深夜近12點。傻貓喊住去搵業主幫手，但業主不在家。回頭見老公放工，返到嚟路口。
佢：“咩事？邊個蝦你~”
貓：“村長個仔，唔畀我哋架車走~佢話係私家路~”
佢：“唔駛驚，我處理”
老公喺度，貓安靜在旁睇戲。
佢：“而家咩事先？！你整喊我老婆！”
村長仔向後退咗一步：“佢朋友駛咗入嚟，我私家路嚟~我有條柱喺度~”
老公：“咁你移走佢啦~你條柱上次爭啲整傷我個仔。以後我仔受傷，我知道問邊個拎湯藥費喇”
村長仔：“我就住呢度，我唔趕時間”
老公：“你唔係自己一個住𠺢嘛，你屋企人喺度住呀可？我都喺度住，我都唔趕時間。低咪要報警？你屋企人都唔駛瞓，大家一齊拆掂佢”
村長仔：“唔係咁意思~我同你業主講聲，叫佢提你哋，唔好駛入嚟......”
老公（超大聲）：“你提我業主提我？？？你而家睇我唔到？ 你要提咩？講！！”
村長仔（望向我朋友個老公）：“唉，你走啦”
後記：好彩老公返嚟，唔係唔知搞幾耐，先畀同事老公揸車走。做咗鄰居3年，第一次唔小心駛入私家路，咁就畀人玩咗成個鐘。住村，真係幾麻煩。
仲有，原來 say sorry,講道理，甚至畀錢，都解決唔到問題，但大聲+粗口，係work嘅😂
曾經常探望大埔村屋的親戚，經常訴說返工不方便，衹有疏落的專線小巴，早晚的温差很大，晚上夜歸時，衹靠微弱的路旁燈柱照明，真係令人有点心寒，蚊蟲多更加指定動作，碰到雨季就更惨，分分鐘D雨水去唔切倒灌，就更加大劑，親戚住的村屋很密集，私隱非常透明，假六日假期燒烤的烟火，像去了另一個人間仙境，最危險還是發生火警，肯定迷失八陣圖，大人及小朋友都非常危險，幸好附近有座文武廟坐鎮保佑。😂
ReplyDelete近文武廟，只有錦石、錦山，算方便喇
Delete大埔俊亨豪苑。😅
ReplyDelete泰亨，要駁小巴
Delete