代課扎記：我係工具人

今次這間學校，1日9堂。每朝早會，唔係落操場睇升旗，就係入課室處理班務、收功課。Lunch time 有20分鐘，睇食飯。放學前，10分鐘班務時間。

學校人盡其才。12天代課，有4天，我一個人，代2位老師。全日只有1堂free堂，可改卷、改作文改正、改默書。其中10天，free 堂要代埋其他請假嘅老師。所以，今次連泵奶都冇時間，加上skipped早餐，奶量暴跌至10-30 ml. 另外，學校安排嘅泵奶室，係6樓1個冇電冇燈，勁污糟嘅殘廁。鎖門後，一片漆黑，只有悶熱。有時胸脹痛得難受，只好趁lunch出去商場泵奶，lunch都沒時間吃了。

原任老師，視力應該有問題。F.4 由9月至今，應該作了12篇作文，但她只改了幾篇，而且完全沒批改改正，也沒有提供 post-writing worksheets. 她給我的工作安排，就是改作文、改改正、整post-writing worksheets. 雖然workload好重，但last day當日，剛好改晒所有的作文、改正。成功感滿滿的。😊

至於中一，學校可能唔chur進度，學生係乖嘅，但學習態度比較hea. 作為班主任，我發現大部分同學，開學至今，冇請家長簽過名。欠交功課、欠書，非常嚴重。我收晒手冊，逐一檢查，並打電話，通知家長。這才發現有些家長，甚至不知道有家長日。閱讀課，冇同學帶書。我安排class librarian 開書櫃，即堂借閱。Librarian 話從未試過早讀。

Office安排我去代課，好多時係臨時打我手機，叫我下一堂去邊個課室。中幾？咩科目？冇所謂。老師都冇放低咩教材。無須教學，只係睇住班學生。

傻貓通常入課室，就問同學呢堂係咩科，學緊咩，幫佢哋溫吓習、預習吓，或者玩吓language games,睇吓英文電影，再抽問吓，睇吓明唔明。

So far 代其他老師時，我教咗

1. Biology: food pyramid, a balanced diet

2. IS: heat conduction 

3. Eng: 

F.1,2,3: vocabulary, reading comprehension, dictation revision 

F.3: phrasal verbs, conditional sentences 

F.5 Paper 1: reading comprehension 

F.5 speaking skills, group interaction 

4. Maths: line chart

5. F.2 LS: 關稅、保護主義

6. F.5 CS: 基本法：國家定義、國家公民、世界公民

7. 中文: 

F.1: 詩三首、友情傘、絕詩、律詩

F.2: 文化知識：中國傳統節日

傻貓好enjoy同學生互動，涉獵咁多唔同科目、範疇，都係好難得嘅教學體驗。

只係學校將我嘅時間表，填得密密麻麻，感覺自己像工具人，情緒有點低落。

我座位附近有另一個老師。他已退休，今年回來當半職教師。他只教1班F.6. 他們已考完DSE。所以他每天就是準時返工、放工，1堂都冇。平時學校日日都有很多老師請假，他就去代課。我來了，他就可以休息吓。😌 

家長信箱：如何緩解幼兒的分離焦慮？

家長提問：

“小朋友3歲，已返N 班。但當要獨立上興趣班，要分離時仍會大喊。去公園玩，如果太多小朋友，有衝撞時，會好驚，唔敢玩。

我地已在上興趣班之前多次向小朋友做心理建設，如指出興趣班有咩好玩，爸媽在外等佢放學。去公園玩時，如果佢驚，都不會強迫她。

請問如何協助她過渡此情況？及分離焦慮？謝謝你的解答。”

老師解答：

“以下方法可以幫助孩子減輕他們的焦慮感：

1️⃣從小事情開始逐漸引導孩子獨立處理。如在家裡完成一些小事，然後逐漸增加難度，直到孩子可以在興趣班或公園中獨立應對。

2️⃣給予他們安全感，在情感上的支持和鼓勵，讓他們知道你會在他們需要的時候在身邊。這樣可以幫助孩子建立安全感，減輕分離焦慮。

3️⃣提前準備好孩子將要面臨的情境。在興趣班或公園前，可以和孩子討論一下即將發生的事情，解釋他們將會遇到的人和活動。

4️⃣建立穩定的日常生活，確保他們有足夠的睡眠和飲食。這樣可以增加孩子的安全感，減輕焦慮情緒。

5️⃣幫助孩子建立社交技能和自信心，可以讓他們更容易適應新的環境。你可以安排一些和其他孩子的互動活動，例如與其他家庭一起出遊或參加遊戲團體，這樣可以讓孩子逐漸習慣和他人相處。

6️⃣當孩子進展順利時，記得給予他們肯定和鼓勵。讓他們更有動力面對新的經歷。”

備註：

傻貓入咗個家長谷，老師、谷友不時分享好多育兒心得。簡單記下，供日後參考。

如果我有事

傻貓上個月，戶口價值，同年頭比較，跌咗100萬。當時只覺得：“嘩，58%，原來係呢個數。呢個moment,值得寫低。”

通常大家都贏就威威，輸就收埋。

傻貓寫blog,就只想記低真正嘅自己，有幾白癡。因為現實的世界，小朋友覺得媽媽一定啱；學生覺得老師一定啱；屋企人覺得你好掂；朋友覺得你唔駛返正職，又搞得掂，好叻。真正的我，就在這裏，面對自己。

呢個人可能太壓抑，分享咗，就被報導出嚟。

36歲，月入4萬。其實唔差。有事業，冇小朋友，開支唔多。如肯戒賭，穩打穩紥，好快就重新,累積到assets.

傻貓冇穩定工作，就嚟50喇。2個小朋友，分別是1.5歲、3.5歲。考慮嘅嘢多啲。

100萬，好似多，又唔係。股市升吓，又cover咗好多。今朝睇，YTD 已去返 -11.5%. 

同文中嘅主角唔同。傻貓唔鍾意借錢。牛熊證，喺投資樹窿，畀匯君鬧完，就戒咗。可能有時，就係欠1個肯鬧你嘅人？

投資回報差，但我睇返，portfolio 嘅股票，都冇乜大問題。帳面跌，就跌啦。順手轉過吓倉。同時，每個月又繼續月供股票、零存整付，低位都被動地，買咗少少股票。

如果家人有事

我和妹妹，都隨時可拎應急錢。

如果我有事

我出事，有3份 in force嘅保險，錢唔多，估計都夠應急:

1. 醫療、意外、危疾

傻貓唔希望自己成為家人嘅負擔。醫療費用，可以搞垮一個家庭，奪去他們的將來。健康，是最大的財富。但凡事有例外。這份保險，就係佢哋嘅保護傘。

2. 人壽

3. 年金

另外，仲有份早就供完嘅儲蓄保險，滾存紅利中。到時可應急。

同時，有3間收租物業。如他們需要，賣出套現，也可以。只是要等幾個月成交。

戶口有儲備金，即使老公冇工開，仍足夠2個孩子，半年生活費。

半年，股票戶口嘅錢、股票，都用到了吧？

如果太長命

但如果，傻貓長命，又夠錢用嗎？

保險年金，到時就派上用場，唔駛攤大手板，問仔女乞。

但幾多錢，先叫足夠？

老公負責：一日三餐、屋租、工人月薪、水電、石油氣、貓糧。

現時生活開支，主要係搭車返工放工，畀小朋友學這學那。讀券校，本身就冇乜開支。

補習、興趣班，隨時可cut. 亦已付諸實行，cut咗平衡車、跳舞、跆拳道、體操、七田真。阿仔話唔鍾意，咁算啦。

拼音班仲有幾堂，學完唔續。成$1200/堂，特登搭去沙田，單對單，但阿仔唔鍾意上堂，仲搞到冇時間親子閱讀、玩遊戲，唔抵。

小朋友慢慢長大，會有更多開支，好似補習、學琴、羽毛球、跳舞、暑期班，但都有數計，有限開支。自己開補習社，到時加埋自己小朋友，一齊上堂，就可以了。

只要阿女唔讀私幼，仔女都唔讀直小、直中，唔打算海外升學，就有數計。當然，如果2B到時想海外升學，就要預鬆幾十萬。

想來，最大支出，就係旅行、保險費。

投資回報改善中: 負58%➡️負14.58%

投資，天才不多。更加多是靚牌打到爛嘅人。即係我。

上個月，戶口帳面數跌咗100萬。

緊張，減倉TSLA.

每次減持，都接近最低位。

股價回升，手上嘅幾百股TSLA,距高位仍有距離，但條數靚仔返。

回想，當時冇持倉壓力，冇經濟負擔，純粹愈跌愈多，見討論區哀鴻遍野，自己就減持。好白癡。

套現嘅錢，買咗TQQQ,回報比TSLA差。

幸好，每個月規律地零存整付、月供股票，仍進行中。

每年儲蓄保單，也進行中。

戶口價值，由350萬左右，跌咗唔少。只剩281萬。

現時戶口現金45萬。有便宜貨，才逐少買。現金流，才提供到安全感，股票大特價，才有子彈吸納。

近日買賣記錄：

股票：

1. Apr 30: SOLD 200 1299 @SEHK @ 58.15

2. Apr 30: BOUGHT 10,000 939 @SEHK @ 6.37

3. May 2: SOLD 1 TSLA Jun06'25 310 CALL @ 13.15

4. May 2: BOUGHT 10 TQQQ @ 59.03

貼錢買難受: 去邊唔重要，睇同邊個去

去完富國島返嚟，投入工作。

但一哥日日問住: "旅行啲錢，計好未?"

好煩。

機票錢、villa錢，都係我出唧。
但傻貓不喜歡拎現金，一哥就兌換咗越南盾，畀吓入場費、買吓嘢食、手信。有限數吧?

負責計錢的是我妹妹。
她每次都寫低邊個出錢，用喺邊。

回港後，大家工作都忙。妹妹更是日理萬機，不停開會、追數、搞training. 

一哥這樣不斷追問，令我和妹妹都很煩躁。

最後妹妹計好，PayMe咗畀佢: HKD $1163

一哥睇到條數，又崩潰咗。"咁貴? 用咗咁多錢?" "旅行咁貴?"

再問多幾句，佢先講: 買咗2隻long call TSLA, 蝕咗錢。
傻貓唔明: 駛錢去旅行，都叫同屋企人一齊，enjoy吓丫。賭錢，除咗刺激，有咩得著? 
唔捨得駛錢同屋企人去玩，但幾冇錢，都要去賭。輸咗仲輕描淡寫。
我好無奈。

因為一哥乜都唔願玩，我哋去到富國島，冇行海底隧道，冇孭樽潛水，冇睇海星，冇去睇Kiss of the Sea.
妹妹佢哋一家，乜都有玩，睇相都知幾好玩。

但係包車去到，一哥都因為要畀入場費，寧願留喺架車，睇手機、瞓覺，落車食煙。

睇煙花表演時，一哥開場不久，就瞓著咗。得牙牙學語的妤妤，同我互動吓。

搭飛機又係令我唔開心。
出發前一晚，我已經問: "訂唔訂飛機餐?"
一哥話唔駛。

班機delay 咗2小時，原本12:00機，14:30先on board. 
妹妹一家訂咗飛機餐，阿仔阿女都嘈話要食。
一哥叫我即係order. 知道早order先有45% off, 又話唔好訂。
睇到表哥表姐有嘢食，自己冇，小朋友喊。
妹妹最後抱咗妤妤，一齊食；妹夫抱濼言，食佢個餐。

一哥面黑黑，話我冇訂餐。
傻貓滿頭黑線。係佢自己話唔駛訂，而家又係我錯?

呢次旅行，我駛咗2萬幾蚊。但玩得唔盡興。

上次去福岡，佢話冇工人，佢日日要湊仔，仲慘過喺香港返工。

今次去富國島，佢又話唔好玩。

傻貓只答"哦"

我覺得，佢呢個人，先係令成個trip唔好玩的主因。

-------------------------------------------------------------------------------------------------------

回港不久，一哥工作時，由椅子上墮下，跌傷腳，走路一拐一拐。醫生話畀假紙，佢拒絕。話公司唔夠人手，佢唔可以攞假。

佢痛咗幾日，隻腳愈來愈腫。去咗睇跌打，行路龜速。由睡房行去旁邊的浴室，行5分鐘。

但他無論返7放1，還是返7放5, 返7放9，最後都係返7放10。放工後，他會代其他員工，繼續工作。他說出現金糧 ($100/hr)，好過出月薪。每日都有錢收，好好。

跌傷，明明係工傷，唔攞病假，仲要幫人做替工。

傻貓完全不能理解。

我也無法理解，我補習一小時收$1000, 代課日薪都$1854, 主動收入多佢好多。
點解佢唔肯花多少少時間，睇住小朋友，堅持要返工，仲要我cut堂，照顧小朋友?

-------------------------------------------------------------------------------------------------------------------

昨晚發燒 39.8度。奶量這2星期，由180 ml, 跌到20 ml. 
冇食早餐、麵包、粉麵，行168, 唔止輕咗，肚腩細咗，仲成日手軟腳軟、頭暈。
這星期，阿女每晚都醒幾次，自己扯起我件衫，啜奶。食一陣，又話冇奶奶，喊喊喊。喊攰了，才睡一會兒。然後，又攞奶食。

浠妤：冇......奶奶奶奶奶

大家都覺得好work, 覺得健康咗。但哺乳中的媽媽，原來需要的熱量不少。
如果唔係谷友提醒，傻貓可能仲堅持呢套飲食方式。可見獨立思考能力，有待改善。