斷捨離100天：Day 11：隱形眼鏡

搵唔到爛梳，但有一盒2016年買，2021到期，只用咗一對嘅隱形眼鏡😂 眼乾症，本就不適合戴con, bye.

昨天睇咗2個單位。

第一間好細，得2房，諗唔掂工人房。不過，開價270 萬，要嚟收租，回報率初步計，有4.5厘。
第二間 360 萬，超咗 budget. 唔駛考慮。

買物業4, 係想近阿仔阿女返學，但有工人，基本要3房。大埔墟真係冇乜盤，有又out of budget.

 
物業3，跌咗100 萬，咁就收住租先，以租代供。
物業2，市建局搞緊收購重建，但業權問題比較複雜，計份數，唔係單位數目。幢樓又有2個業主立案法團，其中一個冇運作多年。之前幾次有金主想收購，都係咁，唔成事。今次睇吓點。
物業1，租金回報率 4.39厘。好地地，又唔想郁佢。而且，現時冇正職，做唔到新按揭，按兵不動最好。

搵銀行問吓可以點做，但一聽到傻貓冇正職，又供緊樓，已讀不回。

阿妹有流動資金幾百萬。佢一向唔做投資，連網上銀行都唔識用，層樓一筆過買，唔駛供樓。總之錢入咗佢戶口，就係不動產。

但佢自己都心思思想換樓，又想儲錢畀佢2個小朋友去外國讀書。
銀行話，佢月入9萬，但已供緊物業2 (其實供樓的是我，雙辣招時，才找她上會，找媽咪做業主)，佢再買樓，只可做5 成按揭。
未遇到真係好鍾意的單位，我都唔想問佢借。

只係好掙扎，這4年，儲咗 340萬，買260萬呢間，可收租投資。還是再等等，遇到啱價的 3房單位，買嚟自住? 不過唔知等幾耐。而且用晒筆錢，風險好似好大。

剛剛睇咗另一間，大埔墟市中心，唐4樓，250萬，3房。

落咗細訂，查咗冊，睇吓成唔成事。

斷捨離100天：Day 10：DVD機、耳筒、探熱槍、搓手液

 

斷捨離

1. Free回來，完全用唔到嘅DVD機，連遙控

2. 好運先有聲嘅earphones 

3. 全新前額探熱槍，換咗$20

4. 幼兒搓手液（3枝），換咗$100

斷捨離100天：Day 9：內衣、泳帽

 

冇發霉防滑墊，但有發霉的underwear. 斷捨離了。

還有這2頂，擺咗1年，膠logo都融咗嘅泳帽

今日開始計Day 1,用12星期，戒麵包、奶、啤酒、生果，行多少少路，睇吓自己嘅改變。

斷捨離100天：Day 8：面巾、鐘

 

這條面巾，要退役了。

家裡新的面巾很多，但就是懶，習慣用開就繼續用。

一個個小改變，可能就能為生活帶來可見的改善。

順手斷捨離呢個總係行慢咗嘅鐘。

剛和一哥一起時，淘寶咗呢個鐘，好鍾意。

但成日慢，只好在下面掛另一個小鬧鐘，睇時間。

冇報時功能嘅鐘，bye bye喇。多謝你陪咗我哋6年幾。

昨晚有谷友分享：安定教養法

今日會找資料。

生活、工作、家庭都一團糟。

先訂一些簡單目標：

1. 每日斷捨離最少1樣物品

2. 3日內安排好暑期班

3. 每日準時送Eddy, Hayley返學

4. 每日聽最少 1 hr 健康萬象

5. 每日最少行9000步

6. 戒麵包、生果、乳製品、啤酒 

7. 不哮不罵，試行安定教養法

斷捨離100天：Day 7：雞蛋盒、膠樽、啤酒罐、幼兒玩具

 

家裡有大量yogurt 杯、膠水樽、雞蛋carton,平日用嚟整教具畀小朋友。Yogurt 杯，裝food coloring,用droppers畫畫；膠樽，整蛋糕時，用嚟擠奶油；雞蛋盒，認顏色、數字，感官遊戲時，當橋行。

不過好似真係太多了，先回收吧。

順手回收啤酒罐

斷捨離埋今日玩爛嘅手掌玩具

今朝工人又放假。我7點自然醒，諗住夠時間，就同小朋友整紫薯饅頭。點知佢哋玩麵粉，搞到成枱成地都係。

打掃好客廳，幫佢哋沖完涼、洗頭，抱住阿女，拖住阿仔，跑到小巴站，已經12:54. 又遲到返學了。

搭車時，才發現阿仔未做功課。Lunch也只能吃幾啖雞肉飯、2個小饅頭。

我點先可以從容不迫咁，每日準時帶阿仔返學？？？

接放學時，帶小朋友去大家樂食茶餐。自從聽健康萬象後，好耐冇食麵包，今日決定食開心果多士，開心吓。

點知阿女搶哥哥嘅紅豆冰飲，倒瀉晒。成地、成張櫈、我個背包、阿女件衫，全部都污糟晒。我嬲到拍枱、咆哮，全餐廳嘅人基本上秒靜。

我真係唔識教小朋友，我唔係一個好媽媽，育兒比教學艱難幾千倍。我好失敗！

斷捨離100天：Day 6： 艾灸盒、書 ；投資周記

 

屋企冇香氛產品，但有一箱全新的艾灸盒、艾柱、艾灸書。放上free group. 幾分鐘就有2個谷友排。明天交收。

今日冷靜落嚟，知道壓力來源，係工人突然辭職，我無法丟下小孩，開暑期班。這個暑假，補習社 1星期只能開3日。每日只可開2堂。收入驟減。而我仲要喺屋企，照顧小孩。大概係覺得孩子是負累，所以遷怒他們。

但收入來源，也可來自股票市場。別亂來就好。

最近買賣記錄：

中美傾掂數，止蝕咗MP （美國稀土概念股）。

賣晒TSLL, 買返TSLA正股。

止賺MCD, 賣走少少領展，換入少量AMZN, RDDT, MSTR, GDX. 當極少量的Bitcoin, 黃金儲備。

斷捨離100天：Day 5：垃圾剷、玩具車

工人放假，我入兒童房才發現: 大量過期嘅全新尿片。

產婦衛生巾、床墊，都可以送人。

好多好多面膜，過咗期，或就嚟過期。買咗，真係唔等於用咗、靚咗。係時候對自己好啲。

要好好生活喔。

順手斷捨離了：

花園唔知幾時爛咗，工人又冇講要買過嘅垃圾剷

陪伴濼言玩了3年，佢好鍾意，但甩咗轆嘅多啦A夢玩具車

_____________________________________________________

今日又做 bad mom, 對阿仔咆哮、尖叫。

11:09才自然醒，本來心情挺好。但發現missed 阿女堂 playgroup,就覺得自己好差。以前Eddy 從來冇失堂，點解我會忽視阿女。

同佢哋玩咗一陣，就去剪蕃薯葉，預備午餐。

叫佢哋留喺屋企，唔好出嚟。結果妹妹走咗出嚟，哥哥又跟埋嚟。妹妹瞓地、玩水，全身濕晒。

我冇可能一邊煮嘢食，一邊同阿女沖涼換衫。

想煮幾條菜食晏，都唔得。

見阿仔嚇到喊，才冷靜落嚟。

唔沖涼，抹乾身，換衫，出門口。

v手戒麵包的只是我，阿仔阿女仍可以食喔。

唔煮，拎包麻糬，搭的士食。

先搞清楚自己壓力來源，別再拿小朋友出氣。

爭取明天不再做 bad mom. 

斷捨離100天：Day 4：學行鞋、奶樽消毒機

浠妤8月返N班喇。吃貨一名，圓啫啫，挺可愛。

她喜歡赤腳通山跑，布底學行鞋，早就不合穿出。冇鞋帶嘅新鞋，冇著過，但懶配鞋帶。一齊free.買家 no show. 最後送給交收奶樽消毒機的買家。

2個BB 仍然埋身食奶，但已經可以戒奶。我日日賦閒在家，也不用再泵奶。奶樽消毒烘乾機、暖奶器，轉售換了$50

今日本來同小朋友喺花園，玩得好開心。
濼言用markers, 在白板上，畫了架單車，仲作咗個超短的故事，連接詞都用到幾個。
之後，我預備咗盆水，畀浠妤練習用手指搾海棉，再清潔白板。

點知，喺我入廚房預備lunch 時，濼言好開心咁講: "媽咪，你睇吓，我倒晒啲水，著咗rain boots, 玩水呀"

我無名火起，拎起盆水就潑向佢。
倒到成地都係，出入有機會滑倒，妹妹已經個頭已經成日起樓，點解又係咁!!
今日濼言要提早半小時返學，出外參觀。我唔會有時間執手尾。好嬲!!

之後，濼言話: "我想瞓覺呀。媽咪你整到我件衫濕晒，我點瞓呀!我嬲呀!"

我又火大。"你有冇問過我，啲水點用? 你倒水前，有冇問可唔可以攞嚟倒。再有一次，我兜頭淋落你度。"

事後冷靜，我唔明自己點解咁情緒化，以前樣樣嘢都好開心咁同濼言玩，倒瀉水，就一齊鬥快抹抹抹。點解而家日日要為催佢食嘢勞氣，日日家嘈屋閉。

老公工時長，日日早出晚歸。工人就嚟完約，日日心不在焉。健康萬象，明天第13堂，我才剛聽完第 1.5 堂。朋友，我好耐好耐冇見過。或者，我仲有朋友嗎?書，好耐冇完整睇完一本。

上次同吳姑娘傾完，喊咗一場。明明好咗少少，而家又stuck 咗。

每日斷捨離，背後係想整理好自己的生活，想自己重新開心少少。

昨晚，父親節，妹妹邀請我們一齊慶祝。蛋糕，好耐冇食。明知12星期內，不應吃。但還是吃了。爸爸生前，每年父親節，我們都會一齊食蛋糕。可是一哥總是說: "我唔駛。我喺公司食咗。" 連一家人一齊食飯，都變得只是卑微得不可能實現的願望。

母親節，一哥從來不會同我慶祝，也不會教小朋友，送花、外出食飯、畫卡。我不是所有節日，都咁重視。但是，由細到大，父親節、母親節、生日、農曆新年、聖誕，我哋都會慶祝。

昨晚，我好開心咁話: "好彩仲有妹妹，先可以慶祝父親節。"
母親節，只係同我媽食咗飯，我哋買咗部新手機畀佢做禮物。妹夫買咗蛋糕，亦送咗禮物畀妹妹。幾萬蚊一隻鈪。而我? 我乜都冇。我真係覺得自己係零。係我做得唔好，一哥認為我配不上"母親"的身份，所以唔駛慶祝母親節? 

我已經唔知可以點同小朋友相處，唔會再傷害佢哋。我應該躲起來。但工人差不多日日放假。我媽日日出街約朋友、去旅行。我只能被迫對住佢哋。咁樣互相傷害，好咩?

或者我應該斷捨離自己。

斷捨離100天：Day 3：電動玩具車

今日斷捨離嘅主角，係唔識再行嘅電動玩具車。

推嘅時候，有聲有燈，但踩掣唔識行。

唔識行嘅車，得個擺字。Bye bye 喇。

Muimui 畢業禮

今日係Muimui 嘅畢業典禮。

上次被職員接走後，今日我哋可以再見面喇。

儀式簡單而莊嚴。除了家人， 4姨、Jiene,妹夫的爸媽，都出席和Muimui道別。

我哋都身穿黑白色衣服，妹夫介紹Muimui生平，代Muimui致謝詞。妹妹和Muimui 話別。

分享第一份禮物後，一齊睇Muimui嘅短片。照片都係Muimui喺屋企，同我哋相處嘅點滴，仲有我同佢行山、游水嘅照片。過去20年，由領養她回家，我哋有無數嘅美好回憶。每個山頭，都有她的足跡。

有她同行，無論泳綑、玩澗、穿林、夜行，我都無所畏懼。

赤洲弓洲

橫涌石澗

泳綑

攀上天書壁

機槍堡

一齊玩獨木舟

行夜山（魔鬼山、獅子山）

我哋一齊參加過馬拉松、毅行者、盲俠行，籌過唔少善款。好欣賞Muimui每次都不徐不疾，伴在身旁，跑足全程。

我哋一齊唱聖詩：<愛是不保留>。無論一生有多精彩，「一刻燦爛便要走」。21歲的狗狗，離開時還是健健康康，走前四天，還能陪我行山。一直都沒甚麼病痛。我覺得Muimui真的好了不起。行山行到接受訪問，上報紙。Muimui,你比其他狗狗，厲害多了。

祈禱後，唸完天主經、聖母經、聖三一光榮經，我們為Muimui 獻花、合照留念。

最後，去附近茶樓，食英雄宴。

Muimui,你酣睡的樣子，好可愛

"Muimui, 多謝你。你係我最疼惜嘅家人，多謝你陪咗我哋20年，一齊經歷人生嘅重要時刻。你同我搬過幾次屋，陪我行過好多高山低谷，見證我結婚、生小朋友。我好唔捨得你，但你要走喇。你畢業啦，喺彩虹橋可以開開心心，自由自在咁跑嚟跑去。你見到多多嗎？Bobby呢？佢哋認得你嗎？佢哋點呀？你哋一齊玩啦！唔好再蝦佢哋呀！見到爸爸嗎？佢點樣？開心嗎？我哋要走喇， bye bye. 我哋會做一個暫時嘅別離，再見啦。我好唔捨得你，不過你唔駛掛住我哋，我會記得我哋一齊嘅開心時光。去享受你嘅新生活啦!!!"

斷捨離100天：Day 2：鞋架

今日去佈道會，聽到其他家庭的見證。大家的生活，都不容易。

感恩 2 個小朋友，都健健康康，乖巧聰明。我的丈夫、媽咪、妹妹、妹夫，都是最強後盾。

留意到鞋架已嚴重破爛，恐怕會傷及小朋友。就斷捨離了。

放工回家，等車要 15 分鐘，反正站著也是餵蚊，就慢慢行路去下一個站。不知不覺，就由上村球場，行到林村。今早至今，行了15712步。