投資回顧 (2026年9月): 實賺 $38,972 （回報率 +3.51%）

繼續用AI 幫手分析投資表現。

其實就咁睇app, 以為自己 9 月表現好理想。

幸好有AI agent, 才讓我有機會真正了解自己的投資表現。

以前一直用Gemini, 今次試用谷友幫手整的AI agent: Eric. 
Eric 有個性，有溫度，佢幫我預備咗上庭的資料，又識安慰我，仲幫我做埋秘書，規劃每日的時間安排，安排埋小朋友的升小叩門預備工作，仲識幫我分析投資表現。

Eric分析時，除了表面地陳述我的表現，仲會提醒我要面對的風險，要求我明確列出自己的可承受能力: "一個月最多接幾多貨?" 

Eric仲留意到，我美股大賺，港股一直蝕錢。

佢仲識話我蠢，covered call SOXL, USD $140 畀貨人，賺少咗。

而我投資的portfolio, 除了股票、Bitcoin, 仲有物業(租金收入)、債券、基金、月供股票、零存整付。
這些，我平日都冇留意。因為它們已經是恆常投資計劃，我無需操心。
我一直著緊的，是股票、Bitcoin, 它們價格浮動，有升有跌，可考眼光。最牽動情緒。
Eric提醒我，物業、港股的地產股，都係地產，係同一個風險。
而股票、期權的投資，只是portfolio的一部份，不必花太多心思。

人生仲有好多嘢要handle, 而投資方面，物業才是我最應該重視的版塊。
所以我要多留意香港樓市、利率走勢，而不是股票、期權。

9 月投資總結

一、總數

• 8 月尾資產：$1,234,937
• 9 月尾資產：$1,298,718
• 變動：+$63,780——但當中 $20,000 係新錢
• 所以 9 月實際賺：$38,972
• 月回報（TWR）：+3.51%

二、邊個賺、邊個蝕

• 股票：+$12,283
· 美股 +$40,953（SOXL +20,950、TSM +14,426、SMH +6,163、MSTR +2,055、NVDA +1,271）
· 港股 −$28,670（388 −15,268、1299 −4,222、709 −3,500、700 −2,200、390 −2,020、823 −1,459）
• 期權：+$26,079 ← 今個月最大功臣
• 加密貨幣（BTC）：+$114（即係打和）
• 外匯：+$685
• 佣金、交易費、托管費：−$1,373

三、你做對咗嘅

1. 賣 put 收租——呢個係你今個月最好嘅決定。
 TSM（兩個 put 合共 +11,050）、AAPL +3,835、SPY +3,679、EWY +2,310、GOOG +1,550，全部賺 $22400。
2. SPY 725 put 你 9月30日平倉，鎖實 +$3,679。
時機好。
3. 美股倉贏得漂亮：
SOXL、TSM、SMH 三隻加埋超過 $41,000。
4. 你冇加大槓桿——月尾保證金利息 $0，現金升至 $273,706。

四、你做錯咗嘅

1. 港股全軍覆沒。 六隻港股，六隻蝕，合共 −$28,670。
呢個唔係運氣——係我上次講嘅「同你四個物業重疊」：地產 ＋ 金融。
2. BTC 呢一單，白做。 倉位賺 $7,006，但賣出時蝕 $6,125，再加 $766 佣金——最後淨賺 $114。手續費食晒利潤。
3. 16（新地）嗰個 put 蝕 $1,151——又係地產。同你港股、同你物業，同一個風險。
4. 加密貨幣嘅成本係 $934（$766 佣金＋$168 托管費）——係你股票成本嘅幾倍。

五、一句總結

你賺嘅每一蚊，都係美股同賣期權；你蝕嘅每一蚊，都係港股同地產。

未來計劃

轉供 SOXX, VGT, SMH

港股冇乜起色，只會keep 月供 388 港交所；低位入少少領展，收息用；騰訊，逐少入。

美股期權，一直提供現金流。不過之後會再大大力，注意自己的承受能力。
風險管理，不是火燒眼眉，才去沽股套現。而是事先諗好，沽邊隻，有冇足夠現金去接short put.
11月的388, 好大機會喺 HKD $400 被行駛，已做相應的short call. 本身亦有持股，做covered call. 不過咁就係得個吉，唔係低揸高沽。嚟緊 HKD $320 的 388 short put, 再睇有冇機會接貨。

心力交瘁：阿仔單車比賽（日光盃）

連日來，為了預備阿仔的升小面試、單車比賽，仲有同小學打官司，諗點增加客源、搞marketing, 好累。
好彩勁人谷的一位谷友，非常好心咁幫我整咗個 AI agent, 分擔咗好多。

阿仔單車日光盃，最後攞第5。

佢比完賽，好開心咁問: "媽咪，你睇唔睇到我踩得好快呀?"
我都唔知點畀反應。

賽制模仿海外大賽，上 1 round 攞獎的，穿著黃金戰衣，排頭位。其他人抽籤，隔成個車位，第一行，4人，第2行，3人，第3行，1人。阿仔排後面。

起步，佢不斷煞停，左右有車夾攻。

臨尾，佢誤以為起步點係終點。收慢。

我即時提醒，佢先加速，超越2人，攞第5。

阿仔不斷追問我，有冇睇佢踩得幾快，佢係咪好叻。
我只好無奈回應: "你盡咗力嗱?下次做好啲啦"
佢即時轉身、低頭。
我都唔敢再出聲。怕一開口，就會整喊佢。

直到教練出現，笑笑口對阿仔講:"Eddy 你頭先幾個彎都轉得好靚喎，好咬地，個彎又細，好貼，追返好多時間"
阿仔先笑返。

我其實同我爸一樣，只要不是第一名，基本都唔覺得算叻。
入唔到頭3名，不如唔好再嘥時間落去。

但到阿仔，佢似乎覺得，唔係第一，但自己都仲係做得好好。
而且踩pump ride, 好好玩。佢好期待入山玩返越野單車。
我唔理解。不過，既然佢鍾意，咁就繼續學住先。

取消咗全日補習，花咗咁多時間練習，畀咗咁多錢，又買車，又換轆。咁嘅成績，我欲哭無淚。既恨鐵不成鋼，又怕令阿仔有壓力，放棄佢鍾意嘅運動。
這種天人交戰的想法、情緒，加埋連日嚟，為咗追討欠薪，不斷預備證據，仲有彼此已無話可說的"老公"，仲有日日不斷做練習，做完加減數、又做中文認字、閱讀理解、英文認字、親子繪本、串字遊戲、乘數表，
而普通話水平測試、朗誦、音樂LCM, 英文Cambridge starters, 有排都未做到。
距離叩門仲剩返幾個月，每日同時間競賽。
我心力交瘁。

唯有以後再勤加練習，睇吓日後會唔會真係叻。

代課札記: 你做過咁多間學校，正常我唔會見你

早幾日，某校科主任聯絡我，我sent 履歷，佢打畀我約見。
去到先填個人資料表、批改學生作文、試教。
然後在走廊，等科主任、副科主任商量。

他們帶我見校長。

副科主任和校長傾了10幾分鐘。校長出來，對我視若無睹。
再過一段時間，科主任拿著另一位老師的履歷進來。
然後再過很久，校長請我入去面談。

校長:"你點解做代課?"

傻貓答完，校長微笑:"其實你做過咁多間學校，正常我係唔會見你~"

履歷表不是一早寫清楚，我的工作經驗，教過那些學校?
咁你又叫我嚟見?

傻貓:"明白"

校長:"我哋仲有好多其他應徵者，有消息我再通知你"

傻貓點頭:"好~希望你哋真係會考慮我的application, 你哋辦學團體，同我小學、服務過幾年的另一間中學，係同一個"

校長:"咁我哋辦學團體都好大，有好多分支~"

好，明白晒。

呢個位，只係短短幾日的代課。而且我代課一直係一間接住一間，全部都係朋友、舊同事、工作過的學校高層推薦。我代過課的學校數量多，不是正常嗎?
(這次也是舊同事介紹)

如果學校想請一個只代過幾間學校的代課老師，睇完履歷，一開始就不應該找我去面試。

不過最嬲唔係呢樣。
最嬲係早幾日，Bitcoin未爆升，我手痕清咗倉，賺少咗幾萬蚊。
激死我喇!!!!
幾時先記得: 分段買入、分段沽出??????!!!!!!!

小補寶: 我好辛苦

C 靜悄悄地走進教室，默默坐下，交出功課。

她的動作一如以往輕柔，只是比平時更沉默，做練習時，花的時間更長。
傻貓留意到，她今日有點陀背，臉色很黃，嘴唇發白。

隨口提起她學校最近因畢業短片語言，引發的風波。
她開始有點精神，力撐校長平時好nice, 笑容滿面，為人有禮，深受同學歡迎。
Cantonese is forbidden, 其實在不少學校都一直存在，小學也因愈來愈多新移民、跨境學童，平日溝通都多用普通話，廣東話愈來愈少機會用，已是常態。
她很開心這件事得到這麼多關注，來年可能有機會用廣東話，親口多謝老師。

話題一轉，說到近日老師飛書情況嚴重，好多未教已要做功課。各科的DSE papers, 接踵而至。她只能犧牲睡眠時間。可是，最近的英文聆聽測驗，未能集中精神，大退步。

傻貓忍不住說: "你其實已經做得好好! 你底子打得好，人又聰明靚女。
做人，有時唔可以太貪心，樣樣都要做到最好。
你咁樣會迫死自己喔。
真係要prioritize 吓，健康、足夠休息，最緊要。
好好錫吓自己，畀自己抖吓"

C突然眼眶紅紅，感觸落淚: "我好辛苦"

傻貓好明白C 的感受。香港一試定生死，真係好殘忍。
而且，就算你多努力，大學畢業，可能已經要面對失業。每日這麼多新移民、專才，還有港府現時的教育及外勞政策，都在剝奪港人的升學、就業機會。

不止C辛苦，很多港人都很辛苦。只是，政府視而不見，置若罔聞。
沒法子，香港政府、香港特首，都不是我們自己選擇的。政府無需面對市民，只要向中央政府表忠。

生活在香港，大概就是這樣。很多無力感。

升小：報自行

傻貓成個9月，馬不停蹄去咗絕大部份大埔區小學，親身聽校長講座、面對面同學生傾偈、觀察校園設施、了解學校文化。無論開放日、嘉年華、體驗課、家長觀課，都去咗好多。

*大埔小學9月開放日/ 講座/ 活動*

9月4日（五）

田千 4-5:30 zoom 升小講座

9月5日（六） 

黃福鑾 10-11 親子英語活動

黃建常 9:30-12:30 開放日

聖心 2-3:30 「我是小學生」體驗活動

循小 1:30-3:30 校園跳舞體驗活動

梁小 10-12 小一資訊日

蔡小 10-11 親子月球燈

9月6日（日）

循小 1:30-3:30 校園跳舞體驗活動

孫小 10-1:00 開放日

9月9日（三）

黃建常 9:00-10:15 校長與家長座談會

梁省德 5-6 小一體驗課

9月10日（四）

三水 9:30-11 家長觀課

梁省德 5-6 小一體驗課

9月11日（五） 

黃福鑾 6-7 zoom 升小講座

聖心 5:30-7:15 幼小中秋晚會

三水 9:30-11 家長觀課

蔡小 9:15-12 家長觀課

梁省德 5-6 小一體驗課

阮銀 2:30-3:45 網上講座

9月12日（六） 

黃福鑾 9:30-2:30 開放日

田小 2-4 開放日

永光 7-9:30pm 晚間動物園活動

阮鄭 10-4 開放日

阮銀 9-4 開放日

寶舊 10-4:30 小一資訊日

賽小 2-4:30 小一初探日

孫小 6:30 -8:30pm 森林親子探險隊

梁小12-4 工作坊/體驗日

大官小 10:30-12:45 小飛機師體驗日

浸公 10-1/1:30-4:30 開放日

9月13日（日）

田小 10:30-12:30 開放日

田千 9:30-5:00

吳禮和 10-12:45 開放日（羅浮宮藝術節）

三水 10:30-12 升小簡介會

9月14 - 18 日

賽小 1對1 校園實地導賞 （名額有限必須事先報名）

9月15日（二）

三水 4-5 校園導賞

9月16日 （三）

蔡小 9-11:30 家長觀課日

9月17日 （四）

三水 4-5 校園導賞

三水 9-11 校園導賞（加場）

9月19日(六）

八舊 10:30-12:30/2-4 開放日

賽小 2-4:30 小一初探日

三水 9-4:30 開放日

好攰，但總算揀好了。

今次揀小學，傻貓超級大壓力，又無人可商量。

我爸媽2家族，都有好多慢性疾病、遺傳病。所以揀學校時，我考慮的比較多。我知我陪唔到小朋友太耐。

幸好有朋友介紹1個升小WhatsApp group, 好多過來人、現時用家，分享好多有用資訊，為我哋指點迷津。

我預咗要叩門。

我表哥老婆，個仔讀其中1間，區內最受歡迎的小學。佢仔當時派第19志願，最後叩門時，全部有offer.

而家，到我為阿仔，努力預備叩門。希望學校都覺得我仔適合🙏🏻 2年後，阿女就唔駛咁辛苦考小了。

代課札記: 我係教師? 還是獄卒?

甫入課室，只見一堆電線，散落一地。
傻貓:"有冇人可幫手整返好部投影機?"
班長:"Miss, XXX 頭先小息，整爛咗喇"
我:"咁請IT同事，嚟整返好啦"

說時遲，那時快~

XXX站起來，氣運丹田，雙手翻動。砰! 成功反枱。
我:"同學而家好嬲喎，可以自己冷靜吓?還是跟班長，去導修室?"
XXX置若罔聞，瘋狂踢枱，彎腰化身碎紙機，將練習簿、書本、工作紙，撕成碎片。

傻貓唔知佢係咪ASD 的 SEN，駛唔駛特殊處理。
打去校務處，隔咗一陣，有同事帶佢出去。

同學仔報料，XXX隔日就反枱，只要有人提佢個名，話佢，佢就唔理三七二十一，反枱。
喺導修課當值時，傻貓發現，裝修雅緻的自修室，入面只有各科教師用書。
同學犯事，嚟導修，寫完口供紙，就冥想。社工有時會嚟，同學生傾吓偈，了解吓事件。
其餘時間，同學只能呆坐。
我的職責，係確保同學安全留在自修室。

午膳當值，有蓋操場內，學生跟級別，一枱枱坐好食飯。
食完，唔可以走，要等負責老師宣佈。學生只能枯坐呆等。
偌大的操場，只有2部大電視，重複播放政府宣傳國安的短片，講解執法人員，點樣發現羊村繪本影射、煽動民眾，破壞國家安全。
睇咗先知，原來搞讀書會，介紹書籍給家長、小朋友，就係意圖煽動。
國安法真係好恐怖。

呢一刻，我有點疑惑: 我係教師? 還是獄卒?

講開國安，之前喺官校小學代課，校長、副校，三令五申，老師設計、列印的每一張工作紙，都必須經所有該級科任老師、副科主任、科主任、學務主任、副校、校長，共同簽名，才可影印給學生。目的是避免大家不小心，誤中國安法。

結果? 大家都不敢出新工作紙，只會沿用幾年前的舊教材。改一改年份，就可傳閱。
教科書，高層建議直接播 e-book. 不要自己胡亂演繹，小心分享的例子、見聞，誤觸國安法。

作為教師，傻貓有點疑惑: 傳道、授業、解惑，關顧學生，不是教師的本來職責嗎?

現在凡事要先考慮國安， 好像本末倒置了。

----------------------------------------------------------------------------------------------------------------------

今日好難得地有 1 堂 F.5.

睇時間表，真係無語。成個禮拜，F.5 得 5 堂英文，F.1 反而有 8 堂。就算學生有心學好英文，但課堂時間得 35 分鐘，仲咁少堂數，可以點考好DSE?

老師的時間表，編得密密麻麻。 每日 5 - 7 堂，另加每星期 1 次，2堂英文共同備課節、2 堂訓導每周會議。連NET教的speaking class, 都因為 classroom management 問題，科任老師都要入課室 co-teaching. 訓導老師每星期 3 堂的導修課，喺自修室，陪伴有行為問題的學生。Lunch 要睇食飯、當值巡樓。

想備課? 請善用一閃即逝的小息，以及上課前、放學後的時間。

可惜，今日又有同事病假，傻貓要去代課。呢堂係F.3 數學，佢可能識我，我完全唔識佢。
老師寫低，要做晒整本數學 booklet. 不過，學生話，開學至今，只上過1堂。老師冇教過，唔識做。我都唔識。

代課呢堂，只能和學生吹吹水，睇吓課堂秩序。
個人生產力=零；學生學習進度=0。

這樣的學校，究竟想培育怎樣的學生? 創校時的理念呢?

嗯，今日last day, 閒事勿理。

代課札記: 你咩原因要著波鞋?

不知不覺，做代課近 10 年。

今朝入校門，副校問: "Miss Lee, 係咩原因，今日要著得咁 casual?"
我低頭望望，衝口而出: "吓? 咁係 casual? 我著西褲喎。"
副校: "你點解著咗波鞋?"

自從10 幾年前，在學校巡樓時，跣低拉傷後背、大腿，之後我一直著波鞋返工。
去咁多間學校代課，都冇人問過我點解。好多老師都係著波鞋。

我解釋返曾經受傷，要著波鞋返工。明天會提供返 medical evidence. 
副校先放我走。

不過我已經有 hard feeling. 

當學生唔攝衫，化晒妝咁上堂，男同學頭髮長長、女同學染晒髮，而學校卻執著要老師 formal dressing. 係咩玩法?

今次只代 3 天，真心累。

昨天本來只有 4 堂，有老師病假，學校再加咗 2 堂代課畀我。
問題係: 這裡的學生，學習動機極低，不少不諳廣東話、英文。
我昨天只教 F.1 reading aloud, 朗讀課文，35 mins 後，仍有學生一句都讀不出；F.5 只有6 位同學帶書，有 5 位自己搬枱搬櫈，圍埋一齊傾偈，仲有 2 位女同學，拎粉底、唇膏、腮紅，出嚟化妝。
額外那2堂，教中文。F.3 那課 <釀>，其實唔深。學生卻連基本理解能力都未有，8題閱讀理解，都要手拉手式去解題、翻讀課文、解釋詞語。不過原任老師乜都冇交低，只係寫低: "p.1.51 Q1-8".

今日本身 5 堂，3 堂 F.1, 要即堂教完、寫好 1 篇作文，仲有 2 堂導修，午膳當值。Office 剛通知 lunch 後再代多 1 堂 F.5 中文。同樣地，只係講: "完成指定篇章工作紙"，乜都冇交低。

明天相信最精彩。有 6 堂，午膳當值、小息當值。如果有老師 sick leave, 相信都會叫我去代課。咁就 7 up. 

投資回顧 (2026年8月): 單月淨賺 $117,525.05 （回報率 +10.52%）

收到 8 月的monthly statement. 
戶口總資產（NAV）由 7 月底嘅 1,117,374.45 港元升到 8 月底嘅 1,234,937.32 港元，單月淨賺 117,525.05 港元（整體回報率 +10.52%）。

以前傻貓只懂看賺了還是蝕了，金額大概是多少。多得AI, 現在可幫我秒速解讀。

期權成功製造現金流

8 月為我帶來最多現金流的，是short put.
傻貓2個月前，見香港樓市已經開始復甦，判斷香港地產股有頗大機會上升，所以開了short put 新鴻基地產。
股市近月多新股上市，交投旺，港交所也會跟升，short put 港交所。
還有股王騰訊、恒指大藍壽友邦，股價都硬淨，short put 成功 expired.

不過權金主要來源仍然是美股。
TSM, SOXL, AAPL, DUOL, 雖然正股比之前稍為下跌，但收市價遠高於傻貓所定的接貨價。

權金共 HKD $54901.57, 袋袋平安。

比特幣

之前買入了少少，繼續觀望。
它一直都大升大跌，傻貓只當它是組合內的一個小角色，不太上心。

股票

之前以為會有份穩定月薪的正職，short put 時已計入月薪作為可接貨資金。
現時沒有正職，已去除所有槓桿，清還所有孖展投資戶口內的欠債。

DUOL  升勢凌厲，其他美股亦有不少升幅。
繼續持有並觀望。

持續月供港交所。

現金

補習社

主動收入的現金流，只能努力找代課教席、補習社也要想想怎樣做promotion/開源節流。

不少 F.6 已升讀大學，今年學生成績不錯，全部 Level 5, Level 5 star, 最差的都有 level 4. 
其中一位，由 P.5 開始跟我補英文，如願升讀了中大醫科，並得到獎學金。
聽到他的媽咪報喜，傻貓真的開心到跳起。

其他級別，暫時只流失了 1 位學生。只是 F.6 學生的位置，未有新生填補。
現時多出很多空位，收入亦大減。

新開了幼兒認字課程、寫字班。
聽家長分享，其他補習社，通常一堂只教小朋友6-8個字。
傻貓一堂就教識小朋友幾十個字，他們都覺得好驚喜。

我自己一向都用圖像法、聯想法、講故事的形式，教自己 2 個小朋友認字。
他們現在都經常自己安靜地看書、畫畫，我一直以為這樣學習認字，是理所當然的。

當初開辦認字班，只想有人陪濼言一齊認字。他好勝心強，上課時會更專注，學習效果會更好。
預備教材給濼言時，發現其實可以複製給其他小朋友，做教材。
開了一班，很快就有家長介紹給其他人，又開多一班。

雖然收入仍然無法和去年相比，但是小朋友上課開心愉快，傻貓看到他們的笑臉，心情也輕快些。

收租
有幾位租客都未能準時交租。
聽業主立案法團主席講，其中一位租客，還借了大耳窿。
傻貓好頭痛。

小朋友開支

濼言要預備升小學，他報讀了一些面試班，費用也不少。
還有 GAPSK, LCM, Cambridge starters, 這些課程，學費也是頗大的支出。

阿女開始要求上興趣班。她年紀小，但很有主見。
看到哥哥有各式各樣的興趣班，她努力爭取加入。
暫時傻貓已安排她，上了一堂免費游泳班的試堂，又試了3堂平衡車班。
她最近要求學體操、跳舞、唱歌，又想正式學平衡車。

後記:

傻貓既要編好2位小朋友的時間表，又要計算自己的負擔能力，有點吃力。
偏偏可商量的人，半個也沒有。
一哥早出晚歸，無論升學、小朋友補習班開支，全部不聞不問。
他只負責在他day off時，煮飯一家人吃。

對他來說，好像我取消半個月的補習，陪小朋友踏遍區內小學，出席開放日、體驗課、嘉年華，只是浪費時間。
他完全零參與。
我知道早就不應該有期望。如今失望，是我太傻太笨。

代課札記: 有汗出，冇糧出

開咗學3日，我的心情總算平復下來。
早幾天心頭壓著的大石，止不住的眼淚，已成過去。

以下是9月1日發的Thread:

今日開學。 大前日校長話只可用日薪代課請我，請我留任至找到新老師。 前日學校叫我唔駛再返去。 已經搵唔切新學年工作。 好灰好難過。

我冇做錯任何嘢，resume有寫清楚我的教育背景、教學經驗。 點解要咁樣。 校長：“你係好有心嘅老師，對唔住，教育局唔畀我哋請你。 我知你8月返咗好幾日工，真係唔好意思。”

做教師，真係好慘。合約未開始，8月總是回校提早開會。9月唔請你，就係一聲“對唔住”。

學校一直話我未簽約，和我不是僱傭關係，未能出糧。
昨天我聯絡了教育局的官校組，然後去勞工處小額錢債仲裁處，正式落案，遞交了成寸厚的文件、WhatsApp對話記錄，還有教職員證影印本，作為工作證明。之後校長親自打電話嚟，再次道歉。現在只能耐心等待，學校會否補發欠薪，還是10月親身出庭，在法官面前舉證，證明自己和學校存在僱傭關係，看看能否追討欠薪。
其實這份工，我一直以為是神的安排。
我沒有主動申請，學校是從教育局的官校代課老師名單，找到我。Interview完，第二日(6月29日)已經打畀我offer 1 年合約。
發生這件事，負責聘請我的 2 位同事，不斷道歉，非常內疚。
我也很無奈，我要供樓，有2位小朋友要撫養。
失去這筆主動收入，還是學校本來提出有機會跟salary scale, Title: APSM, 跟point (maximum: $69205). 傻貓的心情真的非常失落。
而且，6月30日，當時工作的中學，副校長問我有冇興趣續約，薪酬可能是HKD $35780. 已有offer在手的我，拒絕了。
如今悔之已晚。
躲起來哭了幾天，昨天在"勁人谷"請教，谷友建議我放下，當買一次學習教訓。深思亦認同。向前看吧。

物業2其中一間studio, 因為沒時間翻新、清潔、放匙畀地產，一直丟空。沒想到，放畀地產幾天，就租出了。這筆2按1上，可算是及時雨。

代課札記: 充滿挑戰的新學年

未簽約; 就算簽咗約，都係9月先開始計返工。整個星期，都係無償工作。

紅雨; 仍要返全日工，仲要16:30先准放工，lunch 縮至 1 小時。

全日馬不停蹄地開會。

昨天聯繫了10位非華語的P.1 家長。有些完全不懂廣東話、英文，也不是用Urdu語。我只能WhatsApp和他們溝通，讓他們Google Translate.

今日出席了新生家長簡介會，和家長打個招呼。
我班有4位插班生，其中 1 位有自殺傾向、暴力對待同學，會挑唆同學，孤立排斥他人。
另一位，去年12月到港，一直在家玩手機。爸爸做清潔工，工時長，只懂普通話，覺得小孩喜歡玩手機，不愛上學，沒問題。

這個新學年，似乎相當有挑戰性。

今日小一新生適應課程，好幾位小朋友，完全不懂寫字，無法書寫自己的姓名。
有 1 位女同學，突然站起來，擁抱我，相當熱情；亦有  2 位同學，不時擅離座位，無視老師指示，騷擾同學。

代課札記：緊縮教育經費之後

今日第1天去新校開會，有幾樣觀察，分享吓😂

呢間係官校。政府收緊教育經費開支。

冇水沖廁
教職員廁所因水壓問題，冇水沖廁，人人手動攞水桶沖廁。

課室IT 設備陳舊
政府25-26年的撥款，至今未到校。課室連互動智能白板都欠奉。

人手短缺
校務處只有2位公務員、1位暑期工。
IT只有1位TA,主任解釋1位得力TA,因另一間學校高$7000，升 1 級，轉校。因26-27年度的資金未到位，主任未能估計薪酬，遑論草擬合約。
工友只有2位，都是公務員。正嘗試聘請1位新工友，未知幾時到職。

順帶一提，至今傻貓及其他新老師，仍未簽約。學校未知教育局將提供日薪，還是月薪，也未知MPS 幾多。可是我們由今日起至8月底，已經要每日9-5回校開會。

開會效率不彰

開會內容多半讓同事交待已安排好的工作，例如全校都要聽中文、數學科主任的新學年教擔安排；活動組介紹全校的所有校隊。

去年，全年有17次全體教師會議。

傻貓去年任教直資學校，全年僅有3次教師會議；本科會議，科主任嚴格要求1堂內完成，全年只開了3次。級會，不時以電郵處理，取消開會。

功輔班、課後托管
政府經費減半，往年獲全額資助的學生，今年須分擔費用。

國安法
為嚴格遵從國安法，老師須仔細查閱實體書、電子書、網上資源，是否符合國家安全，並讓同學正向思考個人身份定位。老師不得在社交平台，妄議國策及政府取態。
去年用學校WiFi,不能用WhatsApp.今年措施略放寬，可用WhatsApp,但仍不能瀏覽社交平台。

縮班

學校由30班，大幅縮至22班。

有趣的是，教師其中一個最重要的功能：教學，今日僅輕輕帶過。傻貓想備課，被告知未有教師用書。想了解學生資料，如：特殊學習需要、家庭狀況、學習及操行往績，學校卻因人手短缺，撤銷常務組，因此未能提供。

暑假完結前13天：快閃廸士尼

朝早同哥哥上英文堂後，佢話想去Disneyland.

快快手同佢哋面部、手部彩繪，食埋麥記4道菜，3點幾去到。

玩完水，再玩幾個機動遊戲、睇完lion king 個 show，諗住盡興而歸。

哥哥破天荒強烈要求睇煙花、激光表演，只好捨命陪孩子。小朋友騎膊馬陶醉不已，不停讚嘆。媽咪卻累死了。

今日斷捨離：

未諗到有咩會被時代淘汰。

替代：

被妹妹睇到滾瓜爛熟，又撕爛咗嘅書、佢多手整爛嘅玩具飛機、2星期前的好習慣表。

今日本身唔太開心。

最近一直幫阿仔預備比賽。買咗架淘寶都要 $7000幾，經車會向車廠買，畀埋discount都要 $4676 嘅 CSAWP MOT 16；畀幾百蚊，換平地軚；用千幾蚊，請 UCI level 2 總教練，1對1 加咗2堂；自己不斷抽時間和他練習。

結果今日接獲通知：主辦方冇收到Google form,只收到付款記錄，參賽資格被取消。

經過教練、同學家長斡旋，仍徒勞無功。

因個人失誤，搞到阿仔無法參加這星期日舉行的日光盃。我做阿媽，真係好愧疚。

不過阿仔好快就冇嘢，咁我諗嘢就正面返：

冇所謂啦。仲有無數比賽，以後自己小心啲☺️

暑假前的星期日，所餘無幾，不如開開心心玩埋佢啦！😁

暑假完結前14天：操單車

今日阿仔學體操、彈網，玩輕黏土

阿女一齊玩輕黏土，整咗太空人漫步+滿天星光，學平衡車

我帶仔踩去科學園

雖然不算快，但看得出今次阿仔比上次專心認真。

換咗架16吋CSAWP MOT, 又換了平地轆，他踩得輕鬆好多。

時間僅花多了6分鐘，卻踩多了 5 km.

最欣慰是：他這次完全沒有喊累要停車休息，也沒有再踢甩車鏈。

呢個暑假，佢單車技術有明顯進步。希望他真的愛上這項運動，並養成不輕言放棄的堅毅精神。期待他過幾年，陪我去台灣踩單車環島。

今日斷捨離：

替代：

全新牙寶 Cat Eyed Weirdo, 新年禮物。

購自Log On.半價$70賣出。已成功交收。

好奇心驅使，入咗一個股票谷。

有些谷友未聽過IB, 又唔知道過身後，美股會被徵收40%遺產稅；有些只問 number,；有些知道去強積金講座，有禮物送，忙不迭舉手報名；有因為北美股票基金過去幾年大升，決定轉倉。

幾年前，傻貓也差不多吧？只是有幸睇到止凡、巴黎、風中追風、皮老板嘅blog, 又認識了一些不吝賜教嘅 bloggers, 才知多一點點。

投資回顧 (2026年6月 vs 2026年7月)

習慣了用AI 去分析有意投資的項目，檢視自己的投資操作。

2026 年 6 月及 7 月的整體帳戶資產與損益摘要：

損益指標 / 月份	2026年6月	2026年7月	兩月綜合變動 / 趨勢
期初資產淨值 (HKD)	$1,070,797.22	$1,100,157.41	-
期末資產淨值 (HKD)	$1,100,157.41	$1,117,374.45	+$46,577.23
淨入金 (Deposits)	+$46,000.00	+$12,000.00	累計入金 +$58,000.00
時間加權回報率 (TWR)	-1.65%	+0.49%	7月份投資回報轉正
市值損益 (Mark-to-Market P/L)	-$19,728.63	+$5,508.42	累計 MTM -$14,220.21
單月總損益 (Total Period P/L)	-	+$6,206.00	7月份實現整體盈利

AI 盲點其實蠻多。它太多個人意見，那些意見要自己細心了解真確性，還要避免它盲目奉承。它就像市場先生，你賺錢，它吹噓；你帳面虧損，它罵你。
AI不明白: 有時帳面負數，問題其實不大。只要回報/股息率，高於IB的低貸款利率，就有正回報。

這次AI 大力抨擊我持倉的三大股票:

🔴 表現最差的 3 隻股票 (Worst 3)

1. SOXL (Direxion 3倍做多半導體 ETF)：-$42,297.28 HKD

   • 股價變化：由 $266.71 暴跌至 $114.72（-56.98%）。半導體板塊高位大幅回撤。

2. TSM (台積電 ADR)：-$25,608.21 HKD

   • 股價變化：由 $477.57 回調至 $404.25（-15.35%）。

3. SMH (VanEck 半導體 ETF)：-$13,569.88 HKD

• 股價變化：由 $655.89 回調至 $540.53（-17.59%）。

AI 認為:

⚠️ 做錯的地方 ( What Went Wrong )

• 重倉 3 倍槓桿產品（SOXL）背離價值投資核心原則：

  • 華倫·巴菲特（Warren Buffett）強調：「第一條規則是不要虧錢，第二條規則是記住第一條。」

  • SOXL 不具備內在價值（Intrinsic Value），無法以自由現金流折現法（DCF）進行估值。槓桿 ETF 存在嚴重的波動損耗（Volatility Compounding Drag），當標的指數震盪下跌時，損耗呈幾何級數放大。

• 逆勢攤平槓桿 ETF（Averaging Down on Leveraged Product）：

  • 交易紀錄顯示您在 7 月 7日、16日、27日、29日分批加倉 SOXL（7月共加倉 60 股）。對槓桿工具進行「越跌越買」是極其危險的操作，會將原本一時的市場波動轉化為永久性的本金虧損。

• 半導體單一產業曝險過高 (Industry Concentration Risk)：

• TSM、SMH 與 SOXL 的合計市值虧損高達 -$81,475.37 HKD，過度集中於單一高 Beta 週期產業，忽視了組合的抗風險分散度。

7月半導體的股價走勢欠佳，AI就判斷這是錯誤操作。

它的建議:

💡 專業價值投資者點評與建議

1. 估值計算方法建議：

   • 科技龍頭 (TSM, MSFT, GOOG)：應採用現金流折現法 (DCF Model)：

     $$V_0 = \sum_{t=1}^{n} \frac{\text{FCF}_t}{(1 + r)^t} + \frac{\text{Terminal Value}}{(1 + r)^n}$$

     在股價低於估值 20%-30%（安全邊際）時購入正股持有，享受企業長遠盈利複利。

   • 清算與遠離槓桿工具 (SOXL)：建議逐漸減少或清算 SOXL 等衍生槓桿產品，將資金重新集中於擁有強護城河的台積電（TSM）正股本身。

2. 期權策略優化：

• Sell Put 策略應嚴格限定於優質正股，絕不要對 3 倍槓桿 ETF (SOXL) 或極高波動個股賣出 Put，避免在單邊下跌行情中引發隱含波動率（IV）飆升導致的賬面大額虧損（如 SOXL 135 Put 單筆未實現虧損達 -$11,137 HKD）。

上個月，AI罵我低撈港股，做成虧損。

做錯了的地方（虧損主因）

1. 陷入傳統港股的「價值陷阱（Value Trap）」： 友邦（1299）和港交所（388）傳統上被視為高質素藍籌，若僅用靜態的資產估值法（如歷史 P/E 或 P/B）會覺得它們「很便宜」。然而，在結構性動能減弱的市場中，低估值往往會變成「更低估值」。你在 6 月加倉了 1299（看行權安排及交易記錄）和 388，卻忽視了其內在增長動能的放緩，導致這兩隻港股的盯市虧損高達 4.3 萬元，直接抹平了美股科技股的利潤。

6月表現最差的 3 隻股票 📉

股票代號 / 名稱	6月區間總損益 (HKD)	表現點評
1299 (友邦保險)	-22,368.46 元	港股權重藍籌結構性走弱，成為月內最大拖累。
388 (香港交易所)	-21,163.45 元	受制於港股成交量及整體估值壓縮，跌幅顯著。
MSTR (MicroStrategy)	-7,352.86 元	作為比特幣影子股，受 6 月加密市場大跌雙重打擊。

上次表現最差的其中2隻股票，搖身一變成為本月最佳top 2.

🟢 7月表現最好的 3 隻股票 (Top 3)

1. 香港交易所 (388.HK)：+$27,360.00 HKD

   • 股價變化：由 $363.00 升至 $408.60（+12.56%）。6 月回調後大幅反彈。

2. 友邦保險 (1299.HK)：+$15,600.00 HKD

   • 股價變化：由 $71.45 升至 $79.25（+10.92%）。低估值修復帶動強勁回升。

3. 領展房產基金 (823.HK)：+$4,843.13 HKD

   • 綜合貢獻：股價由 $36.50 升至 $39.12，獲派股息 $633.65 HKD，並於 7 月 16 日逢高減持 500 股鎖定利潤（實現收益 $2,479.28 HKD）。

反思:

AI 擅於在短時間，分析數折。可是投資本身就不是單純睇數據，勤力做功課，就有好回報。
做功課是必須的。尤其在投資前，需要仔細選股。
買賣股票前，都要有規律，明白自己投資背後的邏輯。
不時要檢視持股的質素，以及買股時的因素、想法、客觀環境、業務前景，有沒有巨大變動。

傻貓的戶口，完全沒有欠債。
股票倉，核心持倉是港股 388, 1299, 美股TSM；30%半導體美股/ETF，另有小部份領展、佐丹奴、美股ETF VOO，DUOL, MSFT, GOOG. 
持續月供港交所約 HKD $5000.

現時投資取態及想法，未有大變動。

去年為搬近阿仔、阿女幼稚園，讓他們多些時間休息，買了物業4。最近旁邊的單位轉手，成交價多了40萬。
當時有考慮過多買一個細單位收租，價格都談攏了，最後不想同一時間，處理 2 個單位的買賣、裝修。擱置了。
那時其實有考慮過購入中銀/匯豐正股，最後沒有行動。中銀股價卻已經倍升。
不作為，也是一種選擇。
這次錯過了。長了經驗，吸取教訓。