去年11月，開始學習期權至今，運用期權的投資成績：
本月開局不順，見比亞廸長期低位徘徊，就long put佢。點知佢見底極速反彈，而且力度驚人，愈升愈有，轉瞬股價已經恢復失地。無奈止蝕，並承諾自己：這個6月，不再做long side.
只做short side,仲步步為營，安全邊際高，行駛價遠遠out of money,回報自然也低。
騰訊
2021年1月買入2手正股，成交價$719.5.
為降低買入價，傻貓開咗5張short put, 1張行駛價$600, 4張行駛價$580.
昨日期權結算，騰訊收市價$590.5,動用了大約$60,000 接1手騰訊。
稍後股價重拾升勢，才會開short call. 暫時仍然short put騰訊為主，儲吓貨。接唔到，就收權金。
ARKK
年初走勢強勁，大家叫Catherine Wood做契媽。唔識睇ARKK個頂喺邊，既唔願意摸頂入，又唔想錯失坐順風車嘅良機，就喺1月，開半年後到期嘅short put.
這半年，美國經濟復甦，大家擔心加息。契媽及ARK系列被唾棄，但隨著聯儲局派定心丸，即使通脹，也不會在2023年前加息。最近ARK系列，已重回升軌。
雖然止蝕咗正股，還好short put有少少斬獲。
VOO
雖然權金唔多，勝在穩陣。
感覺有點像買債券，以大博小。
不過，美市長期牛市，暫時冇試過接SPY, VOO.
TSLA
以為佢反彈無力，開short put減低成本價。結果，尋完底，一星期內，股價由$600反彈上$680.
行駛價$590. 雖然接唔到貨，但是期權持貨2個月，收權金$13992.26 (3.04%).算是本月較好的期權操作。
港股期權
傻貓因long put比亞廸，虧損過萬元，避險意識大幅提升。唔敢開近價short put, 都唔敢開short call. Long side更加免問。
到6月10,騰訊好似好有力，又short put吓。貪心果然要付出代價。我見2星期到期的short put, $10.37的權金，回報有1.69%，好吸引。開咗1張，就被行駛了。
走寶系列
本月睇中UPST, FUTU, TSLA, ASAN, JD.
礙於自己承諾唔做long,冇開long call. 但又唔願意開short put,因為美股1張期權，要100股，接貨金額都好大。
全部有得睇，冇得食。
高位減持？
有谷友問：FUTU升得好急，去到$175,係咪應該減持，等股價回落，再重新買入。否則，“有食唔食，罪大惡極”。如果股價回落，自己冇把握良機食糊，就悔恨莫及。
勁人谷猛人雲集，傻貓不敢亂發言。所以，在這個小天地，就這個問題，發表少少睇法。
無論增持、減持，我認為：每個人的持倉成本（倉位）、買入價、持貨能力、風險承受能力、資產配置，都不同。交易策略，自然是神仙過海，各施各法。
如果，大家怕高位稍縱即逝，大可以按比例，逐步減持。或者，將股票分為核心持倉、短線投機部位。這涉及投資者本身，對個股的信念，以及他對個股的內在價值、現時股價的判斷，還有對該行業、該公司的了解。
如果覺得該股佔持倉太大，精神緊張，就減持到可安心進睡的倉位，或者開short call,賺咗權金先。日後即使股價下跌，自己都叫做有錢賺。
不要妄想自己可以賣在最高位，減倉改持現金，也會產生機會成本。日後可能股價一飛衝天，你就只食到魚咀，魚頭、魚身、魚尾，都冇你份。
最後，千萬不要高估自己的風險承受能力；樂觀、悲觀，風險承受能力有天淵之別。升市是在質疑中緩步上行，但跌市可以殺你一個措手不及。
重要的事說多次：開short put前，記得評估自己的持貨能力、可承受風險。
開short call前，也要有交貨準備。見過有另一個谷的谷友，臨近到期日，不甘心交貨，他不但以市價買入當時已急升破頂的正股，還再開 in the money的short put, long call. 後來大行突然齊齊睇淡，又有大股東大手減持，股價急挫。他高位沒套現，還增持，long call 固然損失慘重，short put還要高位接貨，簡直是三重打擊。
