投資中場檢討

Early bird catches the worm未必正確。

每朝食完早餐，貓例必去會所睇3-5份報紙。金晴火眼細讀經濟、財經版。留意異動股、個股推介、國際時事、中美角力、本地新聞。

半年回顧，全職hea + 投資，兼職補習，成績不佳。
(補習堅係兼職，每日教1-2堂，工時1 hr 15 mins to 3 hrs, 仲要一星期休2日息。不過星期六就全日上堂，連lunch time都冇。)

今年上半年，港股一直低迷。
投資回報，慘不忍睹。

證明勤力未必有用，因為一開始已經做錯，繼續用錯力，事情只會向壞的方向繼續發展。

今日試吓中場檢討，睇吓做唔做到 second mouse 啦。
作為一隻唔食魚嘅貓，真心想食芝士。配埋紅酒，一流。



中場檢討：
1. 資產配置

嚴重出錯。

最基本的資產配置：分散地域、類型、產業、年期。

地域
貓一直只懂投資港股。

類型
疫情影響：長時間停課，傻貓才發現一直只懂買賣股票，冇運用其他投資選項，冇債券冇乜現金，亦沒有對沖。
股市低迷時，未有足夠資金，再投入股市。亦由於所有資金都投進股市，帳面損失慘重。

產業
持股高度集中部份行業。

年期
冇債券，冇長短線投資，貓又唔識估值。
結果：不斷和股票談戀愛，只hold少沽。好多時一買，就擺幾年。
好少為股票進行體檢，總之有息就收，平日好少理會

舊組合：殯葬、內銀、科技、資源、地產

新組合：嘗試分散投資

美股

未來會分段增持美股，減少增持港股。

正留意：ARKK, LVGO, DDOG, FAST, PTY, JNJ, DADA, ADBE, V, NVDA

絕大部份都不斷創新高，貓畏高，觀察中。

高息股

為確保穩定現金流，買入部分高息股，包括內銀、房託。

為平衡風險，嘗試慢賺、穩賺，買入盈富基金。

其他

正學習了解債券、優先股、CEF, 以及新加坡Reits, 正留意：C2PU, C38U.

2. 估值技巧
要懂價值投資，必須學習估值。數學是傻貓弱項，暫時未敢接觸。

3. 心理質素
傻貓甚少低賣，但經常高買。主因：補習社、租金收入、股息，一直提供源源不絕的現金流。通常收到錢，就攞去買股票。每次都大手買入，極少分段投資。

不過，巨額(每次幾萬至十幾萬蚊咁)高位買入，只要股價輕微下調，帳面損失已甚鉅。
老實說，冇乜心理壓力。只要疫情受控，補習學生人數自然回升。這半年，新生報讀情況雖放慢，但仍然穩步上揚。
現時復課，不少學生加堂，追進度、預備考試。課堂節數增加、工時長，收入成正比增加。稍後，補習社時間回復穩定，貓好可能會利用早上空閒時間，重返學校代課。如果教育局要求教師，追返進修時數，就會增加代課空缺。反正英文科，長期渴市。

4. 財商
以前習慣睇好多份報紙，方便教通識時，可以用多角度，睇事件。同時，預備不同報章材料給學生，可以教導他們客觀分析事件，以及批判思考的重要性。
放落理財，閱讀應該投資書籍先行。
正在閱讀1本止凡的<<積財智技>>，另外已買2本投資書籍，睇完會寫讀後感，希望加深記憶，並對書本內容，有更深入了解。

總結：
IQ, 福壽園, 都太早沽出。
反而港華燃氣，因不捨得止蝕，仲留住。
騰訊，近日回升，但帳面仍虧損嚴重。這隻股票，是我的死穴。不想沽，亦不想增持，也不想減持。就這樣放著。
搞清自己的思維，才能理性投資吧？

期望吸取教訓後，投資成績會逐漸改善。