Thursday, June 10, 2021

終於請咗陪月

經過今次入院,傻貓只能承認自己有時太高估自己的能力。

之前報讀咗EDB的陪月課程,但原來時間長、要考試。
而且,完咗個證書課程,仲要讀好多唔同嘅兼讀課程,去學營養學、催乳、小兒推拿之類。
證書課程,要全日制,我要補習,冇可能讀到。
未完成證書課程,又唔畀學兼讀課程,即係唔駛諗。

媽咪、一哥都畀壓力我,要我盡快請陪月。
佢哋知道我唔捨得駛錢,於是媽咪話資助 1 萬蚊,一哥話餘額佢負責。

媽咪推介咗個陪月吳姨。佢之前幫妹妹湊柏霖,只收 $15,000。
吳姨冇讀過咩EDB陪月課程。佢整嘢食ok嘅,個腐乳蒸雞冀好好味。
不過,我同妹妹唔同。妹妹不拘小節,生完柏霖,好快就返工。佢好少同吳姨相處。
我當時賦閒在家,日日在家聽住吳姨無間斷咁大大聲講嘢,真係好厭煩。
另外,佢要求返9放4,9-10:30係去買餸。即係11點左右才到林村。
咁佢嚟到煮晏晝,煮完,照顧一下BB, 就要煮晚飯。
我的晚飯,4點煮好的話,到 7 點,應該凍晒。
太早食晚飯,我又唔想。

自知性格內向,又不擅表達自己,而且對住媽咪嘅朋友、子傑舊同事嘅阿媽,我更加唔好意思講自己的要求。
傻貓為勢所迫,只好厚著面皮,問問山友Sara. 但她聽到要去林村,馬上話女兒年尾結婚,佢可能唔得閒。
不過,佢都話我知,通常陪月的公價大概$24000-$27000.
愈有經驗,愈冇期。因為一早畀人預約了。

谷友的太太上個月,都生咗BB. 我之前問過,都要$23000/ 26天。
見佢話個陪月,係默默工作嘅,咁即係唔會嘈住晒。
我即時問,陪月有冇期。
可惜,佢full 咗,冇期。

阿Wing個BB, 現在5個月大了。
她說她視像面試完陪月後,覺得滿意,就馬上聘用。
她的陪月很好,有禮、肯手洗BB衫。不過煮嘢唔叻,只識煮幾樣餸。月薪都係$23000. 

聽到呢個價錢,嚇死貓。於是,我上網找外援。
在Facebook找到 "【托兒保姆陪月鐘點】合作社-香港"、"香港陪月服務表揚群組"。

見有個菲姨好似好厲害,識古法紮肚,又識催乳、小兒推拿。
佢當然都冇晒期,但係好識做生意,不時發短訊,問我請到陪月未。又介紹不同的陪月給我。
我係超級被動,典型的 last minute fighter. 


因為怕煩,最後揀咗個$20000/月嘅陪月。
佢話2019年畢業後,已完工的陪月經驗有4個,另外,有完工保姆經驗4次,共有經驗1年半。

可能怕我唔信佢。佢發了好多好多超級多食物照片、推薦信。









見到70幾個訊息,全是食物照片、陪月員和服務的家庭、嬰兒合照、好多信。我馬上熄屏。已讀不回。

其實好多推薦信,冇聯絡人姓名、聯絡電話。這樣的信,可信度大概近乎零。食物照片,我上Google,多多都有。


過半個鐘左右,菲姨問我係咪唔滿意呢個陪月,並再三保證她陪月經驗豐富,煮食技巧不錯。
我話諗諗先。

然後,陪月Amy就追問可否即晚見工。話見完唔啱,唔緊要。佢就我地點,嚟葵涌搵我。
我唔敢自己見佢。都唔知講咩好,又唔知面試問佢咩好。
你叫我請中學英文老師就ok. 最少我知道工作範圍,對方嘅強項、弱項,溝通、輔導技巧、帶領英文課外活動的經驗。
問一哥,佢話放工回來,一齊見Amy.
咁我哋就在茶記,邊食晚飯,邊和Amy傾談。

Amy話工作時間係10-7,或者9-6. 1星期放1日假,邊日都ok. 看來是願意溝通的人。

傾完,一哥話ok. Amy話可以即時簽約、落訂。






一哥話好,就ok啦。嘢食我唔太在乎。Amy煮得唔好食,咪搵一哥煮咯。
佢照顧唔到BB, 咪媽咪湊咯。我嘅情緒,有妹妹、Muimui在,應該唔會太波動。
只係一哥想在葵涌坐月,我想在大埔。
最後一人讓一步,首2星期,在大埔。之後,可能回葵涌。都方便返母嬰健康院檢查。

就係咁。畀咗訂金。到時再算。

不過,一波未平,一波又起。
一哥、媽咪,都開始催我請外傭。好煩。
我每日只係補習幾個鐘,唔想多個陌生人在家。
老實講,夏天,加上陀B體溫高咗好多,我開晒風扇都會坐坐吓出晒汗。習慣咗裸體周屋走、做瑜伽、練琴。
無端端多個人仲係外傭,點都唔慣啦。但BB又唔可以獨留家中。唔知點好。
船到橋頭自然直,到時先算啦。

10 comments:

  1. 其實我覺得應該要請陪月,我自己經歷係無請到人,所以野都係同太太一齊搞,當時會好辛苦。
    BB出世,3個鐘要餵一次奶,基本上完全無得訓,所以唸番有D工作其實可以用錢解決就應該交俾人做,唔好自己攬晒上身去做。

    ReplyDelete
  2. 通常最後都係住大埔嗰個赢XD

    ReplyDelete
    Replies
    1. 一人讓一步咯
      要一哥同我嘅妹妹一家同住
      佢又真係會唔慣嘅
      只好每邊住吓

      Delete
  3. 貓姐,你搵姐姐都係預多點時間,依家肺炎關係,時間方面都真係好難判斷

    ReplyDelete
    Replies
    1. 而家冇得面對面interview, 更加唔知外傭質素
      真係唔想請外傭

      Delete
  4. 經濟能力許可既情況下, 請陪月會好一啲。我覚得陪月能夠煮得一手好餸菜固然重要, 更重要的是陪月識唔識做人, 因為BB 出世後, 就會有好多人想比意見, 縱然BB 喺你個肚度走出黎都好, 好多事情都可能係你意料之外, 如果中間有個人隔住, 起碼有咩事上黎都可以賴落陪月度, 家人之間既磨擦都會少少多。

    ReplyDelete
    Replies

    1. 呢樣冇諗過
      呢個想法好正面
      原來請陪月仲有呢個好處

      Delete
  5. //一哥、媽咪,都開始催我請外傭。好煩。//

    要正面思考: 要諗又有機會搵個人幫自己手
    身體精神總有低潮既時候
    多個人多雙手唔駛下下自己做, 有時救到命架

    --Dogdogchi

    ReplyDelete