代課札記：同酬不同工

最後一天在band 1學校代課，接到另一間學校的科主任電話，冇空窗期。

今次workload輕好多，每日得1-3堂，完全冇marking. Duties包括 set 3級junior form嘅 oral exam paper, 上堂同學生傾偈、朗讀，訓練英詩集誦，帶隊比賽。

而且，唔駛做班主任，冇任何行政工作，冇課外活動，唔駛當值，唔駛入hall 集會。

然後，有同事話好多作文改，想我幫手改；有人話教唔切書,叫我幫手教；有人搵我幫手出卷。

科主任找我時，瞥見我手上的作文，大吃一驚。

“Miss Lee, 我知道妳好helpful. 不過你今次嘅身份，有啲唔同。你代NET, 唔駛改嘢㗎。當休息吓，淨化心靈啦~ ”

科主任問：“邊個叫你改作文？講我知丫”

傻貓怕麻煩到同事：“I'm here to help, not to cause trouble 🙏" "I'll give her back later."

科主任：“咁好啦~如果再有人畀嘢你做，你話我聽，我會處理”

代課日薪，日日一樣。不過工作量真係天淵之別。

上一間，小息要train學生dramatic dialogue, prose reafing. Lunch要開會，每日5堂，要當值、做社監。不用做班主任，已經萬幸。

2個月，每班作文包括： Writing 1,2,3, Extended writing 1, 2. F.4 仲有listening test, listening practice, 初中出 grammar quiz, reading and vocabulary test.

今次真係攞正牌抖吓喇。

最開心係呢間有好舒服嘅地方，畀我泵奶。上一間，我喺匿喺好厚灰塵，好大陣噏味嘅雜物泵奶，每次入去都想嘔。

呢間就係而家泵奶嘅地方。

原居民嘅私家路（Part 2)

深夜近12點。傻貓喊住去搵業主幫手，但業主不在家。回頭見老公放工，返到嚟路口。

佢：“咩事？邊個蝦你~”

貓：“村長個仔，唔畀我哋架車走~佢話係私家路~”

佢：“唔駛驚，我處理”

老公喺度，貓安靜在旁睇戲。

佢：“而家咩事先？！你整喊我老婆！”

村長仔向後退咗一步：“佢朋友駛咗入嚟，我私家路嚟~我有條柱喺度~”

老公：“咁你移走佢啦~你條柱上次爭啲整傷我個仔。以後我仔受傷，我知道問邊個拎湯藥費喇”

村長仔：“我就住呢度，我唔趕時間”

老公：“你唔係自己一個住𠺢嘛，你屋企人喺度住呀可？我都喺度住，我都唔趕時間。低咪要報警？你屋企人都唔駛瞓，大家一齊拆掂佢”

村長仔：“唔係咁意思~我同你業主講聲，叫佢提你哋，唔好駛入嚟......”

老公（超大聲）：“你提我業主提我？？？你而家睇我唔到？ 你要提咩？講！！”

村長仔（望向我朋友個老公）：“唉，你走啦”

後記：好彩老公返嚟，唔係唔知搞幾耐，先畀同事老公揸車走。做咗鄰居3年，第一次唔小心駛入私家路，咁就畀人玩咗成個鐘。住村，真係幾麻煩。

仲有，原來 say sorry,講道理，甚至畀錢，都解決唔到問題，但大聲+粗口，係work嘅😂

收租貓：舊樓驗窗令 Part 3

本身冇諗住寫blog,因為物業2,1,3，輪流驗窗，今次已經第3次喇，駕輕就熟。

不過朋友牙痛咁聲，話整窗用咗 $15000,仲以為係正常價，嚇我一跳。其實驗窗真係海鮮價，希望寫出嚟，畀大家參考吓。

物業 3 收到驗窗令。

聯絡咗3間報價。1間冇上門睇。一聽到樓宇名，開天殺價，$12800. 講到好嚴重，間屋好舊，好多隻窗，啲窗隨時跌落街。

傻貓乾脆已讀不回。

第2間，話服務同區居民，仲上埋樓，逐隻窗驗，逐個窗鉸影相。開價$3880.

再搵返之前幫物業2驗窗嘅曾師傅，佢開頭話影相畀佢就可以，幾百蚊搞掂。但啲窗又真係舊，結果佢報$3500.

物業2佢處理得快靚正，傻貓即時決定搵佢幫手。

到維修那天，他好準時，而且細心咁影低工程進度，whatsapp 我，佢哋維修前後嘅照片。

收到驗窗合格通知書。

原居民嘅私家路

 🤨：“你入得嚟，就唔好諗住出去”

深夜10點半，聽到呢句，傻貓呆咗。

舊同事搬屋，送咗一堆書嚟。佢老公揸車送到嚟門口。傻貓都好意外，竟然車到門口，唔駛推返嚟。不過落雨濕濕，仲好啦。點知😢👉👈

🤨：“條路係我嘅，你有冇問過我？不過問都冇用，因為我係唔會畀”

即係點？佢想點？

同事老公已經即時講晒對唔住，好謙卑🙏：“真係好對唔住，夜晚晚，我冇睇到你張紙。請問我點先可以走？”

🤨：“我諗吓先啦~我屋企就喺度，大把時間~”

😔：“畀幾多錢，你先可以畀我返屋企？我仲有小朋友要湊”

🤨：“我唔係要錢~呢條係我嘅私家路~最近起屋，我特登再三提醒contractors,每次做完嘢，一定要插返條柱喺度”

望到身邊成個足球場咁大嘅工地，面前不可一世嘅村長個仔，好心急想返屋企嘅舊同事，屋企仲有個1歲、3歲剛睡著嘅BB,紮醒咗唔知會唔會搵媽媽大喊😭😭😭傻貓喊到豬頭咁😔

名幼迦南N班面試考乜嘢

有冇人知，N班面試考咩？

阿女未識行，只識叫爸爸媽媽。都唔知點interview🥲

知道金迦N班面試嘅題目，但真係超難。唉，阿女去in,都係嘥時間嘥心機，得啖笑。

一開始唱遊，外藉老師唱歌 。有老師mark分，睇小朋友表現。不過唔係重點。

入房，1對1。問BB叫咩名，邊個人帶佢嚟，指出邊個係爸爸媽媽。

之後就做task

1) 手巧板要佢擺返個蘋果樹入去擺返個巴士入去 擺返個波 入去 仲有擺返個屋仔入去

2) 入銀仔去錢罌

3) 吸印仔，吸完印仔，蓋返蓋 

4) 配對  有三種水果蘋果香蕉橙 叫佢將相應水果放返喺圖片上面 

5) 砌積木  叫佢疊高高 跟住miss咁疊四層

6) 擺啲正確顏色嘅波波放入獅子個口度，例如叫佢放紅色個波波入去口

7) 放咗牙膏牙刷、碗匙羹、鏡同梳係bb面前，問佢：如果我要食嘢我要用咩用具？照鏡梳頭要用咩？

鏡配梳定匙羹？碗配梳定匙羹？

跟住BB要將正確嘅用具，拎畀老師。

2024 投資季結：投資心態轉變，1年回報44%

港股股市回暖，美市因Donald Trump勝出，銀行股、科技股爆升。大家有斬獲嗎？

舊友聯絡，告知他研究的驚天大發現： MACD 快速置富法。
換了以前，傻貓一定雀躍地，用真金白銀做實驗。
今日，我注意到風險，已對這些技術走勢、預測未來的短炒方式無感。

這位朋友是會計師，但投資成績跟數學和會計知識，完全無關。
既然他自已都表示：身家少了很多，傻貓就更加沒興趣去參考他的置富心得。

咁傻貓自已的投資成績又如何？

我好奇打開IB app ，看看自已過往一年的投資成績表：+44.02%, 挺不錯。

股票戶口的股票市值，加現金，已由2020年開戶時的100萬，遞增至294萬。期間還cash out過一筆資金，買了物業3，收租。 這裡還未計入在銀行月供的股票市值。

舊作：

20200605 理財重讀生倉儲

換YTD, 股票戶口的資產仍然有32% 升幅。

而且現時投資，升跌亦不影響生活和心情，不錯。

過去一年，傻貓沒有做甚麼驚天動地的投資大動作，只是跌市時，分段買入優質股, 開 short put；高位時，開short call, 分段減持。不需要長期貼市。

我會參考股票的股息率，決定是否/幾時買入股票。這些股息，就成為我的現金流。

最近在不斷翻讀止凡的舊作，現在開始明白多一點點。有機會再分享。