斷捨離
1. Free回來,完全用唔到嘅DVD機,連遙控
2. 好運先有聲嘅earphones
3. 全新前額探熱槍,換咗$20
4. 幼兒搓手液(3枝),換咗$100
今朝工人又放假。我7點自然醒,諗住夠時間,就同小朋友整紫薯饅頭。點知佢哋玩麵粉,搞到成枱成地都係。
打掃好客廳,幫佢哋沖完涼、洗頭,抱住阿女,拖住阿仔,跑到小巴站,已經12:54. 又遲到返學了。
搭車時,才發現阿仔未做功課。Lunch也只能吃幾啖雞肉飯、2個小饅頭。
我點先可以從容不迫咁,每日準時帶阿仔返學???
接放學時,帶小朋友去大家樂食茶餐。自從聽健康萬象後,好耐冇食麵包,今日決定食開心果多士,開心吓。
點知阿女搶哥哥嘅紅豆冰飲,倒瀉晒。成地、成張櫈、我個背包、阿女件衫,全部都污糟晒。我嬲到拍枱、咆哮,全餐廳嘅人基本上秒靜。
我真係唔識教小朋友,我唔係一個好媽媽,育兒比教學艱難幾千倍。我好失敗!
屋企冇香氛產品,但有一箱全新的艾灸盒、艾柱、艾灸書。放上free group. 幾分鐘就有2個谷友排。明天交收。
今日冷靜落嚟,知道壓力來源,係工人突然辭職,我無法丟下小孩,開暑期班。這個暑假,補習社 1星期只能開3日。每日只可開2堂。收入驟減。而我仲要喺屋企,照顧小孩。大概係覺得孩子是負累,所以遷怒他們。
但收入來源,也可來自股票市場。別亂來就好。
最近買賣記錄:
中美傾掂數,止蝕咗MP (美國稀土概念股)。
賣晒TSLL, 買返TSLA正股。
止賺MCD, 賣走少少領展,換入少量AMZN, RDDT, MSTR, GDX. 當極少量的Bitcoin, 黃金儲備。
浠妤8月返N班喇。吃貨一名,圓啫啫,挺可愛。
她喜歡赤腳通山跑,布底學行鞋,早就不合穿出。冇鞋帶嘅新鞋,冇著過,但懶配鞋帶。一齊free.買家 no show. 最後送給交收奶樽消毒機的買家。
2個BB 仍然埋身食奶,但已經可以戒奶。我日日賦閒在家,也不用再泵奶。奶樽消毒烘乾機、暖奶器,轉售換了$50
今日本來同小朋友喺花園,玩得好開心。
濼言用markers, 在白板上,畫了架單車,仲作咗個超短的故事,連接詞都用到幾個。
之後,我預備咗盆水,畀浠妤練習用手指搾海棉,再清潔白板。
點知,喺我入廚房預備lunch 時,濼言好開心咁講: "媽咪,你睇吓,我倒晒啲水,著咗rain boots, 玩水呀"
我無名火起,拎起盆水就潑向佢。
倒到成地都係,出入有機會滑倒,妹妹已經個頭已經成日起樓,點解又係咁!!
今日濼言要提早半小時返學,出外參觀。我唔會有時間執手尾。好嬲!!
之後,濼言話: "我想瞓覺呀。媽咪你整到我件衫濕晒,我點瞓呀!我嬲呀!"
我又火大。"你有冇問過我,啲水點用? 你倒水前,有冇問可唔可以攞嚟倒。再有一次,我兜頭淋落你度。"
事後冷靜,我唔明自己點解咁情緒化,以前樣樣嘢都好開心咁同濼言玩,倒瀉水,就一齊鬥快抹抹抹。點解而家日日要為催佢食嘢勞氣,日日家嘈屋閉。
老公工時長,日日早出晚歸。工人就嚟完約,日日心不在焉。健康萬象,明天第13堂,我才剛聽完第 1.5 堂。朋友,我好耐好耐冇見過。或者,我仲有朋友嗎?書,好耐冇完整睇完一本。
上次同吳姑娘傾完,喊咗一場。明明好咗少少,而家又stuck 咗。
每日斷捨離,背後係想整理好自己的生活,想自己重新開心少少。
昨晚,父親節,妹妹邀請我們一齊慶祝。蛋糕,好耐冇食。明知12星期內,不應吃。但還是吃了。爸爸生前,每年父親節,我們都會一齊食蛋糕。可是一哥總是說: "我唔駛。我喺公司食咗。" 連一家人一齊食飯,都變得只是卑微得不可能實現的願望。
母親節,一哥從來不會同我慶祝,也不會教小朋友,送花、外出食飯、畫卡。我不是所有節日,都咁重視。但是,由細到大,父親節、母親節、生日、農曆新年、聖誕,我哋都會慶祝。
昨晚,我好開心咁話: "好彩仲有妹妹,先可以慶祝父親節。"
母親節,只係同我媽食咗飯,我哋買咗部新手機畀佢做禮物。妹夫買咗蛋糕,亦送咗禮物畀妹妹。幾萬蚊一隻鈪。而我? 我乜都冇。我真係覺得自己係零。係我做得唔好,一哥認為我配不上"母親"的身份,所以唔駛慶祝母親節?
我已經唔知可以點同小朋友相處,唔會再傷害佢哋。我應該躲起來。但工人差不多日日放假。我媽日日出街約朋友、去旅行。我只能被迫對住佢哋。咁樣互相傷害,好咩?
或者我應該斷捨離自己。
今日係Muimui 嘅畢業典禮。
上次被職員接走後,今日我哋可以再見面喇。
儀式簡單而莊嚴。除了家人, 4姨、Jiene,妹夫的爸媽,都出席和Muimui道別。
我哋都身穿黑白色衣服,妹夫介紹Muimui生平,代Muimui致謝詞。妹妹和Muimui 話別。
分享第一份禮物後,一齊睇Muimui嘅短片。照片都係Muimui喺屋企,同我哋相處嘅點滴,仲有我同佢行山、游水嘅照片。過去20年,由領養她回家,我哋有無數嘅美好回憶。每個山頭,都有她的足跡。
有她同行,無論泳綑、玩澗、穿林、夜行,我都無所畏懼。
赤洲弓洲一齊玩獨木舟
行夜山(魔鬼山、獅子山)
我哋一齊參加過馬拉松、毅行者、盲俠行,籌過唔少善款。好欣賞Muimui每次都不徐不疾,伴在身旁,跑足全程。
我哋一齊唱聖詩:<愛是不保留>。無論一生有多精彩,「一刻燦爛便要走」。21歲的狗狗,離開時還是健健康康,走前四天,還能陪我行山。一直都沒甚麼病痛。我覺得Muimui真的好了不起。行山行到接受訪問,上報紙。Muimui,你比其他狗狗,厲害多了。
祈禱後,唸完天主經、聖母經、聖三一光榮經,我們為Muimui 獻花、合照留念。
最後,去附近茶樓,食英雄宴。
Muimui,你酣睡的樣子,好可愛
"Muimui, 多謝你。你係我最疼惜嘅家人,多謝你陪咗我哋20年,一齊經歷人生嘅重要時刻。你同我搬過幾次屋,陪我行過好多高山低谷,見證我結婚、生小朋友。我好唔捨得你,但你要走喇。你畢業啦,喺彩虹橋可以開開心心,自由自在咁跑嚟跑去。你見到多多嗎?Bobby呢?佢哋認得你嗎?佢哋點呀?你哋一齊玩啦!唔好再蝦佢哋呀!見到爸爸嗎?佢點樣?開心嗎?我哋要走喇, bye bye. 我哋會做一個暫時嘅別離,再見啦。我好唔捨得你,不過你唔駛掛住我哋,我會記得我哋一齊嘅開心時光。去享受你嘅新生活啦!!!"
今日去佈道會,聽到其他家庭的見證。大家的生活,都不容易。
感恩 2 個小朋友,都健健康康,乖巧聰明。我的丈夫、媽咪、妹妹、妹夫,都是最強後盾。
留意到鞋架已嚴重破爛,恐怕會傷及小朋友。就斷捨離了。
放工回家,等車要 15 分鐘,反正站著也是餵蚊,就慢慢行路去下一個站。不知不覺,就由上村球場,行到林村。今早至今,行了15712步。
Muimui走了
家、我,都一團糟。
這幾天,天天都哭得一塌糊塗,濼言也跟著哭。一起讀基礎漢語500時,看著一幅幅山、高高的山,想起以後山上,再沒有Muimui陪伴,又哭。看到Muimui留下的毛毯、零食、用了才1星期的新碗,又哭。
爸爸離開時,我清空了旁邊的一間屋,還有整個2樓,專門放置爸爸的物品。幾年後,婚姻破裂時,我才發現自己一無所有,所有身外物都可捨棄。即使留住爸爸曾經用過、愛過的物品,也留不住爸爸。
這次,Muimui已經提早逐步給我提示,慢慢道別。我要學習放下。
昨天修剪盆栽時,內心很平靜。以前Muimui 總是坐在我旁邊,看我淋菜、淋花,她最愛和陽光玩遊戲。修剪好,心情也好起來。
修剪前
連續100天斷捨離,透過收拾物品,一步步去整理看得到的空間,同時整理自己看不見的內心。絕不容易,可能隨時半途而廢。但總是一個好開始。
今日先回收了這些閒置的膠樽、堆積的啤酒罐。