一哥升職，再任大廚

 再三推卻，甚至轉公司，自願減人工，只求返早收早，放星期日。
結果，仍然做返大廚。

當你識嘢比大佬多，數口比大佬好，食材成本更低，管理技巧又更好，而且，樣樣都跟自己一套行，又行得比大佬好，兼且食物醃製技巧知得更多，做得更快，老細真係冇可能畀你長期做散仔。

不過，一哥每個月人工多$3000, 但返工時間，就由朝8晚6，變成朝8晚11:30。
有人射波，佢頂; 唔夠人，佢頂。

大佬走咗，二佬做嘢唔叻，做唔到一哥要求，自動求去。
人手嚴重短缺，一哥又寧缺勿濫。留下的，工作量更重。可想像留下比離開，更需要勇氣和決心。

每天醒來，一哥已返工。
放學，去埋補習社，回家23:00左右。講2本中文繪本，2本英文ORT, 玩一陣busy book,認吓字卡。然後同濼言沖涼，2B一齊埋身食奶。往往餵餵吓，我就睡著了。
一哥通常01:35左右回來。大家都累，打聲招呼，我就再睡。半夜繼續餵夜奶。一哥2點左右淥麵，然後睡覺。

這樣的非人生活，過幾天就完了。
這份合約，做到June 5.

不過一哥的考驗，還未完。