我有得游水啦

出院後，一哥變身緊張大師。行出行入成個小桂子咁，攙扶太后出行。

貓: "多謝你買畀我嘅新泳衣呀。我晏啲去游水，聽講水療好有效，我應該好快行得返，仲可以行山喔"
佢: "唔該你唔好要我擔心啦。冇人陪，妳唔好一個人去游水喔"

貓即時靜晒。
佢: "你最近成日抽筋，行行吓又腳軟，有時仲跪低。咁游游吓抽筋，點算呢?"
我: "放心啦，唔會死嘅。小心啲咪得咯"
佢: "我就係驚你浸死呀。總之，冇人陪，唔可以游。妳等我放假啦"
我低下頭，沉默。

好想好想加速康復。等一哥放假，死得啦。唔駛游啦。

昨天，我趁放假，臨時約妹妹去游水。
本來去天鑽嘅，疫情關係，訪客不得入內。
轉陣去大埔游泳池。

由更衣室行去泳池，原來有條好長嘅樓梯。膝頭冇力，遞腳上樓梯，大腿外側抽筋。
出咗更衣室，經過長長的主池，才到習泳池。行得好辛苦，腰好痛。

但一落水，就唔同喇。
雖然只係入咗hall team 嘅泳隊，操咗1個月水，但基本嘢都仲做到。
原來如魚得水，就係咁。😄😄😄
水中的我，移動速度比在陸地快好多好多倍。
我覺得自己就好似阿凡達入面個男主角，肉身被拘禁，但只要進入異度空間，活動自由從此不再受限。
仲有，最神奇嘅係: 蛙式、自由式，點游都好，條腰、胸口、大腿、小腿都唔會痛。

既然一切順利，傻貓同妹妹講: "我要去主池"
妹妹冇乜所謂，佢睇住個女，繼續鋤頭腳踢水，悠然自得。
佢話: "珮琳進步咗好多喇，以前唔肯自己游㗎，係都要捉實池邊，或者要媽咪喺正隔籬"
我冇眼睇。游極都原地踏步，又唔聽人意見，郁啲就喊，唔知佢進步咗喺邊。

上岸，腳趾即時抽筋。
忍住，落池邊條梯。媽呀!!! 小腿、大腿同時抽筋。加埋左邊4隻腳趾、右邊腳掌，一齊抽。
係咪主池嘅水太凍?? 還是落樓梯拉扯到肌肉? 唔知。

行返習泳池，妹妹知我抽筋，馬上幫我按摩、拉筋。又冇事lu😄.

有妹妹喺度，真係冇嘢要驚😚。

不過，我終於成功游到水。
陀B, 條腰受咗傷，好難自己會好。
始終 "no pain, no gain". 我唔信時間可以令傷患消失。
唯有繼續搵機會，自己去游游游，游水係最好嘅物理治療。
雖然而家泳池限制入場人數，排隊超耐，1個出，才可以畀1個入。
但為咗可以早日帶Muimui行山，我會堅持落去嘅，最多帶埋本 "懶系投資法"，邊排隊邊睇啦。

😂今次游水，最好笑係:
著泳衣著咗最少10分鐘。
件泳衣好多條帶，繞來繞去。我綁咗好耐。
落到水，件泳衣散咗。好彩妹妹即時幫我綁返實。😅

多得阿B, 我著咗幾年嘅sports bra, 竟然唔啱著喇。🤣

一哥捉咗我去買bras,老闆娘話：“個胸好脹喎，嚟緊會谷奶，最少要40喎”

嘩😆😆😆

我由32,升level到40喔！發達喇！😂🤣😂🤣😂🤣

😠最唔高興嘅係: 
妹妹話我個肚又圓又大，似海豹、海獅、海象，差在未趴低拍手手。
明明我就是貓，最多而家變咗肥啫啫嘅熊貓之嘛。