妹妹前日發燒。繼柏霖、珮琳、濼言後，她是第4個喉嚨痛、發燒的人。柏珮每天都有做快速測試，結果陰性。妹妹以防萬一，甫試就中。她看見兩條線的試驗棒，擔心出錯，試了4個牌子，最後接受結果。
妹夫在機場工作，妹妹擔心他被傳染後，會再傳染別人，馬上上網填報快測陽性表格。媽咪長期不在家，就沒填。媽咪的反應也真的令人無語。她當晚回家，入房拿衣服洗澡，然後隔著門跟妹妹談了兩句，就馬上回房，緊閉大門。第二天早上，就帶著行李，逃往四姨家。
媽咪：“我叫佢哋唔好填我。我要出show,畀晒錢，要練歌～”
我：“呢個病本身係空氣傳播嘅，所以要戴口罩。你唱歌，如果傳咗畀同學、師傅，將來點面對佢哋？
你係咪話畀咗錢，佢哋就放過你？”
媽咪：“我出show係半個月後，就算報咗我，到時都出返嚟啦～我諗住佢哋要隔離，我都要出去幫佢哋買物資、嘢食，同埋接送小朋友返學放學，照顧濼言之嘛”
我：“小朋友都要停課，唔駛返學。你唔想困喺屋企之嘛。講真，你從來冇試過24小時留喺屋企。”
佢突然啜泣：“我有試過呀～你哋成日話我唔黐家，我有留喺屋企，一星期有最少兩日”
我：“你留喺度嗰兩日，計唔計出街同人飲茶、食下午茶？妹妹病，你覺得自己冇事，如果傳咗畀人呢？咁你點算？”
佢索性大吵大鬧：“我都話唔過嚟啦～我掛住濼言，嚟睇吓就走喇～你都要話我。我平時冇嘢做，都唔過嚟嘅。
你係咪想困住我，悶死我丫～我好似嗰啲唔識行、唔識走，成日用輪椅出入嘅老人家咁，你就滿意啦～”
唉～講到咁，我躲進遊戲室的波波池算了。媽咪自己喊咗一陣，就黑面拖喼走人。
本來妹妹話想夜晚食pizza，我諗住買返嚟畀佢晚飯。但濼言離開醫院後，我才收到她的WhatsApp 訊息：“我冇得食pizza喇，4點要去竹篙灣”
聽得出她在哭。我哋趕去買朱古力曲奇，我攞埋電話卡，畀佢帶入營。回去傾了一陣，她心情已經平復，說進去stay cation,帶了兩本書、一些零食，預備做吓運動。她的EQ真的很高，這麼快就轉換好心情。如果是我，要自己一個離開家人、熟悉的家，還有埋身食人奶的寶寶，我肯定哭死了。
等車期間，佢悠閒地在睡房塗指甲油。我在後院除草時，我和她各自戴著口罩，她在樓上和我傾談。
妹妹：“改變唔到環境，就改變態度咯～爸爸冇中招，喺屋企照顧小朋友。我入一入去，好快出嚟啦～一哥幫手買餸、煮嘢食，你預備中英數練習，畀小朋友做啦～唔好畀佢哋成日打機”
入到去，佢就整個room tour,叫我哋放心。
佢話環境清靜、床鋪乾淨，1010提供上網，政府仲提供溫度計、血氧儀、零食。餐單有不少選擇，全部免費任選。電視台也不止無線新聞台，還有ViuTV等其他選擇。房間提供兩張單人床，如果妹夫不幸中招，都可以和她同住。政府安排挺人性化。
佢仲話與其畀人逐個問，不如自我引爆，喺facebook自爆。
傻貓自己，一直沒事，這兩天仍選擇休息。此病自己中招。事須慎重處理，如果連續兩天快測陰性，才回補習社。Covid 19 本身不可怕，可怕的是被強制隔離，還有傳播給學生後的愧疚。
