濼言27周了

這幾天開始又行得返，腰背痛減輕，只係連續5天，去唔到便便。
食咗火龍果、大蕉、probiotics, prunes, 飲咗鮮奶、乳酪，連去濕雜菜湯都出動，lunch淨食菜，都唔work.
屁都冇乜。

早幾日用咗浣腸泵，搞到子宮收縮，痛到不得了。但都係冇乜效果。
網上有人話，咁可能導致早產，嚇死貓。
算了。
求其行得走得，都好好。

趁行到，去泳池游吓水，自由自在，水中移動速度，比陸上快好多。
不過，真係睇相先知，原來條腿，變了象腿。個肚又大過個胸，手臂也粗了超級多。
性感泳衣，穿在身上，一點也不好看。就像大笨象跳舞一樣。
泳池的清潔姐姐，見到我洗澡慢，好擔心，5個人堆在門口，生怕我有事。
(其實就是我不懂拆妹妹綁的泳衣背帶喇，搞很久。)
幸好妹妹幫忙解圍。尷尬到一個點。

濼言開始不時彈彈吓，心跳好強勁。
感覺到佢身體不再躺臥，而是站著般，伏在我肚內。
一哥昨晚，把手放在我的肚皮上，都感覺到他強烈的跳動。好神奇。

妹妹開始催促我，趕快預備走佬袋。
佢話27周，即係7 個月，隨時會臨盤。
其實我唔係特別想拖延，只係真係好驚。
生仔聽講好痛。又唔知順產定開刀，醫院又冇得探病，生完就冇得見家人。😭
最快都要2-3日，才可以出院。
又唔知BB係咪健健康康，如果要照燈、放箱，或者我又行唔到，要卧床，咁點算?😰

妹妹已經幫我在網上，找到好多免費的BB及產後用品，好似BB浴盆、BB衫、玩具。
佢知我鍾意行山，仲搵到人free BB行山背架。

Wing都畀咗好多嘢我，有BB睡眠箱、和尚袍、紗巾、初生嬰兒尿片、產婦衛生巾、泵奶器、暖奶壼之類。

谷友之前都送咗部BB車、一套BB衫畀我，2對鞋仔超得意。

等濼言長大，半歲左右，又可以free返出去。
BB終於可以唔駛製造太多廢物、浪費太多地球資源。

一哥近日愈來愈緊張，見我行得返，千叮萬囑，唔准我行樓梯，唔准自己去游水。
佢在家，我才可以食雪糕。佢話唔想有任何意外。
我覺得好冇自由，昨晚駁了幾句咀，佢有少少唔開心，跟著自己去咗瞓覺。
但乜都唔做得，有食冇痾，又唔准郁動，行返補習社都話落雨怕我跣低，咁我同廢人有咩分別?

濼言究竟幾時出世??
聽說個肚低咗咁多，會早產? 有幾早?
學生9月尾測驗，我趕得及幫他們預備嗎??
濼言出世後，我哋嘅生活會有咩唔同?
好多問號。