妹夫快測陽性covid-19

 我諗我哋係有啲奇怪嘅。😂

上次妹妹中咗，大家好開心，日日打機放題。每次政府送物資嚟，就好似聖誕拆禮物咁，好興奮咁睇吓有咩好食。😁

今次子傑中咗，又係拿拿臨報上去，政府即日派車嚟接走。
兩個姨甥，就好開心咁過嚟我屋企，打機、練琴、補英文、玩攀爬架、玩波波池、踩單車。一哥仲焗定肉醬螺絲粉，佢哋嘅摯愛。
妹妹就即時擬定地獄減肥plan, 每日狂做運動、控制飲食。唔駛出街，就係自由自在，奉旨hea.想點過，就點過。都好嘅，佢9月返工，而家正好留喺屋企，好好執屋，親子玩玩。

媽咪同上次一樣，知道後，火速過嚟我家，食完嘢，練完粵曲，就出去同朋友食tea, 睇大戲。佢話聽日先返嚟幫我睇BB. 昨晚已經不在家過夜，今晚都係。佢同住，本來係密切接觸者。不過，經常不在家，見佢一面仲難過登天。佢唔想共同時艱，都明嘅。

不過，妹妹上次有數碼通，可以在竹篙灣無限上網。今次子傑用香港寬頻，就冇數據送喇。好可憐......😭