傻貓買樓記：畀大訂

臨時合約日期：5月22日
正式買賣日期：6月4日
成交日期：8月13日

第6次買樓。
一如以往，正式買賣日期前幾日，上律師樓，畀大訂。

上星期五，唔捨得都要放晒福壽園(1448)。呢隻係增長股，日後都會睇位再入。
星期一，用耀才app,　提款入銀行。
昨天星期二，寫支票畀律師樓，日期寫今日。
今日星期三，銀行戶口有數。
------------------------------------------------------------------------------------------------------------

有時諗：我本來係人生勝利組。
港大畢業，開始教書，工作大半年，放棄公屋，用綠表＋9成按揭，買樓自置居屋。

如果爸爸仍然健在，我唔會賣馬鞍山層樓，現在已經供完。
如果ex冇偷拍、冇偷食，我應該仍然住喺上水，私人土地，複式單位、唔駛交租、唔駛供樓，仲有超大果園、沙池，畀Muimui日日無拘無束，自由自在咁周圍走、曬住太陽等我放工返嚟，一齊玩。粉嶺層樓，應該繼續收緊租。工作，我應該繼續做訓導＋教英文，perm 位，年年跳point加人工。學校炒唔到我，我安安穩穩做到退休，公積金應該好和味。

不過現實冇如果。
一哥現在好錫我，仲愛屋及烏，同我屋企人，相處唔錯，仲好錫我隻狗狗。
基本上，我做咩，佢都好支持。

我畀人搶走個老公，我又搶走人哋個老公。
角色轉換，原來可以冇罪惡感。

我連搶走邊個人的老公都唔知，亦冇見過佢。
一哥從來唔提，呢個人，好似冇存在過。
幾個月前，一哥拎住張紙講：絕對離婚令頒咗喇。
傻貓呆一呆：你結過婚？哦。係喎。

反而Carol當日，經常和我、ex一齊行山、玩雷利比賽，又成日嚟我哋屋企bbq.
佢同我講：愛情無罪。
當日朋友，冇人話佢唔啱，因為佢有咗。有咗，大晒。
Ex仲問：點解要佢揀，點解唔可以兩個都留低。

冇得話邊個傷d.
被搶老公的，那錐心的痛、被背叛的感覺，大概差不多吧？

------------------------------------------------------------------------------------------------------------
昨天已付大訂、註冊費、印花稅：

搵律師樓
今次業權唔算複雜，不過上手業主係聯名，通常要對兩間律師行，好多律師樓都嫌麻煩。
一個係破產管理處嘅律師，另一個就係聯名契嘅業主嘅律師，不過原業主已去世，由遺產承繼人的信託基金管理。

好多律師樓都唔識做，連價都報唔到。
律師樓有句格言：唔識做就盡量唔好做！
所以今次搵律師樓，都唔容易。最後用咗賣家律師樓，介紹的律師樓。

收費
今次律師樓有和中銀及東亞合作。

中銀/東亞做按揭：
律師費：$10000
雜費：$2000

匯豐/恆生做按揭：
律師費：$12000
雜費：$3000

雙辣招下，傻貓有份畀首期及所有雜費，冇份做業主。
律師樓的師爺（房地契文員）影印咗我寫的支票，畀我存檔。
日後如果業權有爭拗，這張支票就是我已付款的證明文件。

如果結完又離婚，一哥得一層樓，分唔到幾多畀我。
但傻貓所有物業要對分，仲傷。
都係唔好諗咁多。好多時，表面好，就好。

最近申請樓按、預備首期、搵裝修ideas，加上畀百幾萬出去，但層樓冇自己名，好大壓力。
全身的皮膚都勁投訴，又痕又痛：

要學識放鬆、再放鬆。

講畀媽咪和一哥聽之後，媽咪煲咗紅菜頭粟米紅蘿蔔、一哥煲咗扁豆赤小豆粉葛湯。
飲完，瀉到十彩。不過皮膚已冇咁痕。希望快ｄ好返晒。


每次買樓，傻貓都會用spreadsheet, 開一個excel file:

買樓流程
一哥第一次做業主，如果佢唔清楚流程，可以參考：

買樓日程表
詳列日期，方便記低幾時要見邊個，畀幾多錢。

買樓財政預算
買樓用錢多，清楚日期，預備好資金。




傢俱列表
度好傢俱尺寸，新居合用：保留。不合，二手賣出。