小補寶：好痕呀～

Chrissie甫坐下，未拎筆記出嚟，雙手已不停亂抓。
上一堂已經怪怪哋，傻貓忍唔住輕聲問：「損晒喇，仲抓？屋企有事？」 

Chrissie微微抬頭: 「我媽咪聽晚要入醫院~」
小女孩咬著唇，強忍眼淚。😢

貓😔：「大手術？」
Chrissie微微點頭， 眼淚盈眶：「切子宮~」 
貓：「妳一定好擔心喇。 」

Chrissie: 「媽咪好驚喔～佢成日偷偷哋喊~」 
貓 ：「你哋有冇信仰？」
Chrissie搖頭。

貓：「當妳好擔心、好擔心，唔知點算時，試吓祈禱🙏啦。」
「有好多嘢，我哋都控制唔到🤷‍♀️，亦都唔知，點解會發生自己身上😟。所以，我哋會好驚😖，好擔心👉👈。咁係正常㗎，個個人都會咁😅。」
Chrissie安靜聆聽。

貓 🧐：「不過，妳知道子宮有咩用嗎？ 」
Chrissie: 「生BB。 」

貓😊 ：「Chrissie好叻喎👍👍，識咁多嘢嘅？」
「如果我哋正面d諗，媽咪已經有咁可愛嘅Chrissie, 同埋細佬，個子宮仲有冇用喔？ 」
Chrissie略見遲疑🤔，頭微晃。

貓 🙂：「咁如果媽咪冇咗個子宮，但能夠成功阻止癌細胞擴散，以後可以繼續陪Chrissie同屋企人，妳覺得點呀？ 」
Chrissie😣: 「我想以後都見到媽咪。 」

看著她耳畔頸後，一道道又深又長的抓痕，仲有咬到甩晒皮嘅嘴唇，我好心痛。
但願Chrissie媽咪手術成功，小女孩可以重現笑顏。

繼續靜靜量地學日文

去日本旅行，日聽夜聽日文。除咗基本打招呼，其他乜都唔識。😅
返港後，開始停課+停工。😑 原本永遠密密麻麻嘅時間表，而家經常空白到令人懷疑人生。😣
工作，不再佔人生大部份時間。以為武肺好似沙士咁，快嚟快去。3個月喇，仲停緊課。
世界，好似停頓咗。😥

😀幸好有得用Duolingo ，免費學吓日文，每日玩吓遊戲、記吓生字、重組吓句子，又過一關。😉與其浪費時間擔心呢樣嗰樣，不如專心學日文。最少，玩緊嗰時，唔會亂諗嘢。答啱問題，隻傻雀會好浮誇咁讚我。High 爆😎! 升到級，超有滿足感。😁

2月中開始，學咗2個月。由50音、打招呼🤗，學到點菜🍗🍜🍙、數數字💰、睇時間表📆，識得少少生字:傢俱、家庭、嗜好、食物，仲學緊prepositions, 描述位置。

每次開新局，都可以睇吓筆記，增加命中率。

出咗街，冇玩。個app會 email我，哄我去玩5分鐘。搭程車，又過幾關。

仲有個龍虎榜，見到自己名次跌咗，好勝心就會迫我爬返上去。

唔知升到7級，完晒遊戲時，復課未?
如果未，就學埋德文 / 西班牙文啦。反正免費嘅。足不出戶，拎住手機，就有嘢學。幾好丫。

連結:
免費網上學外語Duolingo

減租？唔減租？

租客要求減租

我嘅業主+舖頭業主，唔減。

我邊有空間減租？😢
我都要供樓。
冇學生，我都要交舖租。
我都好慘㗎。😭
☹️幾時先復課？
我唔捱得好耐㗎咋。😖

昨天聽妹妹講，近幾個月，不斷畀老細叫入房鬧。
係叫一堆人入房，逐個鬧：
「點解你仲企喺度？請你返嚟做乜？你自己辭職啦，唔係要等我炒你啩？」
鬧完一輪:「你即刻出去，垃圾唔好阻住晒。」

唉！
佢間美容院，已經好大型。
妹妹由中五畢業，一直喺公司，做咗就嚟20年。
由receptionist,做到美容師、培訓主管、樓層經理、顧問。
佢對公司好有歸屬感，好多therapists都係佢一手一腳訓練出嚟。
佢每個月跑嘅數，係樓層數、centre數，數以百萬計。

政府未強制關門前，佢哋已經冇乜客。
美容院唔開門，但佢日日照返工，不斷cold call 客人。大機構本來sell 專業皮膚分析、終身有效。而家冇得面對面sell, 又怕美容院高危播毒，肯buy services 成功率唔高。
佢唔想下屬貼錢打工，所以唔肯學其他centre嘅leaders, 迫下屬自己買療程。條數，當然差。

而家，14天+14天，佢公司已經炒咗好多人。
妹妹已經好多晚瞓得好差。
前晚，佢都忍唔住執晒嘢喇。

不過佢比我好，佢從來唔投資，連股票戶口都冇。每個月儲現金。呢個大跌市，冇蝕過。

大家都想咬緊牙關，捱過去。

不過，最近警民衝突又多返，社會又回復亂局。太古城一役，唱首歌都會畀人拉。
中共仍然要收緊控制權；政府仍然冇心搞好香港；警方仍然為出OT搏命屈人；港人仍然壓力愈大、反抗愈大。
這樣，香港仲係可以安心生活嘅地方嗎？
幾時先有𥌓光？
唉！
關關難過，真係可以關關過？呢一刻，我真係唔知。

被偷拍：說話的藝術

先旨聲明：唔係AV. 🤣

📸「咔嚓咔嚓」
今早，一個滿頭白髮嘅太太，突然衝埋嚟影我相。
傻貓反應一向遲鈍，呆呆望返佢。

老太太繪聲繪色：「呢個女人，喺商場放狗呀！仲畀佢周圍痾屎痾尿呀。」
哦~

半分鐘前，Muimui剛在屋苑附近，去完厠所。
我哋哄咗佢入狗袋，預備去食早餐。
老太太睇到嘅，應該係我幫Muimui抹手腳、pat pat.

明白對方誤會咗，傻貓嘗試解釋：
「我隻狗冇周圍痾呀。」
老太太聲如洪鐘：「大家認住佢呀。佢帶狗入嚟商場放狗呀。周圍都係屎屎尿尿呀。報警呀。搵職員嚟呀。」

傻貓冇喺商場放狗，更加冇畀Muimui周圍痾。無端端被拍照/拍片，好委屈。
好，你影我，我影返你。

咦？😂
「太太，你點解影我相呀？冇問過人，隨便影人相。好冇禮貌喔。」
「太太，我戴咗口罩喎，你影得清唔清楚㗎？」
「你唔戴口罩，走去影人相，好蝕底㗎。我影咗你相喇。唔該晒。」

老太太本來在謾罵：「自私精、白痴婆~我擺上網，公審你。」
聽到呢句，停低，靜咗，即時攞條抹汗巾，遮住口鼻。😅望落有少少似海盜。

「我隻狗真係冇周圍痾㗎，你諗住點樣講就點樣講啦。走先喇，拜拜。」

食早餐時，情緒還是未能完全平靜。Muimui畀人屈周圍痾，我哋又無端端被影相。點解男朋友唔講嘢？
佢默默食完，微笑望住我。

傻貓問：「我係咪處理得唔好？點樣可以做得好d?」
佢笑笑口：「我畀人屈，情緒都會激動，都會唔開心。」
嗯~ 我承認自己激動咗。

「不過Muimui行入咗商場幾步，先入袋。商場唔准狗入，我哋係有唔啱。」
係嘅，我哋都有唔啱，仲係我哋唔啱在先。否則，就冇之後嘅事。

佢停一停，再講：「佢睇到狗狗入袋，聯想到狗狗周圍痾，係誤會咗。不過佢擅自影相，都唔啱。」
佢再淺笑：「兩件唔啱嘅事，演變落去，唔會變返啱。」

傻貓追問：「咁畀人影相喎，唔知佢會點樣處理喎，又唔知會post喺邊喎。唔理佢咩？」
佢答：「我自己習慣，講嘢之前，諗一諗先。
講d咩，先可以做到個效果？
你同佢講完，點樣？」
嗯~ 冇效果。照片仍在她手機。

「如果講完，對件事冇幫助，甚至更糟，係咪唔講仲好？
如果要講，點樣講，人哋先會聽得舒服d?」

嗯。明白了。
即係講嘢前，諗清諗楚：講d乜？係咪要即時講？點樣講？講咗有咩後果？

佢繼續：「如果喺街見到個傻佬，佢追住你鬧，你會唔會鬧返佢？」
嗯~講到尾，說話對象都好重要。

謝謝偷拍者，傻貓今日上咗一課<說話的藝術>，仲欣賞到男朋友沉穩內省嘅優點。

茶記小妹：衝呀衝呀

「衝呀！衝呀！去呀去呀！3號！3號！好！掂咗！」

平日君子遠庖廚，今日廚房人頭湧湧，原來跑夜馬。

下一分鐘，洗碗姐姐慘叫：「哎呀！我劃錯咗2號呀！2號跑第二咋！」
一場歡喜一場空，佢謝咗。

唔緊要，有賭未為輸。1晚有8場，大把機會收復失地。

「你買咗咩呀？下一場，有咩心水呀？」
「搭單呀，幫我買埋丫~」水吧小花平日粗口橫飛，今日甜笑和洗碗姐姐攬頭攬頸。

「跑到第幾場呀？」「你買咗幾多？」泰哥和康師傅，都係馬迷。

宵夜時間，干炒牛河香味撩人。入口。救命喔！超級鹹！
貓和小玉對望苦笑。輔導笑笑口：「冇計啦～師傅梗係輸咗馬。」

大廳內，好幾次畀客人追問餐飲幾時到，亦有幾位客人投訴：奶茶冇茶味，凍央冇咖啡味。

一場夜馬，牽引著茶記上下的心情，茶記亦展現出不一樣的風貌。

茶記小妹：你啱你啱

訓導拎住碟黑椒牛扒飯：「貓，12A張枱係咪你落單？」
錯就要認，打就企定。
貓悄悄認吓12A嘅客人：「係喔。」

「妳又落錯單喇。牛同豬妳唔識分㗎咩？最慘客人話唔食牛，我想叫佢要咗碟牛扒都唔得。」
貓：「哦~」
牛扒？心念電轉，回到落單時。

老公：「我要黑椒牛扒飯丫。」
老婆：「我唔食牛㗎，食豬扒啦。」
老公：「我想食牛喎。妳另外叫嘢食啦。」
佢哋再點咗個厚切豬鞍。

訓導：「有時唔怪得廚房發脾氣鬧人㗎，佢哋咁畀心機，煮咗出嚟，冇人食，又嘥晒d食材。」
「落錯單，仲浪費客人嘅時間同影響心情。妳唔識，就搵人幫妳入單啦。」
貓：「對唔住，我以後會小心㗎喇。」

懷著疑問，貓翻查手寫單。果然，貓冇錯喎。不過，算啦。

點知誠哥捉住貓：「妳做咩唔鬧返佢啫？」
貓一頭霧水。
誠哥：「我聽住妳覆單㗎。個男人又熱奶茶，又凍奶茶，再改凍鴦。妳覆單都係講牛扒㗎。」

😅「顧客永遠是對的。」貓傻笑回答。

傻貓買樓記：前篇

買樓
數數手指：傻貓曾經擁有：
一手居屋：愉翠苑、
二手居屋：福安花園、
二手丁屋：沙頭角的毓賢居、
二手私樓：太子嗰２層舊樓

次次都打算自住，結果都係放咗。

至於在上水，那間拆晒舊屋，重新搭建, 2 層高的獨立寮屋。

錢花得最多，心力付出得最多，但如今已成狐狸精Carol和 Tony的愛巢。

只怪自己笨，明知寮屋，都真金白銀去裝修重建。還要自己咁辛苦去做家居設計，每件傢俱都親自設計、訂製。

如今，1毫子都攞唔返。

因為，地係Tony家族的。

愉翠苑
當時教書，可做9成按揭。3房大單位，山景。168萬。27樓都好嘈，車聲好大。住咗年幾，退回房署，攞返晒錢。

福安花園
馬鞍山，3房，全海景（厠所除外）。八號風球都可以唔帶遮，落街睇戲飲茶。5分鐘行到馬鞍山站。2003年沙士，買入價 $118萬，分15年，月供$5500。後來爸爸走了，大家都唔想觸景傷情，$400萬放咗。

毓賢居
一筆過全現金購入。本來唔夠錢，冒險all in 買新地、恒指牛證。好幸運，畀大訂前兩天，剛好夠錢。
間屋好靚，我只夠錢買中間那層，３樓先有海景。我有山景，仲可以到屋後面，去紅花嶺行山。

當時在粉嶺教書，以為沙頭角去粉嶺都係半個鐘。結果？到工廠區已經塞死晒。返工放工都成個鐘，小巴仲經常冇位。最後，出租畀人，自己租住花都廣場，行5分鐘就返到學校。

可惜，個客搞到間屋變夾租，屋中間有黃色膠紙間開。梳化爛晒，仲要一入屋就踩屎。（屋內有貓籠、倉鼠籠）。
厠所用唔到。搵人通渠，竟然喉內有衫架、風筒、大量雜物。客厠爛咗。
衣櫃有大量穿過的內衣褲，仲要有蟲。

最離譜係：佢交咗4個月租，就失咗蹤。電話唔聽。後來搵到佢，佢已經換咗電話號碼，仲話我：
「我唔交租，你應該知我搬咗啦。你咪租畀第2個咯。我d嘢，你丟晒佢得㗎喇。」

租約打咗釐印都冇乜用。搞小額錢債又煩。沙頭角又堅難放租。唉！算了。當時樓價已升唔少，我層樓放售半年，都冇人問津。最後平手離場。

太子舊樓
翻新舊樓出租。租金剛好夠供樓，仲有少少現金流。

本來想自住，所以都擺好多心機去裝修。不過間屋太細，擺唔落鋼琴，儲緊錢買人生的第6層樓，手上的第3層樓。

節衣縮食去買琴

補習仍然寒冬期，現金流不多。

賣咗IQ
昨晚見上星期買的IQ比買入價升咗一成幾，賣了。
當初買IQ, 小注賭一舖。都係買返VTI /QQQ/ VOO,穩陣d.

節流
衣食住行，現時基本削至舖租、媽咪嘅零用錢、探媽咪和上門補習的交通費。
好耐冇買新衫，出街食飯係男朋友畀晒。
屋租．．．．．．男朋友免我租 3 個月。佢獨力承擔。
（限聚令後，飲食業生意都難做。打工仔，慳住洗。）
出街，基本上就係來往屋企同補習社。步行距離。

幸好仍然有部分鐵粉，冒死嚟補習，有些則轉視像上課。

買琴
交完舖租，有餘錢。鋼琴老師剛好想放琴，超值價7500 賣咗部Yamaha U1 piano畀我，琴音好靚，好抵。
2019年7月開始，由對鋼琴 0 認知，到而家第 2 級。只要堅持練習，我相信終有一日，我可以獨奏<夢幻的婚禮>。

月供盈富基金

月供股票
4月開始，月供盈富基金。低位儲多d, 高位繼續儲。冇人估到市，今日高位，明日可以繼續破頂。之前幾次, 都係因為買樓, 停咗月供股票。相信今次都係。

我的計劃是這樣的：

恒指市盈率	月供金額
<10	HK$10,000
10-12	HK$8,000
>12	HK$7,000
>20	HK$5,000

恒指市盈率、週息率
錢多就供多少少，或者供吓美股VOO, VTI, QQQ

月供股票的參考資料：

威廉人 <月供股票的智慧>
https://mrwilliam2014.wordpress.com/2020/04/19/月供股票的智慧/

止凡的blog <何需買個股>:

http://www.cpleung826.com/2015/08/blog-post_13.html

理財見習生的blog：

http://investment-trainee.blogspot.hk/

雲地的blog：

http://fungdythegreat.blogspot.hk/

肥師奶月供 (第3期)

日期	總數量	平均買入價	股價	中電總價值
4/16/2020	18	HK$82.66	$81.80	HK$1,472.40
日期	總數量	平均買入價	股價	港交所總價值
4/16/2020	9	HK$259.37	248.20	HK$2,233.80

2020 Mom's Financial Portfolio （月供中電、港交所）
	中電				港交所
	月供金額	數量			月供金額	數量
Feb-20	HK$500	6		Feb-20	HK$1,000	3
Mar-20	HK$500	6		Mar-20	HK$1,000	3
Apr-20	HK$500	6		Apr-20	HK$1,000	3
總計	HK$1,500	18		總計	HK$3,000	9

一哥月供 (第3期)

日期	總數量	平均買入價	股價	盈富總價值
4/16/2020	170	HK$25.27	24.80	HK$4,216.00
日期	總數量	平均買入價	股價	友邦總價值
4/16/2020	59	HK$75.13	72.80	HK$4,295.20

2020 Fu's Financial Portfolio （月供盈富、友邦）
	盈富				友邦
	月供金額	數量			月供金額	數量
Feb-20	HK$1,500	53		Feb-20	HK$1,500	18
Mar-20	HK$1,500	57		Mar-20	HK$1,500	20
Apr-20	HK$1,500	60		Apr-20	HK$1,500	21
總計	HK$4,500	170		總計	HK$4,500	59

美股: 我有 IQ

係嘅係嘅......話唔買又買，女人實在太善變。

只係一覺醒來，楓林網、gimy.tv和momovod一齊消失，忍唔住搵吓有咩揀。

報章連結：
怕像楓林網被抄？gimy.tv無預警關閉 網友哀鴻遍野

然後見到中國影視平台愛奇藝被沽空機構渾水狙擊，指佢誇大用戶數量、收入及收購對價。根據Wolfpack Research寫嘅報告，估計愛奇藝將2019年收入發水咗27-44％，用戶量發水42-60％。

資料來源：
【沽空狙擊】愛奇藝遭Wolfpack、渾水聯手狙擊 稱誇大收入、用戶數

IQ係咩?

美股IQ, 即係愛奇藝。
愛奇藝日前向美國SEC遞交20-F文件顯示（披露截至2020年2月29日）：
2019年，愛奇藝已經有過億會員。會員收入係愛奇藝主要收入來源。2019年愛奇藝全年會員服務營收為人民幣144億元。2019年第四季度末，愛奇藝訂閱會員收費達到人民幣1.07億元。

IQ有咩大股東？

百度
持有愛奇藝799.3萬股A類普通股，及28.76億股B類普通股，擁有92.7%的投票權，佔愛奇藝總股本的比例為56.1%，為第一大股東；

小米
持有3.42億股A類普通股，佔總股本的比例約為6.67%，擁有1.1%的投票權；

高瓴資本
擁有3.27億股A類普通股，佔總股本的比例約為6.34%，擁有1.1%的投票權。

資料來源：
高瓴资本560亿美股持仓曝光,捕获这只大牛股!清仓特斯拉蔚来苹果

面對狙擊，IQ嘅回應
愛奇藝創始人、CEO龔宇在個人朋友圈就回應：「邪不壓正，看最後誰贏！感謝大家的信任和鼎力支持！老老實實做人，踏踏實實做事！」

搜狗 CEO王小川：「與龔宇兄相識得有14年，在搜狐共事多年。他的為人、敬業、勤奮都是一等一的好，有機構報道說愛奇藝造假，我就三個字：不可能。」

雖然可能渾水係沽得有道理，不過現價咁低，就少少哋買吓啦，睇吓有冇機會反彈。

講開高瓴資本 ，佢重倉嘅Zoom,最近被爆出好多安全問題。翻查資料，好似洩漏資料畀Facebook咁，已經解決咗。只係刪除咗Zoom後，hackers仲可以擅自打開用戶嘅webcam,始終未搞掂。台灣、美國好多學校已禁止使用Zoom. 不過問返香港嘅同工，大家仍然用緊Zoom,只有少數人用Google Meeting. 改用MSFT旗下teams嘅，更加係0.

傻貓現時都係用Zoom視像上課，亦交咗月費。如果要轉其他software,就要重新學習。家長方面，暫時冇人有意見。

後記：
始終唔慣夜晚睇市，今日特意夜瞓少少，沽走隻IQ, 賺咗1成。算唔錯。

茶記小妹：你聽我講埋先

「次次都係我做晒。偶然幫吓手唔緊要呀～都唔係吓吓搵我做㗎？！擺明搵我笨啫~」
「 係咯係咯！」
老婆由坐低就開始呻，面前碟意粉冇乜食過。老公食飽飽，用緊手機。

傻貓在老公身後入單，瞥見他Whatsapp, WeChat 兩邊走，超繁忙。
"Miss you😘" "Miss you  too"
「食緊飯」「call u later😘」

老婆繼續呻：「點解佢哋個個都蝦我？」
老公雙眼離不開手機：「係咯係咯！」
Whatsapp的某個她，傳來幾張自拍照：低胸、金魚咀、好enjoy咁食緊晚飯~

「你係咪聽緊㗎？」老婆忍唔住問。
老公機不離手：「聽緊喔～佢哋真係衰呀，咁都有嘅？」
「你都話係？佢哋呀～」老婆煞唔到掣咁訴苦。

太太，蝦得妳最徹底嘅，未必係同事和老細喔！

家電維修責任誰屬

今日在Facebook 的群組，見到一個有趣嘅問題:

傻貓係雙租，既租人樓，亦有出租物業。
作為租客，當然想業主負責所有維修費用。
但做業主，就最好乜都唔好煩我。

傻貓通常跟租約處理。

電器保養問題，應該開始時列明於租約。租約開始後，如無列明處理方式，可以雙方協議處理。

業主通常只負責外牆、水渠等結構問題，屋內家電維修租客自理。

如果業主寫明不負責維修保養，即假設租客可自行處理，不論電器狀態，都可以自行搬走。

如果你的租約，列明提供洗衣機，而電器壞了，等於業主無法履行租約條款，所以業主有責任維修。

我就通常自己搵二手家電（好多外藉教師、半山區住戶，會免費或低價出讓傢電），過數畀賣家後，租客負責運輸費用。

想減低運輸費用，以及環保減少碳排放，就揀返租客所在區域。
傻貓通常用Gogovan app, 睇咗報價，再問埋幾位幫襯過、有禮、肯幫手搬上車落車嘅貨van司機，確認他們最快可以搬運的時間，再提議畀租客。

簡單維修，就由租客搵師傅報價。
價錢合理，就畀佢自己同師傅安排維修，再由下個月的租金扣除。
我自己都會搵師傅報價，通常我嘅師傅價錢較合理，我就轉數快畀師傅付款。
但如果損毀由租客人為造成，就由租客自理。（這個很難判斷，業主最好就不要提供傢電，不用麻煩。）

二手傢電連結:
1.
Facebook page:
二手傢俬/二手電器專區(香港)
二手傢俬傢俱電器平台
二手傢私傢俱電器專區

二手傢俬、電器、物品交易平台(香港區)
唔浪費 二手全新 買賣專區

大埔Give & Take

斷。捨。離。物品捨棄平台（香港）

2. Carousel
3. Facebook Marketplace (記得設定價格及區域)


租客必須在維修前，和業主商量好。如果擅自安排維修，我做業主就絕對不會負責。
(就好似整車，你都要同撞花你架車嘅人商量好，先去整。否則費用可以係天價。)

傻貓租住的單位，業主開始已說明：洗衣機、乾衣機，是上手租客遺留的。
如果壞了，丟掉就可。不會維修。
其他傢電，自行添置，搬出時清走。

爆水喉
之前浴室爆水喉壞了，業主話會搵人嚟整，我叫佢先請師傅報價。
我自己亦同時搵4位師傅報價。
結果，傻貓找到的師傅，比業主報價嘅，便宜$100.
(當然啦，業主搵佢屋企樓下嘅師傅，唔係租客我附近嘅師傅。)
業主就話搵我嘅師傅整，維修後，我順手影返收據畀業主。
佢即時過返數畀我，仲多謝返我。😅
（租金係自動轉帳，冇得下個月扣數。）

租約
傻貓出租和租住的單位，都係自己買文具舖嘅最新版本租約。所有條款都是取得共識後，才添加/減少/刪改。
我的業主本來預備了一份咸豐年代嘅租約，對業主保障不足。傻貓畀佢睇返: 我同租客簽咗嘅租約。經過簡單解說，業主就用埋我嗰份租約。
(雖然，如果最後有法律爭議，都會跟租務條例處理。)

租金安排
過咗1年死約，已經可以加租。不過通常唔會加。
現時經濟差，未過1年死約，租客都可以和業主商量減租。

傻貓的好友邱邱，這幾個月，已經減咗2次租畀租客。不過，建議業主必須先和租客簽訂保密協議，否則其他租客知悉後，會仿效。特別是租客互相認識，還介紹朋友租你間屋。你唔係減1個唔減1個啩？


戴頭盔先:
以上只係傻貓個人經驗分享、意見，記得根據租約處理。

20200407 理財重讀生倉儲情況

Stock Value:		$1,262,695.00
Gain/ Lose:		-$295,715.28

變動:

1. 沽清7500, 賺$$5,877.24

2. 買賣咗IBKR, 賺$$1,707.46

3. 買賣咗7200, 賺$$1,046.73

4. 沽出部分1083, 蝕$-$18,720

投資心態:

買賣股票多年，曾經賺過錢，樓都買咗１層半，以為自己好叻。

這次大跌市，才赫然發現自己係其中一個退潮時冇泳褲嘅人。

補習一向提供相當充足嘅現金流。

疫情令補習進入寒冬期，學生都唔敢嚟上堂。

轉型用視像上課，學生人數剛上升，電腦就壞了，連機都開唔到。

嘗試溫習筆記，重新進行股票估值。不過，已經提不起勁。之前計嘅數，唔啱，大跌市時，沒有最低，只有更低。

牛市時，鷄犬皆升，周街股神。熊市時，稍有反彈，大家趨之若鶩，驚遲咗又買貴咗。

到跌得勁，大家又唔敢入喇。

既然係咁，不如先學投資心態。

股票方面，短期應該只會繼續擺。等錢用，就減持。減持嘅，一定係手上當時蝕得最甘嘅股票。逆市都造好嘅優質股，係唔會郁嘅。

月供股票，4月開始，用中銀月供$8000 盈富基金 (2800)。

傻貓唔識選股，牛眼投資法太深奧，暫時買ETF先啦。
資金鬆動嘅，會加大2800, 並開始儲VOO, VTI.

如果跌得夠低，又真係想買，只會睇鐵塔、香港電訊、香港寬頻。始終５Ｇ係大趨勢。

仲有有護城河的港交所、地產龍頭嘅恒地或新地、有現金流和土地儲備嘅港鐵、恒指成份股佔比極重的友邦、派息率高的金沙。