代課札記：抽離

 

經過偷拍事件，傻貓決定抽離。

有3層樓收租，雖然樓價下跌，但每月現金流其實ok.
補習社現時 1 星期開4日，都有幾萬蚊現金流。
我真係唔需要為咗代課呢份工，太上心。

妹妹講得啱。我有心教，都要對方肯學。
10分鐘改完1班的試卷，好多係白卷。默書，佔半班係0分，乜都冇寫。

大部份學生，都係新移民。佢哋認為祖國強大，唔需要識英文。每日上堂，花好多心力去維持課室秩序。明知佢哋好多有學習障礙，花好多時間備課，預備教材，務求佢哋睇圖都認到吓字。但係佢哋上堂就瞓覺，連起身講聲Good morning都唔多情願。

佢哋話普通話先係國際語言，平日溝通，基本上都係普通話。
咁好啦，你哋咁勁，冇咩事，我打鐘即走。唔阻大家喇。

呢個世界好大，唔教呢間，我可以去第二間。甚至唔教，齋補習。
投資我唔叻，不過暫時回報ok. 
我只係一個小小的代課老師，唔好妄想改變人哋。乜嘢生命改變生命，太理想。

我唔需要擔心呢度的學生。佢哋自己會爬到去屬於自己的高度。如果唔係, 佢哋自己喺世界亂試，好快就會受到教訓。老師只係facilitator, 真正的老師只有現實。
對我來說，我最重視的人，是我的家人。其他人，由他吧。

代課扎記：被偷拍公審

傻貓在等紅燈轉綠燈。

“嘩！大家睇吓，XX學校嘅老師，喺行人路踩單車呀～呢個係xxx老師。我要打1823呀～”

傻貓抬頭，赫然看見有位F.4學生，高舉手機，錄影。

“乜原來行人路可以踩單車㗎咩？老師犯法，點教學生呀～呢d咩老師嚟㗎～大家快d過嚟睇吓啦～”

“佢架單車前面，有XXX中學嘅停車牌喎～真係老師嚟㗎喎～”

綠燈亮起，傻貓踩走了。隨手將單車鎖在麥記門口。

食完，濼言一如既往，嚷著要坐上單車。我背著街坊 free 給我們的一大袋字卡，抱他上車後，推車離開。

冷不防那位學生突然從暗角撲出。他相當失望：“哎呀～影唔到啦～唔夠料喎”

他邊過馬路，邊回頭拍照。他拍的是我2位小寶貝，還有工人。

這下我真的生氣了。

“副校，唔好意思，我做埋呢個月，唔做喇。幫唔到你手，真係唔好意思”

“哦～係咩事呢？”

“你哋有學生偷拍我，仲影埋我嘅小朋友。我覺得好冇私隱。佢仲喺我食嘢嘅餐廳外，埋伏偷拍。呢個學生我冇教嘅，不過收過佢手機，小息喺課室玩電話”

傻貓補充：“佢話香港冇肖像權，唔會delete段片同相片。我覺得好唔安全。唔知佢跟住會點做。”

副校聽完，即時起身：“我即刻幫你跟進，我會搵訓導輔導組幫手。你等我消息～”

放學後，副校打電話嚟，佢話睇咗學生手機，入面嘅照片好濛，小朋友嘅樣子唔清晰，希望我再重新考慮。

他提議我代課至7月中。現時日薪，到時date back返，由2月起計返月薪，差額喺完約後，入落戶口。如果下年留低，暑假不用工作，照出糧。

傻貓仍然考慮中。