咁多款點讀筆，點揀好？

BB 開始對閱讀產生興趣，日日都會主動攞書，請媽咪講故事。

媽咪忙緊其他嘢，佢就自己攞點讀筆，逐本書點點點。

傻貓家，有好幾款點讀書，例如Food超人系列，Baby all, ORT (Oxford Reading Tree). 不過，如果大家想一筆走天涯，可以考慮以下呢幾款：

小達人

✅ 價錢比較相宜

✅ 外型簡單，好揸手

✅操作簡單，無多餘功能

❎音質一般

❎可以讀到內地大量老翻點讀書，不過需要自己下載點讀檔再用usb放落支筆度，而通常賣家啲點讀檔都係擺上百度網盤，下載速度非常慢

✅有點讀貼紙，可以將YouTube啲read aloud video或者買書送既CD轉檔(需另外自己download software)，將書變做點讀書

✅有錄音貼紙，媽媽們可以自己錄自己把聲做點讀書

小蝌蚪

✅價錢比較相宜

❎比較重，因為有個大頭，唔係咁好揸

❎音質一般

❎有啲唔多用到既功能，例如播兒歌，微信對話，小朋友有時會唔小心按錯去左第二度

✅同小達人一樣，可以讀到內地大量老翻點讀書，基本上小達人讀到既，佢都讀到，不過佢有Wi-Fi自動下載點讀檔，算方便既，下載速度唔快，但好在佢可以一邊下載，小朋友一邊玩住先，只係反應會慢少少

❎下載點讀檔時需要開住支筆，但唔用佢又會叫，有啲煩

❎佢有個鏡頭可以scan書封面，然後當小朋友揭書佢會跟住自己讀，我覺得有啲雞肋既，因為佢load既速度比較慢，小朋友無咁好耐性等

❎無點讀貼紙/錄音貼紙

毛毛蟲

✅價錢貴少少

✅外型靚，算好揸手，不過聽聞有好多小朋友會多手搞爛毛毛蟲兩條觸鬚

✅音質幾好

❎有啲唔多用到既功能，例如播兒歌，微信對話，小朋友有時會唔小心按錯去左第二度

✅讀內地正版圖書，例如ORT內地版

✅有Wi-Fi自動下載點讀檔，方便，下載速度快

✅有點讀貼紙，可以將YouTube啲read aloud video或者買書送既CD轉檔(需另外自己download software)，將書變做點讀書

✅有錄音貼紙，媽媽們可以自己錄自己把聲做點讀書，但錄音貼紙有限，跟機有600張，加購再有300張

Kidsread

❎價錢最貴

✅外型簡單，好輕便，好揸手

✅操作簡單，無多餘功能

✅音質非常好

✅讀正版圖書，除左英文書，有台灣出既繁體字書，有廣東話點讀同教材，但書既數量唔多，同埋貴

❎要自行下載點讀檔入落支筆

✅點讀貼紙同錄音貼紙通用，可以將YouTube啲read aloud video或者買書送既CD轉檔，將書變做點讀書或者媽媽們可以自己錄自己把聲做點讀書

✅貼紙有分層，同一個貼紙可以錄兩個唔同音檔

✅有免費software，可以一次過改大量音檔既file name，方便自己整點讀書，另外可以將CD 音檔轉做點讀音檔格式

✅有兒歌卡，可以自制兒歌playlist 播兒歌