想改善投資績效，要識認錯

勁人谷中，傻貓最喜歡米兄。佢嘅諗法好全面、貼地，不時分享他的投資思維、檢討。而且他性格謙厚、平和，又為人設想，從來唔會嚴厲批評谷友，也不會責備傻貓的白痴操作，可以讓我安心分享自己的想法、感覺。
佢嘅提醒、分享，亦常有當頭棒喝之感。

昨天看讀者留言，有些想法，傻貓無法全盤接受。
例如: 股市已低迷一段時間，是時候反彈。
某股已經跌到某歷史性低位，反彈力度一定好強。

可是，誰說跌到了最低，就必然會反彈?
多少股票，反覆尋底，最後坑了無數人?

米兄分享:
索羅斯名言: ＂對錯無關重要，關鍵是盈利和虧損的幅度。＂
美股隊長: "證券市場和日常生活的邏輯，無法相提並論。"

傻貓認為: 
玩遊戲，唔係贏，就係輸。
我哋冇可能做長勝將軍。
關鍵係留意轉勢訊號，當勢色唔啱時，馬上糾正。

決定出錯，係好常見嘅事。無須太自責。
反而，輸錢係贏錢嘅必然過程。
只要及時糾正，嚴守止蝕，就能夠提升賠率。
所以，一旦出錯，止蝕要快而狠。
因為輸得愈多，愈難追回本金。
正如股神巴菲特講: "保本是rule number 1."
"保持持貨能力"，最重要大概是風險管理、資產配置。

方向好重要，行錯路，要花多幾倍的金錢、心力，去糾正。
如果方向正確，慢慢修正，就可以順利到達終點。

無論賭博、投機、投資，方法無數。
資產配置也很重要。

傻貓一直只集中寫期權、股票操作，其實慢賺、穩賺，反而是我的投資主軸。
長倉期權這類工具，只係整個組合的極小部分，少於3%。
我敢博，因為補習收入比較穩定，而且日常近乎零開支。
固定投資類別，例如收租物業，也持續提供穩定投資回報。
還有，一哥、妹妹，都係我嘅強大後盾。

投資是馬拉松，單純追趕刺激感，無法累積優質資產。
自然，也做不到複利效應。

投資前，必須清楚自己的能力圈，明白投資工具的風險、回報。
有時，不是該工具不好，可能是自己持貨能力不足，坐唔住貨，升浪未展開，就沽走咗。
有時，揀中糖衣毒藥，債券、優先股好似好穩陣，點知賺息蝕價。

總之，交易前，要未諗贏，先諗輸。
控制注碼，設定好入場位、止蝕位，做吓功課，先好買賣。