參觀新聞館後感

學校搞 life wide learning, 一連3日，唔駛教書，走出課室。

籌備功夫好多，收車費要數錢、追魂 call, 都收到煩。不過今日帶隊去新聞館，真係好唏噓。

新聞館嘅職員，花好長時間，講解新聞知識素養，但唔少學生瞓咗。不斷巡，不斷拍醒，無限 loop. 

導賞員用心介紹展品，學生不斷自己離群、傾偈，仲用手觸摸展品。完全唔似 band 1 學生。直至我出聲鬧人，先稍微收歛。

最唏噓嘅係：

展館有部TV , 播六四時，記者點樣排除萬難，偷運錄影帶，落香港，報導六四事件、天安門屠殺情況。仲有2019 社會運動，警察打市民、學生，阻止記者採訪，記者想方設法，報導事實，將真相講畀市民聽。

同事好震驚，同負責人反映：

佢：“我哋係官校，唔可以畀學生，接觸這類資訊喎。講呢類敏感題材，可能觸犯國安法，牴觸愛國教育的價值觀。”

新聞館其中一位導賞員回應：

“每年都有特首、財政司、政務司，嚟視察。
我哋嘅存在，體現緊言論自由、新聞自由。
佢哋都有睇過呢段片，冇出過聲。

如果我哋都唔講得事實，咁香港就真係好大鑊。”

同事無奈：“咁我返去，同校長反映返”

-----------------------------

傻貓相信，今年好大機會，係我校學生的最後一次，參觀新聞館。