㗎，同我班主任好熟。班主任話唔准人兼職，要畀心機考DSE~」

曾幾何時，我都咁講過。做老師，薪高糧準、年年跳point加人工，總是以為學生兼職，係賺錢拍拖、買靚衫和波鞋。

識期哭喪著臉 ：「補習費好貴㗎，我唔想屋企人咁辛苦。我1星期返4日茶記，3日補習。 」

年紀輕輕，就有經濟壓力，好恐怖。

識期扁晒咀 ：「之前有個兼職，屋企人咁啱嚟食嘢。佢匿咗喺厠所，整整1個鐘，唔敢出嚟。 」

究竟係唔想畀人知做兼職，還是唔想畀人知喺茶記兼職？做樓面，又唔係打刧，時薪$40, 賺嘅都係辛苦錢。而家咁多食肆結業，有工開已經好唔錯。

TA食飽打完機，抹抹咀站起，準備離開。
康師傅慌忙報信：「期期，2位，埋單。」
識期9秒9，躲進平日閒人免進的辦事處。

TA和女友手拖手離開，茶記回復平靜。

茶記小妹：冇眼睇你

朋友嚟探班。

貓 ：「嘩！好開心呀！你係第一個嚟探我班嘅朋友喔！ 」

友：「嚟睇吓妳丫嘛。」

有客人招手，貓忙開了。

10分鐘後，朋友已食飽飽。

貓 ：「食得咁快嘅？趕時間？」

友 ：「妳咁忙，費事阻住妳啦。見妳咁忙，我食嘢都唔安樂。妳快d搵工，教返書啦。 」

貓 ：「我呢度做得好開心呀～ 」

友 ：「妳讀咁多書，做茶記？唉～我冇眼睇妳喔～ 」

😢做咩喎？份兼職，包早餐、晚餐，有咩唔好？招待客人，好失禮？

我喜歡教學，幫學生改善英文、增強自信，好有成功感。教學不必局限於課室。上門私補、補習社小班教學，成效更顯著。

我也喜歡做茶記小妹。客人要求簡單，嚟到有位坐，肚餓有嘢食，就心滿意足。我最愛站在出菜位，睇廚房擺盤。每碟菜式，都像藝術品，精雕細琢。每晚9點，等食宵夜，返工就開工，放工就收工，冇嘢要帶返屋企做。金精火眼改作文、半夜三更出試卷、寫建議書攞funding, 老作evaluation budget report, 都過去了。

媽咪一直怪責傻貓：「懶清高，放棄永久教席，視錢財如糞土。」她始終不能理解：科主任突然委以重任：老作冇做過嘅教學活動、擅自篡改兼職導師的合約及薪酬、老作學生的課程後回應，這些都是詐騙。

記得當傻貓和盤托出後，老細曉以大義、動之以情：「你肯寫，大家來年就有機會繼續拎funding. 你唔寫，我哋用完呢3年嘅錢，就有幾位英文科同事及教學助理，要執包袱。你自己決定，想點做啦。」

老師唔係成日教學生：「誠實係美德」咩？身教重於言教。不能以身作則的老師，不配做老師。

毀人衣食，猶如殺人父母。貓唔想同事失業。報告，貓寫咗。寫好，交埋。辭職信，一齊交埋。

朋友，你心疼我工作辛苦，我明白。但我冇殺人放火，只是隨心而行。我唔知仲會做幾耐，不過唔做茶記，亦唔代表我要返學校教書。爸爸不在，我再不需任何人認同。

你明白最好，不理解也罷。

救救教育中心？憑咩先？

剛睇到李根興講教育中心嘅video.
佢分析得好好：5大原因，令我哋進入補習寒冰期。

雖然呢間補習社老闆Trevor講嘅數據，不盡不實（佢話：補習$600/4堂，我諗係指初小收費，亦只可能係大班教學。目測佢3間課室，每間可坐最少12個學生（睇02：56），1日可以上3堂（16:00-19:00, 每堂1小時)，每日收入已達$5400.就算每班得6個學生，月入都$21600。高小、中學的學費，一定更多。仲未計星期六、日，可以全日補習。）

傻貓數學差，試吓計計：
600×12×3×(3+7×2)÷2
$600/月，每班12人，3個課室。平日每日3堂，星期六日，通常每日7堂。打個5折，佢每月營業額都達到$183600


老師月薪冇乜可能$2萬樓下，咁低人工，做私補收入仲多。佢有請part-time, 好大機會係大學生/退休教師，以時薪計，冇任何福利，所以佢做老闆，賺得更多。（當然，燈油火蠟，成本嘅嘢，佢自己一定會計清楚。）

另外，平日學生放學，先嚟補習。但停課期間，學生唔駛下午6點先嚟，正常會改早上至下午嘅時間補習。所以下午6點，正常好多學生嘅時間，停課時課室空空如也，好正常。

傻貓做嘅係超小型補習社，小班教學，每堂師生比例：1對1-4.

舖租？一毫子冇減過。絕大部分家長唔敢畀小朋友出街，部分轉搵私人上門補習。

寒冰期係慘，好慘。但有危就有機，或者試教online video lessons都唔錯。改變唔到外圍環境，咪改變自己態度咯。

反正冇學生，多咗私人時間，唔駛備課、出筆記、改卷，就做吓其他嘢：
1. 整理吓教材
2. 預備IELTS
3. 學琴+練琴
4. 做運動，減肥
5. 帶狗狗行山
6. 陪姨甥玩+做功課+練琴
7. 學煮嘢食
8. 學理財（睇blog+書+videos）
9. 學整教學videos
10. 旅行（去日本行山+踩單車）

凡事向好處著眼，人會開心d. 暴風雨總會過去，幾時冇人知，不過笑又一日，喊又一日。開心好過唔開心啦。

至於搵政府打救......求人不如求己啦。以前好多工種被淘汰，d人都冇搵政府幫手。電車被巴士取代，巴士被地鐵搶生意。整花牌、紙紮公仔、雨傘，式微啦。製造業北移上大陸，再搬埋去柬埔寨、印尼、越南。佢哋有搵政府幫手嗎？政府幫到咩？

香港行資本主義，崇尚自由經濟。呢個世界，有需求，就有供應。有學生，就有老師。有考試，就有補習社。停學唔會停一輩子。以前賺錢，有分畀人咩？咁蝕錢，憑咩開口求人幫呢？

仲有，持有效教育牌照嘅補習社，有幾多？大嘅好似遵理、現代、英皇，冇理由要人幫。中小型嘛，盤數好難計，而且蚊型補習社，冇牌，點證明你係堅嘅補習社？好多補習老師，學歷有返咁上下，補習只係兼職。冇咗呢份糧，又唔駛死嘅。計吓計吓，除咗圍爐取暖，互相安慰，有幾多真係要政府幫手？

總之，大家撐住先啦！

第三期：平快期

放棄咗咁。

去旅行，最開心就係周圍搵好西。
為食貓見到嘢食就開心。

算啦，都係寫返啦。
就算衰咗，都要面對嘅。

第三期：平快期：

	早餐	午餐	晚餐	其他	運動
Day 15	煎豬扒+蛋+腸仔+熱檸水	醬油拉麵	刺身：烏賊、赤貝、帶子、甜蝦
Day 16	菠蘿包、炸芝士肉餅、炸牛肉餅	清酒煮蜆、海膽定食	醬油拉麵
Day 17	炸牛扒定食	牛丼定食	炒蟹肉飯、烤蟹羔、雜菇、帶子、枝豆
Day 18	烏冬	天狗燒、芝士撻、烤餅	漢堡扒煎蛋飯		3.5 hrs行山 (高尾山）
Day 19	吞拿魚三文治	海膽明太子定食	醬油拉麵
Day 20	牛丼定食	Nil	韓式炸雞、炒年糕、蒸野菜餃、梨水		3 hrs 10 min 行山(御岳山）
Day 21	芝士豬柳蛋漢堡	芝士炸熱狗	生菜、海帶湯、烤豚肉

Day 2: 淺草+銀座：仲見世通、晴空塔、東京鐵塔、增上寺

早上懷著期待的心情，去仲見世通，搵傳說中花月堂那外脆內軟、低溫發酵3小時的菠蘿包。

似乎好多明星都是食客。

買完要入裡面坐定定食。周圍有廣播，提醒大家唔可以邊行邊食，亦唔
准拎嘢食入人哋舖頭。

菠蘿包（220日元）好好味，反而有朱古力餡嗰隻（600日元），好似凍食菠蘿包咁。

出門口右轉再左轉，被芝士炸肉餅嘅香氣吸引，食落芝士好creamy, 啖啖肉，香脆可口。淺草炸肉餅，都好味。

食飽散步去晴空塔。途經隅田川，沿途鮮花吐豔，好多當地人跑步。

橫過吾妻橋和大橫川親水公園，行20分鐘左右，到高634公尺的晴空塔。

晴空塔樓下的Skytree商場，2樓和3樓，有300幾間商店。
為食貓最開心見到好多餐廳和美食廣場，超多海鮮刺身、日式便當和拉麵、西餐，豐儉由人。

如果有唔知去邊搵美食/商店，可以click呢度：東京晴空街道

水族館唔係傻貓杯茶，passed.

晴空塔
地址：東京都墨田區押上1-1-2　
官網：http://www.tokyo-skytree.jp/

築地本願寺

搭都營地鐵的日比谷線，去築地站，途經築地本願寺。它的建築風格令我聯想起土耳其的藍色清真寺--同樣融合不同宗教的元素：佛教的蓮花圖案、回教的尖塔、天主教的圓柱。

築地場外市場

想食當地新鮮海產，嚟呢度都係唔錯嘅選擇。
我哋食咗海膽飯、鮪魚飯、清酒煮蜆。（4000日元）
建議大家早上去，多d店舖選擇。傻貓唔食魚嘅，揀下午去，避開魚腥味。

地址：東京都中央區築地4-16-2　
官網：https://www.tsukiji.or.jp/chinese/

歌舞伎座
漫步去歌舞伎座--日本最著名的歌舞伎表演場所，建築華麗。不過當晚大概有表演，門前聚集大量群眾。遲d再嚟。

地址：東京都中央区銀座4-12-15
官網：https://www.kabuki-za.co.jp/

有樂町
向火車方向行嚟呢度，橋下有好多餐廳。

東京塔

高333米，外表好似艾菲爾鐵塔。
3-5樓，是動漫One Piece航海王樂園。Luffy嘅冒險精神、故事裡嘅真摯友誼，令人嚮往。

增上寺

距離東京塔10分鐘，在都立公園內。

芝神明商店街，都有唔少食肆。我哋搭咗都營鐵路的淺草線，返酒店附近食拉麵。