20220224: 1月股票期權結算 (止蝕要狠)

今日2月24，政府開始實施疫苗通行證。好多學生冇打疫苗，唔敢嚟商場，所以超級多學生暫停補習。學校要等政府通知，仍未公佈最新3月起的上課或停課安排。大家都係一頭霧水。14:45那堂，本來得2個現場。但一個嘅媽咪確診，學生係緊密接觸者，在家隔離。另一個的爸爸的同事確診，媽咪要囡女先做檢測，等政府出自費報告後，才決定是否繼續補習。

14:45那堂突然冇人。我睇返自己個blog, 發現好耐冇update投資記錄。一哥話唔知自己嘅錢去咗邊。即係我又冇寫佢嘅月供記錄。咁有時間又寫返。超多本書已經睇完，又係未寫讀後感。每日在家就係陪濼言睇書、餵奶，教佢tummy time. 時間好似飛咁快。

1月期權結算:

Jan	-$27,635.11

本來一切還好，但一個錯誤操作，誤判形勢，仲要唔肯止蝕，結果蝕突。

傻貓期權倉
開倉日	代號	種類	數量	行駛價	合約值	期權金	到期日	預期接貨$	狀態	所得權金	%
30/06/2021	FB	SP	1	$280	100	$8.10	Jan 21	$218,400	expired	$6,309.73	2.89%
31/12/2021	SPY	SP	1	$448	100	$1.28	Jan 24	$349,440	assigned	$990.13	0.28%
06/12/2021	700	SP	5	$430	100	$17.71	Jan 28	$215,000	expired	$8,822.00	4.10%
13/12/2021	1299	SP	1	$77.5	1000	$1.00	Jan 28	$77,500	expired	$979.00	1.26%
12/01/2022	1211	SC	1	$270.0	500	$5.80	Jan 28		expired	$2,894.20	38.70%
16/01/2022	TSLA	LC	1	$1,100	100	$33.53	Jan 28		closed	$1,483.10	5.69%
19/01/2022	TSLA	LP	1	$980	100	$8.05	Jan 28		closed	$4,074.93	65.17%
25/01/2022	TSLA	LP	5	$810	100	$22.20	Jan 28		closed	-$60,933.66	-70.67%
25/1/2022	TSLA	SP	1	$810.00	100	$34.85	Feb 4	$631,800	closed	$7,745.46	1.23%

SPY接貨

Short put 美股有樣好，個pool 夠大，接咗貨，轉個頭就高位賣返走。仲有賺。
$448 接咗 SPY後，$456.22 沽咗。權金袋袋平安，仲賺埋股價升幅。

不過唔係冇危險嘅，最近烏俄戰爭，加上美國加息、縮表，美股連跌多日。
所以我short put SPY, 通常都係1張咁大把。因為我唔敢 naked short. 
大不了，就賣其他股票，接SPY. 

如果升市，美股一定升先。跌市，美股跌，港股只會跟跌，甚至跌突。暫時未見到港股可以擺脫外圍淡市，獨自在偷歡。

LP TSLA 輸突

明明睇圖，TSLA呈現弱勢。但係引申波幅暴跌，就算橫行，都係蝕時間值。無奈止蝕，已跌70%, 共-$60,933.66.

衰咗就認。係自己太自大，唔肯勇敢壯士斷臂。

止蝕係trader生活的日常。一係就乖乖買返穩定收益、固定收益的投資物。
或者奉行價值投資，低買高賣，以時間、耐性，換取回報。

要學人做trader, 又唔止蝕，就注定係輸。

SP FB, 騰訊

好彩set 咗 1 月做到期日。 如果係2月，就入晒價喇。

FB
FB 現價$191, 想不到單月股價已呈懸崖式下跌。看來元宇宙概念，大家並不受落。

另外，歐盟方面的保護私隱政策，對FB的影響負面，大家還是繼續觀望中?

騰訊

大市跌，股王一齊陪跌。

跌到咁，傻貓雖然有1500股正股，都忍唔住調動資金，開始分段short put. 
冇預佢突然回勇，但咁嘅價錢，我唔介意慢慢儲吓貨。
之前$430接唔到貨，咁咪重新開short put, 睇吓嚟緊接唔接到。

Short call 比亞廸

呢隻股票有時跟Tesla股價走。有時又自己顧自己。

冇所謂嘅，總之價高時，我又short call 吓，跌到咁上下，我又short put一下。每次都係covered option. 

正股是自己成手買返嚟，成交價$239.8, 當時唔係好識用期權。

之後不斷嘗試short call, short put佢。

暫時比亞廸的short options, 由去年6月至今，進帳 $25850.2

正股現時股價比買入價略低。會再候低吸納。

總結

止蝕要狠，否則做嚟做去，都係運吉。

要尊重市場，唔好自視過高。

Tesla的引申波幅縮得太快，要睇路。

睇錯方向，斬立決。

香港抗疫：提早暑假

大埔酒樓陸續結業，昨天帶濼言去健康院覆診後，陪媽咪去飲茶。長久沒逛街，只見到處吉舖，市面極冷清。茶樓只開廳面5份1，而且將於2月26結業。放眼四周，餐桌之間距離頗遠，食客全是成人。濼言是唯一小孩，他戴著防疫帽，躺在有全遮蓋的防護罩的嬰兒車。

晚上，一哥說有同事確診。前日那同事發燒，特意回公司請假。當時快檢陰性。今日就說確診了。盼望那同事逗留時間算短，病毒量低，傳染度低。

晚飯後，陸續收到家長短訊。政府宣佈3月起，提早暑假，暫停面授課堂。他們要求暫停補習，包括視像課程。本來1月營業額已回升$52130. 2月跌至$30190. 即使補習社所在位置偏遠，周圍髮型屋、美容院都停業，持牌補習社關閉，我仍然維持每日2至3堂，每堂現場1至2位學生，並有少量視像教學。

可是，3月起放暑假，加上政府只推圍封強檢、全民檢測，沒有治療方案、人手及設施的配套。政府不分重症輕症，只公布確診數字，絕口不提康復人數。凡此種種，徒令人心惶惶。而且，學校用作檢測中心，日後消毒工作稍欠妥善，莘莘學子日後回校上課，只會增加受感染機會。

再說，病毒一直在變種。先不評論香港有沒有能力清零，即使成功清零，日後如何與採用和病毒並存政策的的外國接軌？難道要永遠自我封鎖？病毒清零，但失業率高企，經濟蕭條。恐怕這人禍，並非一時三刻，靠政府的小恩小惠及只受惠部分行業的防疫基金，可以彌補。

中國現時不時封城封區，已經影響供應鏈。文錦渡封關，香港已經試過初四沒新鮮菜。上水屠場83人染疫，關閉一天清洗，豬肉騰貴。全民檢測，如果不配合禁足封城，只會迫使確診者到處傳播病毒，而本來居家抗疫的市民，也被迫外出檢測，暴露於風險中。

以前政府賣廣告，說打針後可去旅行。可是，注射兩劑疫苗後，市民仍然染疫，甚至死亡。旅行，已經變得遙不可及。旅行社亦早已紛紛倒閉。現時沙盤推演，除了香港淪為內地城市，與國際脫軌外，還落得連大家一直引以為傲的法治社會，都壽終正寢。大家擔心的被送中，如箭在弦。

說“打仗”，宣戰的是誰？誰是敵人？戰略呢？軍備呢？後援呢？路線圖如何？一句“打仗”，就以行政凌駕法治。這樣的思維、行徑，令人髮指。然而，國安法之下，誰敢不從？

以色列已經承認疫苗無助減低感染機會。港府沒有足夠數據、理據，仍強行谷針。現時還倡議讓3歲幼童接受疫苗。從各大小染疫自救群組可知，嬰幼兒即使確診，1至3日，已經退燒、康復。

非常羨慕英國人，已經如常生活、工作。疫情開始時，他們已經表示醫療設施不足，呼籲民眾自我隔離、居家抗疫。

反觀香港，倒行逆施。大量病人於寒冬，被安置在醫院外的臨時帳篷，令人唏噓。作為港人，只能自求多福。

寶寶有濕疹? 唔駛怕

剛滿五個月，小濼言已經因為濕疹，入院留醫兩天，出入私家診所兩次。
看著他眼腫面腫，不時用手抓癢癢的皮膚，弄得皮破血流，甚至出水，做父母的，心裡苦，但又無可奈可。

終於，一哥決定大破慳囊 (診金連藥 $1800)，遠道去銅鑼灣，拜訪皮膚專科張醫生。
離開診所時，我們都覺得前所未有的輕鬆。之前的無力感，一掃而空。
服藥、塗潤膚膏，至今剛一星期，濼言的濕疹已經退得七七八八。

特意記下當日對話，以供同樣受寶寶濕疹困擾的父母參考，也可讓自己日後重溫。

脂溢性皮膚炎

寶寶的頭頂，一片一片，魚鱗似的，是甚麼? 這是脂溢性皮膚炎，也可稱為油脂性皮膚炎。

寶寶在媽咪體內時，皮膚非常幼嫩光滑。但是，離開母體後，空氣中有幾樣不同的寄生物。這些寄生物，有機會造成癬類、細菌。

在我們身邊，有很多良性的細菌，無所不在。它非常喜歡在油膩的皮膚上滋生，特別是頭、臉部，例如: 青少年的暗瘡。可是，嬰幼兒的手腳、身軀都是油膩的。因此，寶寶小時候，全身都容易有濕疹。長大後就會逐減退。
森林變沙漠，這些細菌無處容身，只好撤退。

當然，有些人對某類食物敏感，例如: 龍蝦，吃後皮膚就會有反應。就像有人對貓狗、毛公仔，氣管敏感一樣。

治療方法:
藥用洗頭水

這類細菌，滋生的方法和癬類一樣。幸好，60年代時，我們已經有殺癬的藥水，可以保護嬰幼兒。

藥用洗頭水可以大大降低細菌的數量，減低寶寶對寄生物的敏感度。我們會溝淡藥水，讓寶寶洗頭。只要狀況有改善，就可以減少，甚至暫停使用。

異位性皮膚炎

寶寶面上紅通通的，源於遺傳性異位性皮膚炎。

他有異位性體質，較易敏感，導致眼紅、眼腫，長大後也較容易患上鼻敏感、哮喘。現時年紀小，就有濕疹。日後，也有可能患上蕁麻疹。

大部份病人，在25歲前，就已經發病。9成病人，在25歲後，免疫系統穩定，不再發病。

皮膚發炎，沒有細菌、病毒，沒有癬疥，只是過敏發炎，皮膚會又熱又燙。失去水份的皮膚，會粗糙又乾燥，同時變得更敏感，造成惡性循環。愈敏感，就愈易乾燥。因此，我們要幫寶寶注意保濕。

眼、鼻、氣管、皮膚都可以發病，年紀愈小發病，愈快康復。
孩子在10歲時，貎似康復，但進入青春期後，有機會因為荷爾蒙變化，爛面。可是，這只是短期現象，不用擔心。

10年後，可試生物製劑。現時索價過萬元一針，每兩至三星期要注射一次。如果情況嚴重，才需要考慮試用。

治療方法:
塗潤膚膏、類固醇藥膏、服藥

當寶寶皮膚乾燥時，才需要塗潤膚膏。情況改善，就可停用。
寶寶服用的藥水，已稀釋，不含抗生素、類固醇、維甲酸。藥水可以止痕，有昏睡作用。寶寶服後，連夜奶都能戒掉。主要用途: 熟睡時，寶寶不會用手抓面，令傷勢惡化。

類固醇藥膏也是可行選擇。它不是仙膏，適用於手手腳腳、身體。切勿用於臉部、私人部位。使用後，效果立竿見影。可是，必須慎用。

大部份藥房出售的濕疹藥膏，都不適合3歲以下小童使用。如果大家要用，就要自行留意風險。

其他選項: 橄欖油、益生菌

如果家長覺得需要使用橄欖油，幫孩子洗頭，也是可以的。

另外，醫生也支持家長，給寶寶餵食，適合嬰幼兒服用的益生菌，增加足夠的維他命、礦物質，提升免疫力。它未必對改善皮膚質素，有明顯幫助，但不會產生副作用，有益無害。

飲食

寶寶較其他人容易敏感，所以飲食需要節制。家長可以幫孩子抽血檢驗，對哪裡食物敏感。
如果對牛敏感，就吃羊，或者豬。切忌過份擔憂，導致營養不良。

做運動

不少人認為做運動，會產生胺多酚，但要留意身體過熱，可能令皮膚炎惡化。
可以考慮去室內泳池，適量運動，對孩子的健康會有好處。

家居清潔

留意清除塵蟎。家長可以考慮使用大量清水、少量滴露，清潔家品。不必動用漂白水。

念珠菌
寶寶下體，特別是胱門，不時會有念珠菌滋生。在前面小便位置，生殖器會很痕癢、發炎。但在胱門，就沒事。

如果情況惡化，才需要覆診。

美女時裝店老板 變身細心紮肚師

早上九時正，Joanne 準時出現，為傻貓紮肚。生產完孩子後，很多媽咪都面對身材走樣、腹直肌分離的問題。紮肚正是快、靚、正的解決辦法。

開時裝店的日子

傻貓面前的紮肚師Joanne,30 出頭，但少女味十足，美女一名。 原來，她之前一直是時裝店老板，專售韓國女裝。

做老板賣時裝
＂我當時儲落好多熟客㗎。不過，佢哋只認住我買嘢。我請過幾個售貨員，但客人見我唔喺度，就唔入嚟。好困身。＂

為甚麼轉行?
＂社會運動嘛，生意好差呀。有幾個月，做唔到生意，冇錢賺，仲要交租。咁啱租約期滿，就執咗佢囉。＂
之後，她轉去做網購。直播帶貨非常成功。她一日的營業額，高達 $3000. 
為甚麼不繼續這條成功方程式？
"我年紀開始大喇，3字頭，客人通常係剛出嚟做嘢嘅OL. 我 carry 唔到 d 衫嘅少女味。而且，做一場直播，要一口氣換十幾套衫，仲要不斷講嘢，介紹衫嘅特色。其實都幾攰。＂

轉行做紮肚師

獨立自主的Joanne, 不習慣做打工仔。結束時裝店的生意後，得到開辦紮肚學校的表姐Sabina的邀請，她轉行做紮肚師。

“紮肚真係幫到好多媽媽，瘦身之餘，仲改善到水腫等問題。但唔少媽媽都有宮寒，因為生完BB,子宮受損。順產媽媽生完，盆骨闊咗，身型冇咁靚，仲會漏尿。所以我又再進修，學識點樣養宮、暖宮、盆骨修復，希望幫到更多媽媽”

持續進修

她非常喜歡這個職業: "我鍾意對人嘅工作，特別係對住女性。始終自己係女人，明白大家嘅諗法。我又鍾意小朋友喎。做紮肚師，經常見到好多初生BB, 好可愛。而且，呢行好多嘢學，好有挑戰性。

學完紮肚，我又去學咗盆骨修復、按摩通淋巴、用消脂機、磁叉，催乳。每學完一樣嘢，我就可以幫媽媽扮得再靚d. 好有成功感"
"我仲有不斷上網，搵相關嘅資訊，不斷update自己，希望畀到客人多d信心。"

培訓新人

Joanne積極進修之餘，也是trainer, 培訓新人，成為紮肚師。難道不怕被別人搶飯碗嗎? "唔會呀。呢行其實仲係新興行業，我哋每日做得3-4個客人，根本接唔切job. 教多d新人，可以幫到更多有需要嘅媽咪，咁樣好好呀" 

但這行業門檻不高，要吸引客人，除了靠口碑，原來Joanne另一個身份: 保險經紀，也為她帶來一些生意。

保險、紮肚，相輔相成
"通常係媽咪做完紮肚，覺得做得好，就會介紹畀其他親戚朋友。我嘅同事，自己生完，都會搵我紮肚。同事講解保單之餘，有時都會推介我畀生完BB嘅客人。""我好多時推介小朋友嘅成長基金，幫媽咪儲吓錢，小朋友將來讀書，都有錢用。媽咪有需要用，都可以。"

考慮過放棄

"我諗過放棄㗎! 因為拎住d儀器，上門紮肚時，好重、好辛苦。"
 "仲有，媽咪住嘅地方，有時好偏僻。初時搵地址，不斷拉住架車仔，迷路又迷路。好攰。我隻手都試過因為咁拉傷咗。"
"有d媽咪又要好夜先得閒，幫媽咪紮完肚，都好夜喇。試過11點幾，先離開個客屋企，飯都未食。"

後記: 紮肚成效

紮咗10日，成效開始出嚟。雖然一直知道自己生完，肥咗好多，但睇相那刻，還是有點崩潰。點都好，都叫有進展啦。女人瘦身，係終身事業嘛，我唔會放棄嘅。而且，紮肚主要係修復腹直肌，呢方面，我覺得效果唔錯。

✅肚仔和胃仔平復咗好多好多，成個人薄身咗😍

✅肚仔2側腰線由小O修到小S形啦👏🏻

✅肚皮也更緊緻

✅排咗好多毒素，即係屁屁、💩。排清毒素身體好😆，瘦咗7寸👏👏👏🥰

✅腹直肌由上1/中2/下1指👉🏻上0.5/中1/下0指⭐

當然， 🥰仲有進步空間：

💪🏻會繼續用束腹帶4星期，每天最少8小時😚✨

💪🏻要keep住做運動

💪🏻keep住飲食均衡

獨家優惠

傻貓乜人都唔識，所以畀成$8800去紮肚。好肉痛。不過，既然有成效，咁冇所謂啦。
Joanne話，如果有朋友想紮肚，可以聯絡佢，優惠價 $6800, 療程需時最少10日。咁有興趣嘅讀者，就喺留言寫低email, 你哋自己聯絡啦。

林村小故事: 專訪有機農夫陳先生

近日補習社慘澹經營，傻貓突然多出額外時間，重新享受種植之樂。
經過連日的灌溉，生菜開始陸續發芽。當傻貓埋頭疏苗時，鄰居陳先生經過，閒聊兩句後，他盛意拳拳，帶著傻貓，參觀他的農莊。

"塊地10年前租㗎，新世界圈晒附近土地，未起屋前，咪畀我哋種吓嘢咯。"陳生淡淡地微笑著。

"嘩! 好有規模呀!有魚池、雪櫃，仲駁好晒水管，有翻土機，地方仲咁大! "傻貓看得目瞪口呆。

想不到連燒烤爐、燉羊腩爐，都有。閒時與三五友好，圍爐共話，分享收成，簡直是人生一大快事。

"係呀，開頭只係用一細塊地，呢兩年，冇做有錢佬嘅私人司機，唔去吃喝玩樂，咪返嚟耕田咯。"陳生笑著說。

不說不知，陳生之前開辦運輸公司，輾轉做了私人司機10多年，每天就是陪老細吃喝玩樂。如今轉行去康文署做兼職樹藝師，又去機場興建三跑，駕駛墨斗車。他在職場的跌宕，卻正突顯香港人的獨有特質 -- 能屈能伸。只有肯試肯努力，一定不會餓死。

天然肥

陳生的菜田，和其他人有點不同。他拒絕用火槍燒草，也不會施加任何化學肥，只會用米糠。
"大自然供應畀我哋嘅嘢，一定夠我哋所需嘅。我哋食落肚嘅嘢，一定要天然，咁先會健康。食太多化學物質落肚，只會百病叢生。"

此外，陳生還會自製天然酵素，用作肥料。

另外，他採用輪耕制，每塊菜田，隔一段時間，就會休耕，整改。這樣可以讓土地休養生息，重新供應養份，給下一輪的農作物。

魚菜共生

而且，他相信魚菜共生的理念，自行開拓了一個魚池，飼養錦鯉、鯇魚之類。魚兒吃的是新鮮蔬菜及水裡的微生物。然後，魚池的水，又再回歸農地，灌溉農作物。

可是，單憑一人之力，怎樣打理得這裡如此井井有條? 傻貓非常疑惑。

"以前有個叔婆嘅，佢耕那幾畝田。而家走咗喇，返咗另一個世界。我就喺淘寶，淘咗幾條微洞喉。好好㗎，拉一拉部機，就灌溉晒所有農田。"原來如此。

遊走他的農莊，傻貓覺得好像進入了世外桃源。那種泥土的天然氣味，不同農作物，例如芫茜、木瓜、生菜、檸檬樹、野莧、魚藤、椰菜、紅菜頭，全部都有自己的生長節奏。

向利益說不

以前在上水，傻貓也是這樣，吃飯前，才落田割菜。收穫豐富時，就拿著一袋二袋芒果、黃皮，回學校派給同事。有次我還趁著周末，清晨六時多，騎著單車，到上水火車站的天橋賣黃皮。五蚊兩大札，純粹好玩，又可以分享種植的喜悅。

陳生搖搖頭:＂大自然係無私咁分享畀我哋嘅，只要我哋肯付出，就有收穫。我之前種了好多好靚好大嘅牛茄。有個朋友見到，就攞咗去，賣畀個醫生朋友。點解要賣呢? 既然係朋友，就應該送畀佢呀。個朋友話賣咗幾千蚊，我一蚊都冇要。我有手有腳，唔等錢開飯，唔想牽涉任何利益。種菜，應該好純粹嘅，好好享受種植嘅樂趣。＂

搬入林村之後，傻貓多了機會，好好認識這個地方、這裡的人。林村，真是一個地靈人傑的好地方。

臨別，陳生送了兩個木瓜，還有幾束芫茜、酸味草 (學名:酢漿草）給傻貓。這次閒談，不但擴闊了傻貓的視野，還又食又拎，真正滿載而歸。

努力減債中

 

濼言的濕疹仍未斷尾，但已經好返好多。頭仔冇再出水，臉蛋也回復光滑。凡士林、橄欖油，保濕能力很強，對治療嬰幼兒的濕疹，非常有效。

寶寶的情況穩定，媽咪我的心情也好多了。
這星期開始有心思開app睇吓美股。經過幾次期權、正股的操作，債務由 Jan 30 的 55萬，減至今日 Feb 9 的 12萬。加上2月初至今，股市回復起色，股票市值也上漲了9萬幾蚊。整體投資組合沒那麼嚇人了。
不過，投資是馬拉松，這些短線的投資回報，看看就算了。

還是專心埋頭苦讀，較有效改善投資回報。

下星期會開始寫返讀後感，也會重新free書，送給喜歡投資，又有心學習的讀者。
只是，有些投資書籍，著眼於短線炒股，甚至分門別類，整本書只分析資源股，或者地產股之類。
如果讀者本身對價值投資有興趣，可能就不適合看這類書籍。
所以，我偌大的書櫃，先看那一本? 先寫哪一篇讀後感? 還是有點三心兩意。
不管了，隨心吧。

如果真的沒人認領這些書籍，我自己透過閱讀過程，也能不多不少，長點智慧吧?