收租貓: 舊樓的驗樓令、驗窗令 Part 2

上文 收租貓: 舊樓的驗樓令、驗窗令 Part I 講到，傻貓收到屋宇署嘅驗樓令、驗窗令。

驚魂甫定，貓靜下心來，想起全幢大廈，都有這個情況。遠親不及近鄰，就WhatsApp問吓以前做工程公司的退休鄰居，點樣處理。

佢話已經處理好晒。驗窗$1500,驗樓$3000.

嘩！😃 平好多呀！

可惜，驗窗嘅係佢好朋友，唔肯搭車嚟幫手。

驗樓，卓X公司之前報價$6000. 而家便宜一半。原來，鄰居認識呢間公司嘅老細----楊先生。難怪，傻貓之前打N多電話，問咁多間公司，都攞唔到呢個荀價。呢間公司，規模仲要唔細𠻹。

呢間公司，最好嘅地方係: 收費清晰。 佢講明勘察、寫報告，共$3000. 如果要修茸及事後檢驗，加$800. 

楊生非常有耐性，佢先叫傻貓唔駛擔心，教我跟份文件，打電話畀屋宇署，hold起，唔好pass去檢控組。

政府接聽嘅職員，好有禮貌。佢了解情況後，話屋宇署係跟之前嘅田土廳記錄，發信通知業主。估計係冇更新業主姓名，強制驗樓、驗窗令的信件，被傻貓退回了。所以絕對唔會檢控我。

既然我打算委託公司，安排驗樓、驗窗，咁就ok喇。

楊生唔止幫我，派工程師驗樓，仲係良心生意人。

佢話：“我哋公司，係可以幫你驗埋窗。

不過，我哋嘅資格，係overqualified. 

就算畀套餐價錢，都一定貴過齋驗窗嘅QP. 

因為佢哋只可以驗窗，冇資格驗樓，價錢會低好多。”

但我去邊搵人齋驗窗呢？佢聽傻貓把聲，以為係細路女。經不起苦苦央求，最後好心介紹個師傅畀我。

貓即時聯絡。但原來師傅唔係好識用WhatsApp. 最後，電話傾好，約好時間，驗完，$280, 搞掂。

P.S.

有做則師的網友，提醒：

整座大厦嘅大維修，而物業係長者名下，可以伸請資助。但物業1係傻貓全資持有，只好花$3280, 自費驗樓驗窗了。

https://brplatform.org.hk/tc/subsidy-and-assistance/integrated-building-rehabilitation-assistance-scheme/schemes-for-individual-owners/home-renovation-interest-free-loan

順帶一提，如果大厦要維修或更換電梯，可以申請：

https://brplatform.org.hk/tc/subsidy-and-assistance/limss

收租貓: 舊樓的驗樓令、驗窗令 Part I

今日在Facebook, 見到有人問起清拆僭建物。傻貓的物業1, 和這位網友情況相近。

記得呢篇 “傻貓買樓記：210呎蝸居裝修分享”嗎？直到收到屋宇署嘅信，又聽咗裝修公司嘅解說，我才知道：整個睡房，都係僭建嘅😥，前身原來係露台。

傻貓見到好幾位熱心嘅留言者，以親身經歷、建築物條例，畀建議。都話一定要清拆，跟原本的則去還原。有個甚至講明，上訴都冇用，最後都要拆、拆、拆。

剛好，幾個月前，我也收到政府文件，大字標題: "強制驗樓計劃通知不獲遵從"。劇透一下，完全唔駛清拆。借此機會，分享一下經驗。

老實說，一收到這份文件時，傻貓完全 嚇 傻 了。😨

由始至終，我都沒有收過關於 "強制驗樓計劃"的通知，一收到，就已經是粉紅色警告信，中英對照，內文還列明罰則: "第五級罰款 ($50,000)及監禁一年"。它還寫: "近期所有有關此罪行的法庭個案已被定罪，並有個案業主曾被法庭罰款超過$31,000" 😱😱😱

傻貓以前讀書，是品學兼優的好學生 (我講小學😜)。收到這份文件，簡直是晴天霹靂。😰另外，傻貓同時收到驗窗令。所以打算一併處理。

不過，點解無端端要驗樓?

樓齡30年以上

自2012年起，屋宇署便實施「強制驗樓」及「強制驗窗」計劃。

驗樓

如果樓齡30年或以上，就需要每10年聘請合資格的專業人士驗樓一次。

驗窗

樓齡達10年或以上，便需要每5年聘請合資格的專業人士驗窗一次，以證明樓宇符合安全標準。

屋宇署每年會揀選2,000幢樓宇，同時進行強制驗樓計劃及強制驗窗計劃，另外揀選3,800幢樓宇，只進行強制驗窗計劃。

傻貓的物業1, 就是被選中的目標物。

減少意外

樓宇老舊，如果「墜窗」、石屎剝落，有機會傷及途人，甚至害死人。

不錯，政府 (除咗稅局) 做事，一向冇乜效率，屋宇署的檢控數字嚴重偏低，「不遵從比率」相當高 (截至2018年底，已逾期的強制驗樓通知書多達27,873張，但屋宇署只提出檢控139宗；而已逾期的強制驗窗通知書亦多達47,968張，只發出3,746張定額罸款通知書及提出41宗檢控。)

但了解咗前因後果，傻貓唔敢再抱僥倖心理，當下馬上嘗試找人介紹公司驗樓。

可惜，身邊擁有物業的朋友不多，而有樓在手的，都很少買這類舊樓。徬徨無助，只好上網找公司驗樓。同時，在信箱，有好幾張驗樓、驗窗的宣傳單張。估計是裝修工程公司，在屋宇署的網頁，找到資料。

驗樓或驗窗通知的發出及遵從狀況

驗窗

曾師傅

傻貓首先聯絡江師傅介紹的朋友----曾師傅，他只做驗窗，不能驗樓。他收到訊息，第二天就馬上上門報價。

他逐個鋁窗，仔細檢查。結論: 窗都完好無缺，只是部份鉚釘已生锈，需要更換。他報價: $2500. 隨時可上門維修。傻貓馬上填好委託書。不過，一哥出言制止: "這價錢太貴了吧? 樓下的街招，寫明驗窗包pass, 只收$2000." 曾師傅表明沒有議價空間，傻貓不敢逆一哥意，只好說要再考慮一下。

卓X工程顧問及裝修公司

宣傳單張那些公司。它們的公司地址，都在物業1附近，可能價格較合理。

大部份報價$3000 至 $4500. 有一間卻特別優惠: $600 驗窗全包, 包pass. 而且似乎有豐富經驗。

以下是我們的WhatsApp 對話:

貓: "我想安排驗窗，樓宇在XX街，XX樓，請問價錢？" (附上曾師傅拍攝的鋁窗照片)

凌晨12點幾

卓生覆: "呀，唔好意思，咁夜先覆你電話。

XX樓呢，即係XX街嗰度呢，做開架喇。

咁驗樓都做。咁驗窗呢，我唔知你意思係乜嘢啦。

係咪你隻窗，開唔到。嗯，如果開唔到隻鉸呢，咁就可能要整嘢。

但係如果你開到90度角呢，通常一般呢，你幢樓做開呢，都係$600左右，包你pass. 

但係如果你隻窗個鉸有問題呢，我要搵個師傅幫你跟跟呀。

因為我只係驗窗，咁如果要整鉸呢，我要同師傅夾一夾，佢要收幾錢。

因為如果你過幾多隻呢，盡可能，如果你係90度角呢，都唔駛要咩喇，就...... $600啦, 吓。

咁你睇吓點樣啦，唔該你。"

第二天早上8點

貓:"唔係喎，隻窗冇壞喎，係屋宇署有個驗窗令丫嘛。

應該只需要換鉚釘，所有膠邊冇問題，唔駛整。"

下午6點

卓生: "嗯，我唔知你點稱呼呀小姐。

咁如果唔整由佢啦，幾百蚊。

因為我畀個師傅都千幾蚊喇。

係嘛…咁呢d好閒嘅嘢嚟架啫。我哋XX公司，響你幢樓，都唔知做幾多啦。

你問吓街坊，吓。唔講咁多嘢喇。拜拜。"

貓聽到佢發緊脾氣，但點解呢? 

算了。但佢只係報咗驗窗，咁又問埋佢，有冇驗樓。

貓: "唔好意思，我剛睇返封信，原來係要驗窗+驗樓。請問收費係點計？"

佢又係凌晨回覆: "對不起，大家有誤會。

驗窗公司做全包$600元包Pass." (附大量照片: 合約、客戶簽單、檢驗報告)

卓生一輪咀咁講: "嗯，或者大家有誤會啦吓。

驗樓嗰度呢，你個單位，我最近上一次呢，上個月呢，蔡生就驗過個外牆嘅。

其實點解要驗樓呢? 因為XX 樓呢，原本的露台呢，就唔係住宅部份。

但50幾年前呢，d人就僭建呀。

咁就變咗呢，政府而家就唔拆你，但係呢，要你驗樓，證明結構安全。

咁驗樓呢，就要寫報告，仲要一定係則師、土木工程師、測計師寫，要專業人士。

咁所以做一份report 呢，要$6000.

因為點解呀，而家你罰款呢，要$30000 幾蚊喇。

咁如果做一份詳盡嘅report呢，係要則師同你簽名，做晒report, 再submit 畀屋宇署。

則師簽呢，就肯定冇問題啦。

$6000, 好小事嘅。

但如果佢拉你判監、罰錢呢?

咁你諗吓: 錢就身外物啦，但係坐監，個個都怕坐監啦。

咁所以$6000呢，係我...... 畀費用則師樓，同監管佢。

我收$1000服務費左右啦。咁則師樓收$5000左右。

有咩事呢，責任就唔關你事，係我負責。

則師大家合作好多年喇。咁我唔講邊個啦。

我都有私隱，係咪?咁人哋做開，妥當咪得咯。

佢都成10年牌咯。以前則師，大維修、起樓，乜都做啦。

咁你諗吓啦。你盡快決定啦。

驗窗就好快，1個鐘左右。但係驗樓呢，要寫report, 你預一個禮拜，先畀得到你。

但係如果佢幫你呢，基本上，政府好惡嘛，林小姐就特別惡啦。你都知啦。

你盡快決定啦。我可以後日，搵測計師行，幫你搞呢樣嘢。唔該。"

驗樓，$6000. 老實說，傻貓唔清楚市價。唔敢講貴定平。

不過，佢講咁多嘢，去justify $6000係合理收費。呢樣，我好有保留，決定搵多幾間，格吓價。

幾個鐘後，卓生再留言: 

"如果小姐，驗窗呢，慢慢都唔緊要。驗樓呢，你要快快脆做決定喇，要畀邊個做喇。

因為呢，罰錢都唔緊要。坐監，麻煩呀。咁如果有咩要幫手就出聲啦。係咁。拜拜。"

隔一陣，就打幾次電話嚟。我上緊堂，冇聽電話。

欲知後事如何，請睇Part II.

收租貓: 舊樓的驗樓令、驗窗令 Part 2

一哥月供 (第7期)

日期	總數量	平均買入價	股價	盈富總價值	股息
8/31/2020	401	HK$25.13	25.84	HK$10,361.84	HK$20.79
日期	總數量	平均買入價	股價	友邦總價值
8/31/2020	139	HK$74.02	79.80	HK$11,092.20

2020 Fu's Financial Portfolio （月供盈富、友邦）
	盈富				友邦
	月供金額	數量			月供金額	數量
Feb-20	HK$1,500	53		Feb-20	HK$1,500	18
Mar-20	HK$1,500	57		Mar-20	HK$1,500	20
Apr-20	HK$1,500	60		Apr-20	HK$1,492	21
May-20	HK$1,500	61		May-20	HK$1,447	21
Jun-15	HK$1,466	58		Jun-15	HK$1,463	20
Jul-13	HK$1,460	55		Jul-13	HK$1,438	19
Aug-11	HK$1,458	57		Aug-11	HK$1,452	20
總計	HK$10,384	401		總計	HK$10,292	139

一哥始終唔習慣買正股，已沽出1951錦欣生殖，早前亦止賺了939建行。

不過昨天建行出負面消息，股價大跌。他於收市後的競價時段，重新買入2手建行。

傻貓自問唔識睇股，呢個倉，繼續月供。

一哥如果畀額外資金，講明買邊隻，我先幫佢入貨。

有講佢知，我這個月，在耀才買賣，零佣金。

佢仍然鍾意自己買賣。既然咁信我唔過，算了。

收租貓: 成功出租黑房

 （又試吓寫呢d,畀人話/鬧，就唔再寫呢類嘢。要delete,都係㩒個掣就ok.）

唉! 

間房得100呎，個窗對正戶外走廊，外面仲有度鐵閘。

真係好難出租!😔

已經包差餉地租管理費寬頻。

提供電器: 雪櫃、電視、微波爐、冷氣機、熱水爐、電熱水爐、電熱水壼、煮食爐。

仲有傢俱: 床、床褥、組合櫃、廚櫃、摺枱

層樓分半鐘到地鐵站，24小時保安，樓下有餐廳，轉個彎有超市，過條馬路有運動場。

放咗畀3間地產，成個星期都未有人睇。係1個客都冇。😭

現時冇晒自由行、旅客絕跡，好多賓館, 都將房間，改建成劏房。租金低至$3500, 仲包執房、洗衣乾衣服務。

屯門、青衣區的酒店，月租$3500起，視乎房間景觀、大小、層數。同樣有執房、洗衣乾衣服務。

仲有無數工廈，已改建出租，作住宅用途。同樣冇人規管，冇人巡查。

以下是隨手在28hse找的租盤，還有大量在Square foot, Facebook.

星星中心：靚浴室、酒店大堂

星星中心：有露台、包水費、靚浴室

金富大廈：有洗衣機、衣櫃、梳化、組合櫃、靚浴室

Iplace: 連餐桌、廚櫃、浴室乾濕分離

（見到工廈新裝修、景靚、價平、交通便利、連傢電、華麗大堂，我都想租住。

不過一哥唔肯，佢話犯法。佢認為，劏房係灰色地帶，政府打算規管，即係默認劏房可以存在。但係工廈，冇得傾。

我就認為：無人執法，有等於無。）

仲有，學校採用視像教學，內地生回流內地。大量空置共享單位湧現。

近年，各社福機構，亦提供大量共享空間，供年青人居住。

「福全 ‧ 共寓」青年共居空間

旺角書匯 

仲未計有好多公屋的所謂暗盤，在Facebook 及其他搵樓網站、 地產舖，明買明賣。

劏房，真係好難搵客。😣

傻貓畀完新居的乜費物費, 仲有重新駁電的額外駛費，超窮!😟

成個戶口，得HKD $29193.

過幾日, 畀埋$29000裝修費，乾塘。😢

把心一橫。💪

大前日, 花$300, 在28hse登廣告，再在Facebook各大租盤pages +Expat groups+ Marketplace, 狂登免費廣告。

登完, 即日有10幾個人聯絡我。第二日, 有20幾個人。

但係一聽到間studio的缺陷: 採光度不足, 唔可以開大個窗, 就已讀不回, 或者話要考慮吓。

昨日, 有1個客成功約睇。

今日, 有6個睇樓。我怕煩，搵咗經紀Mark幫我跟。

有一個把聲好斯文，單親媽咪，英文幾好。人好爽朗。

上上手租客係外藉英國教師，上手係內地生，個個都住半年，就返屋企。

今次這位, 都有兼職教英文。

希望她和我的空姐、韓國妹租客，相處融洽。

我減咗少少租,只收一按一上, 租咗畀佢喇。😊

免咗租客佣，我只須畀佣Mark, 就搞掂晒。

一天都光晒喇。

------------------------------------------------------------------------------------------------------------------

P.S.先旨聲明:

傻貓絕對唔係鼓勵人整劏房，不過，大家亦唔需要一聽到劏房，就話一定犯法。

其實，有好多劏房，係合法嘅。如果想了解點樣合法整劏房，可參考這篇文章：

【裝修個案】劏房你就見得多，合法去屋宇署入則你又見過未？（市區舊樓、三百呎、三十萬）

傻貓買樓記: 取免費餐桌小插曲

 今日，一哥放假。

原本，今日有好多搬屋、裝修嘅嘢，需要處理。可惜，嗰間繁忙嘅茶記、嗰個沉睡嘅手機、嗰個毫無責任感嘅夥計......令我哋唔可以跟plan.

早幾日，在網上搵到免費新淨餐枱，款式和第一次買樓時的餐桌，一模一樣，仲可伸延，而且賣家住所，距離新居僅10分鐘車程。今早，傻貓再次confirm賣家，安排取件。

前往巴士站時，一哥竟然電話響，一聽就話“大鑊”。我已心知不妙。果然，下一秒，佢話要即時返茶記。

攞餐枱，要押後。但係人哋免費free傢俱，我哋憑咩改人時間，要人哋就我哋？

傻貓嗰刻冇出聲。

睇過"茶記小妹：廚房一哥"嘅讀者都知道，佢幾重視工作。

一哥對出品好有要求，請人從來不易，加上廚房細，所以茶記一向人手緊張。而家冇晚市堂食，午市嘅盈業額，更舉足輕重。

仲有，人客嚟食嘢，食物質素差咗，就唔會再返轉頭。一哥今日唔返工，收拾殘局，以後生意更難做。

客觀睇，一哥必須返去，主持大局。

撫心自問，我都係工作至上。明明放假，遇上學生要加堂，預備考試，我都會照補習。一哥從無異議。

咁，我憑咩嬲？

既然我搬唔到張枱，問題喺一哥度。

我答: "你打畀賣家，我哋唔攞喇，請佢free畀其他人。"

佢諗咗一陣:"我同你搬咗枱先，唔好意思。我打返去講聲。"

聽到一哥覆老闆，1個鐘後返到。傻貓知搭巴士，趕唔到。行到巴士站，就揚手截的士。

去到石籬，司機在石泰樓，放低我哋。原來要過馬路，搭𨋢，才上到一邨的石逸樓。我哋行錯路，上埋怡峰苑。

去到𨋢口，call定Gogovan, 搬到落樓。等幾分鐘，司機到，仲幫手搬上搬落，好好人。

雖然大家都搬到身水身汗，但係張枱好新淨。我翻新好後，肯定好靚。

我終於明白，點解一個咁有經驗、仔細老婆嫩嘅廚房佬，可以4年冇工開，日日在家打機。這樣的廚房機師，夠鐘返工但no show, 電話唔聽仲熄機，到夜晚先sent message "唔好意思"。冇任何解釋/理由。正常餐廳，都會永不錄用。人係一哥細佬嘅朋友嘅朋友介紹，佢已放上網，提醒同業，小心飛機王。

思考致富讀後感: 渴望成就事實

 

傻貓的投資戰績太駭人，認真記錄每次買賣的原因、回報後，只能承認自己財商太低、選股和估值技巧太差。

然而，「功敗垂成最常見的原因之一，就是遇上一時挫折，便輕言放棄的陋習。」

補習社收入大減，改善財商、投資技巧，可能是出路。

(葉Sir就趁冇乜補習，去菜檔兼職賣菜、做Uber eat外賣速遞，體驗生活。

Ming Sir以前做財經版主編，現在少部份學生，轉視像上課。其餘時間，睇市。)

 

 

Sir John Templeton曾經提出投資心法：

「不要追隨群眾，應採用逆勢操作；投資應以個股的價值為考量，而非市場前景或經濟趨勢，選擇價值被市場低估的股票長期投資，靜待市場回升至合理價，才能賺取超額的利潤。」

價值投資者，注定是孤獨的。而且，就算低位撈到好股，往往要靜候一段可能頗長的時間，才能重新獲得其他投資者的垂青。現時舊經濟股，正因疫情，導致股價低殘。如果有耐性坐貨，一挨疫苗推出市面，回報應該相當不俗。

 

成功，要有想像力。想像力分為兩種：整合式及創新式。

前者只須經歷、教育、觀察，後者須接收別人的潛意識。

“渴望成功”只是一個想法、一股衝動，既渾沌又短暫，既抽象又一文不值，除非將它轉化為等值實體。

要成功，先要有明確目標，做決定時須明快、果斷，中途絕不放棄。假如後來須改弦易轍，必經審慎思考。

舉例：

我們仔細審視個股的行業前景、管理層質素、負債表，並進行估值，計算安全邊際後，可以入手。買入後，不應該因為股價的中短期波動，輕率沽出。如果要換馬，必須審慎，以免“左一巴，右一巴”。沽出的股票，股價繼續攀升，買入的股票，卻持續尋底。

我們可以先集中開發整合式想像力，將抽象的渴望，具體變成文字，草擬簡單而明確的計劃，並預計要付出的代價。然後，按步就班，轉化為事實。

例如：幻想一下自己渴望的生活，計算這樣生活的開支，再了解不同的投資工具的特性，預計可能出現的風險、回報。然後，做好資產配置，每隔幾年，再平衡資產比重。

這個有點像妹妹經常掛在口邊的 "be, do, have".

Be指的是心態，do是方法，have是結果。投資者都想賺錢。人人都只專注have.  但是，有多少散戶，真正能夠打敗市場，發掘到倍升股？又有多少人，能夠在震盪市，從容自若，坐盤穩如泰山？

妹妹常說：這3者，最重要的是be. 成功或失敗，取決於心態。

只要有正面的投資心態，即使沒有高人指點，自己都會透過不同的途徑(do)，找到答案，得到渴望的投資回報(have)。

傻貓經歷多次投資損手爛腳後，囫圇吞棗般看了好多投資書，報讀了龔成老師的投資班，拜讀了一些成功的價值投資者bloggers所寫的blogs,努力學習中。

至於創新式思維，對不起，我還是一竅不通。

此外，活用智囊團的力量，同樣重要。

集結好一支智囊團，就能夠借助成員之間的通力合作，培養毅力。

智囊團主力出謀獻策，所以審慎挑選成員，是成功的關鍵。

 

傻貓誤打誤撞，在這裡遇上好多樂意無私分享、目標一致的bloggers.

傻貓視他們為智囊團，幸得他們的真知灼見、金石良言，傻貓走少了許多冤枉路，擴闊視野之餘，亦優化了投資的心態、方式。最近，投資組合甚至已接近正數，回補之前下跌的帳面損失。

投資結果追蹤：理財重讀生倉儲年結 (2020)

當然，未來的路還很長。做投資界的長勝將軍，殊非易事。傻貓會繼續努力學習。

最後，如果你對這本書有興趣，又不介意看二手書，可留言，安排免費交收。

（後記：　書本已送出。）

傻貓買樓記：210呎蝸居裝修分享

 近日埋首設計新居時，參考返之前自己幾間屋的設計圖及完成照片。

在此分享其中一間的室內設計過程及經驗。

首先，傻貓明白很多人都討厭劏房，甚至認為劏房業主都是惡魔。

這裡我要先講清楚: 傻貓本來是買這個單位，結婚自住的。

只是，物業入手後，當時的男朋友Eric, 家逢巨變，爸爸生cancer, 媽咪患抑鬱症，他自己的凍肉生意，亦一落千丈。

最後，他說要專注照顧家庭，提出分手。

傻貓自己不需要這麼大 (近700呎) 的單位，加上厭煩學校的行政工作，辭職求去。上門補習，收入微薄，才分租單位，應付供樓開支。

好，說完背景。

-----------------------------------------------------------------------------------------------------------

單位實呎: 210

支出 （總裝修+傢俱+電器＋潔具）: 12萬

傻貓的室內設計，一向都以簡單明亮為主，能省則省。

傢俬電器潔具，淘寶 / 二手。

原本單位，由兩個睡房組成:

收樓時的模樣:

全爆後:

納米單位，採光度卻非常好。間隔四正實用。

傻貓簡單劃分為休息區、睡眠區、廚、厠。

裝修完成照片:

休息區

想間屋有少少焦點，整咗幅藍色主題牆，配襯白色實木傢俱。

天花板安裝LED 燈槽，美化橫樑、減低壓迫感。

睡眠區

衣櫃

床的上方，加裝閣仔，增加收納空間，並遮擋橫樑

廚

厠

傻貓連地獄廚神都說不上，簡單如煮公仔麵，都會煲燶煲。

不過，以前的男朋友，每個都是烹飪達人。

Tony煮圍村菜頂呱呱。

泰煎的牛扒、炆的牛腩、每次由加拿大帶回來的烤焗豬肋骨，想起都流口水。

買這個單位時，Eric 都不時整panna cotta, 朱古力慕絲蛋糕，仲有佢媽咪不時煲老火湯。

現在一哥更厲害，8人海鮮餐，都1.5小時搞掂。

平時晚飯，15-30分鐘，就食得。

可能因此，傻貓對廚櫃設計，有一種莫名的執著。

廚櫃

櫃內機關處處。

首先，傻貓身形矮小，上櫃做了升降架，方便取物。

下櫃做: 碗碟架、調味架、鍋具架。

有興趣可睇片:

🏠210 呎蝸居設計 Room tour🏃

傻貓買樓記：裝修報價單

第6次買樓（手上的第3層樓），終於入手了。

裝修方面，繼續搵江師傅幫忙。

這是2年內，第3次找他裝修。

完工日期

他合約寫的起貨日子，次次都meet到，有早冇遲。

價錢

他人老實，提出的價錢，非常合理。

第一次，地產經紀Mark介紹江師傅給我。當時，我貨比三家，最後到現場，看了幾個江師傅實地裝修的單位，才有信心找他裝修。

第二次，我找了江師傅和Fred介紹的劉師傅，格價。劉師傅提出的工程價錢，比江師傅貴幾萬元。不過，江師傅當時很多工程，要我等2個月，才可以開始裝修。

今次，我連格價都懶，剛畀完大訂，就直接找江師傅了。畢竟，他的工程多，如果不預留時間，可能要等好久。

通常這類小單位，裝修費動輒都幾十萬。

成交前1天，驗樓時，我帶江師傅上去視察、報價。第二天，他早上8點，就傳來報價單。

傻貓盡量不做大改動。盡量沿用現有的裝修間隔、傢俱電器。所以江師傅報價: HKD $25,000

一哥看完報價單後，似乎認為太便宜，提出不少改動。

傻貓只好上去單位再仔細查看， 想清楚裝修要求、修改報價單後，再給江師傅。

江師傅修訂後的報價單，總單價（不連電器）$34,000:

其實有很多方法，可以省錢裝修。

例如: 

1. 房門可用門貼、地板可用地板貼。

2. 廚房及浴室牆面，可用瓷磚玻璃劑、清潔及翻新。

3. 冷氣機、抽氣扇: 用雙氧奶，去黃翻新。

4. 用衣櫃貼紙，翻新衣櫃。

5. 梳化: 買梳化套。

6. 浴室櫃: 淘寶

7. 廚櫃: 親自設計、聯絡內地廚櫃製造公司，相熟客服。

8. 浴室: 買地板貼紙、牆貼。

9. 浴室洗手盆: 買翻新瓷釉，去黃變白。

10.重用上手/買2手/沿用現有傢俱、燈具、電器。

不過，一哥只同意第6,7 項。

而且，他不斷說要換冷氣機、抽氣扇，加裝全屋蚊網。他不喜歡灰色房門，要求全屋房門，重新上色。

昨天，他還說要在主人房，加裝閣仔。原因：不想橫樑壓頂。

其實，傻貓的補習社，現時仍然只得小貓三兩隻。

疫情下，不少學生安全至上，寧願先停學。

冇收入，買樓畀完首期，已經捉襟見肘。

不過，對一哥來說，這是他名下，第一間物業。

相信他不想要化妝樓。

而且，他工時長，大概也不想每天放工後，和傻貓加班做裝修工人。

唯有自己再想辦法，開源節流。

剛才，傻貓已聯絡業主，徵得其同意，最後一個月，可以逐日計租。

傻貓盡量對一哥的意見，從善如流。

對他部份裝修要求，慢慢向他解釋技術困難，嘗試讓他明白。

例如: 

1. 拆廚房的小半面牆，但保留外牆

一哥不想太大油煙，不想拆外牆。

但這樣根本放不下雪櫃。

因為放了鋅盆、洗衣機及廚房地櫃後，才是放雪櫃的空間。

換句話說，雪櫃只能放在廚房門附近，佔用部份客廳走廊位置。

他對空間的概念不強，要仔細度尺，用不同方式解說，他才明白。

2. 洗手間浴室櫃的擺位

他想將浴室櫃，拉長，盡用牆身位置。

可是，這樣即使做趟門，亦無法入內。

傻貓要拖著他的手，走進浴室，比劃浴室櫃的擺位，再示範為何無法通過。

因為厠缸對住的是牆。貓不懂穿牆而出。

以前裝修咁多次，每次都係我自己話事。

重建上水間寮屋，我出錢、設計、監工。當時Tony乜都聽我講，根本唔駛點商量，我亦無須顧慮佢感受，因為“邊個畀錢，邊個話事”。

現在，傻貓已經冇乜稜角，亦唔再係家庭收入支柱，更加唔相信“有錢大晒”。

好多準新人，都因為籌備婚禮/婚宴、揀樓、裝修，日嘈夜嘈，甚至結唔成婚。

傻貓而家只係負責畀首期，層樓按揭係一哥，業主都係一哥。

如果佢嬲爆爆，分手，傻貓有機會乜都冇晒。

愈諗，皮膚愈痕。手又開始甩皮了。

傻貓買樓記：室內設計及裝修1: 狂刨YouTube

新居五門歸心，兩間偌大的睡房，令客廳長期偏暗。
傻貓想改善採光度、增加空間感。

找到這個設計，不過被一哥否決了。

他說，傻貓計劃3年後，樓換樓。

賣樓時，2房通常比一房受歡迎。

既然如此，傻貓只能努力從裝修物料、顏色、圖案，以及傢俱擺位、款式、材質，去營造家的感覺。

不過，資金有限，以及環保的考慮，主要沿用現時的傢俱。

【品味家居．沙田第一城】眼鏡房令到個廳好暗點算好？

明天收樓了。

今日，貓約齊放早的一哥、裝修判頭江師傅、地產經紀Meg, 上門驗樓。

一哥不斷走來走去。這是他第二次上來，好像很新奇似的。

我帶著江師傅，逐個區間細看，口述我對裝修的各項要求。

Meg挨著組合櫃發呆。

嗯~~

律師樓的記錄: 單位由2019年7月起，一直拖欠管理費、地租。

上手業主，一位是老婆婆，另一位破產了。

律師樓追收舊契及各式各樣的文件，不容易。

破產署每兩星期才開一次會，每次文件往來，耗時甚鉅。

同時，因為物業已被破產署接收，單位的水錶已拆，已截電、煤氣。

需要重新接駁、安裝，才能開始裝修工程。

疫情關係，水務署只餘灣仔總部，如常辦公，但辦公時間縮短。

明天要填好表格，給一哥簽好名，再遞交。

今明兩天，傻貓的主要工作: 

1. 寫清楚裝修要求，方便判頭寫報價單。

2. 畫好室內裝修平面圖

3. 畫好廚櫃設計圖

溫習外語

放假
同姨甥仔一齊，呆在家學日文。
佢見我學，佢又學。

攞第5名就好開心，畀人扒頭就唔忿氣，好好笑。
姨甥女在旁觀戰，不時插咀comment

體會WFH的雙職媽咪
幾咁辛酸😣
打一陣機之嘛
放過我啦🙄
😂😂😂

1個月免佣買賣股票

收到耀才的短訊。
既然1個月免佣，之後又7折收佣，咁比IB仲抵。
(IB 佣金係 0.08%, 耀才再7 折, 即係 0.056%)
而且，仲有1個月免費串流報價，港股美股都有。

嚟緊用返耀才，買賣港股。
IB就用嚟買賣美股。

佢要求提供其他證券行的近三個月佣金收據記錄，才可七折收佣。

我capture 咗 7 月在 IB 的買賣記錄畀佢。

決定好點裝修新居。

跟住，先知大概有幾多閒錢，可買股票。

其實想買CEF, 不過仍然心大心細。

股票，美股，特別科網股，已經升好多。摸頂入，會做蟹。

不過有幾隻，堅想入。

再睇吓先。

但相比高位入貨，低撈但愈撈愈見底，又係咁得人驚。

之前入1083, 低位入。但蝕住走。

778, 788, 都蟹緊。

必瘦站, 唉。

以前諗都唔駛諗，入 2, 1928, 12, 16, 66, 823, 388, 939, 6823.

現在賣完都唔知買唔買返好。

瘦身2.0 （啓動）

唉😣😣😣

明明食少咗
明明已經由51kg，減到45.55 kg

51 kg,側面

51 kg, 正面

45.55 kg 正面

45.55 kg, 側面

點解愈食愈少+成日做運動
都再減唔到？

諗真d,政府明令室內外都要戴口罩開始，傻貓只行過1次山。以前1星期最少都行1次呀。
仲有，之前1星期最少跑1次步，仲不時跳舞、踩健身單車。

另外，日日玩日文、德文，同埋Overcooked，練完琴、睇吓書，都冇乜時間剩。

Ok. 藉口講完。
咁聽日開始，堅持返，瘦身、護膚，係持久戰。
傻貓你記住，唔好放棄！
妹妹生完2個，都減到。
你唔會差過佢。
加油！


見到網友嘅瘦身2.0, 2個月減咗20磅。
傻貓又東施效顰，迫吓自己認真瘦身先。
不過，佢係80後喎，我70後喎，新陳代謝都慢d啦。
佢生完，餵人奶，瘦得快正常喎。
我生暗瘡、痔瘡，應該易d.

唉呀！Stop!
明天開始減咗個肚腩，向42kg進發啦。