2023 回顧：悶市默默賺，全年41%增長

今年好似少咗好多bloggers review投資成績。
有些人可能認為港股這2年表現疲弱，bloggers回報不堪入目，所以寧願收埋收埋，免得獻世。
但係傻貓認識嘅bloggers,大部份都生活得好好，投資回報也很理想。
其中一位bloggers,早幾天做review,話港股回報全年得18%, 表現較預期遜色。不過，他避重就輕，冇提佢嘅美股倉、期權倉。大家都知道他只是謙虛，報"憂"不報喜。
其他bloggers都係，好多投資喺美股的科技股，今年回報非常可觀。
而投資港股、中概股的bloggers,回報也很理想。
雖然大家的戰場不同，但是都是價值投資者的表表者。大家都做足功課，清楚估值，而且不會見高就追，見跌就走。
這一年，傻貓似懂非懂，讀了好些投資書籍，也慢慢戒掉一些壞習慣，還清期權short put接貨，所做成的虧損後，開始儲優質股，回報漸漸有起色。

投資

睇返2022年年尾的回顧:

2022 回顧：期權輸身家

吸取教訓後，2023年，我極少做期權交易，投資回報唔錯。

另一篇舊文:

2022 投資成績表：賭徒性格導致血流成河

2022年，全年虧損 HKD $243209.93

2023年，戶口net asset value增加 HKD $791,222.36
其中 HKD $245,814.13是現金存款。
全年回報達41%

傻貓終於明白: 找到自己舒服的投資方式，悶悶地、默默地儲優質股，靜待股票價值浮現，比金晴火眼𥄫實apps睇報價，更加容易令資本增值。
現在我不用再通宵睇美股，也不會工作期間趕住登入IB止賺止蝕。
我只是某幾隻股票，分開核心持股，普通持股，然後高位放少少，低位入少少。

家人
家人今年都好好，大家開心、健康。媽咪唱粵曲，愈來愈好聽，開始有捧場客。多咗知音人，她很雀躍。70歲了，但還是叮噹一樣，愛笑愛玩，朋友多得不得了。
妹妹加咗人工，在公司仍然一人之下，眾人之上。她工作上的滿足感，多得不得了。她仍然不喜歡投資，連e banking都冇。層樓現金買嘅，唔駛供樓，信用卡都極少用。現金近100萬，但都不打算做任何安排。連定期也不想做。她總是擔心: 某天家人要用錢時，沒有錢用。
這些我都明白。爸爸當日入醫院時，我戶口輸剩少少，根本不夠錢給他在私家醫院做手術，結果他精精神神地入院，1星期後，就離開我們。
妹夫也加了幾次人工，現在月入3萬幾了。有幾個下屬差遣，他的氣場也不同了。語氣有時比較倔，偶爾呼喝我媽，她有時會因此發脾氣，不過通常哄吓她，好快冇嘢。
妹妹為了幫珮琳改善數學成績，請了2位數學補習老師，其中1個時薪 HKD $800，上門教數。可惜最後珮琳數學只得D. 英文我負責，1星期補2日，只得B. 不過2個姨甥都算乖巧聽話，成績不好，就發掘其他潛能吧。
Muimui仍然健康精伶。但我不敢再帶她到處行山。她每個半鐘要落街小便，關節痛，她也不太喜歡落樓上樓。在屋企附近徘徊散步，她還是笑得很開心的。只昰，她睡覺的時間愈來愈長了。18歲的小狗，我只希望她繼續健康開心。

一哥轉了工作環境，雖然他的身份是散仔，但月薪原來比老二還多，只是比大佬少一些。
大佬好尊重佢，好多嘢都會請教佢，佢又冇乜所謂，都係有嘢就大家一齊做咁。踏實做事的人，都大概係咁啦。職銜冇乜用，做唔做到嘢，大家有眼見。

Eddy今年本來冇K1 offer. 後來妹妹幫手，有2個offers. 最後我聽勁人谷的谷友意見，揀返近屋企，思考方式比學校的學習內容重要。多些親子時間，少些交通時間，小朋友都冇咁辛苦。接送也較方便。
他開始識講句子，中英文都講得到。原來bilingual 的families, 小朋友的辭𢑥真係較多，只係未識運用。

Hayley 4個月大，開始識翻身，也經常撩人傾偈。以前哥哥冇嘅。我諗佢嘅性格可能同哥哥好唔同。佢好少事就大叫，大喊。但都好易滿足，又鍾意笑。
以前哥哥經常要出入醫院、健康院，但Hayley成長線達標，唔駛覆診。打完幾次針，都冇發過燒。

工人

工人姐姐很疼惜我2個BB, 她總是笑瞇瞇的，哼著兒歌，抱著 Hayley, 不時帶他們去playhouse, 籃球場玩，又會講故事給 Eddy聽。雖然她不懂烹飪，不過人無完美，她照顧得2位小寶貝很好，就足夠了。

工作

工作方面，今年很幸運遇到賞識我的科主任，本來代幾天課，結果由9 月中開始，一直代課至聖誕假。1月尾開始，又會回去繼續代課。不用搵工，有工搵上門。

不用天天返工，可以享受教學的樂趣，同時有充裕時間陪伴小孩子，伴讀、唱兒歌、看卡通片、踩單車、踢波、去playhouse, 去海洋公園、廸士尼，一齊去大美督坃沙、吹泡泡，還可以一齊整壽包、燒賣、茶果。這種work life balance 的生活，以前我從未幻想過。