Sunday, September 5, 2021

最後一次產前檢查:安排催生

 02/09/2021

我又返咗瑪嘉烈,照超聲波。

13:30入房見醫生1。
佢一直望住部電腦,睇BB生長情況。
我只係望到醫生的長長眼睫毛。
照咗10分鐘左右,醫生1列印咗好多張黑白BB照。但乜都唔肯講。
佢話醫生2會同我講。

臨出房門,佢話: BB仍然偏細,要安排提早出世。

已經食多咗嘢,瞓多咗😭

一哥又請假陪我產檢,我見完醫生1,眼淚又一串串咁流。
我好驚😔

2星期前,濼言 1.9 kg. 
今日,佢 2.28 kg.

但我這2星期,已經重咗1 kg.
點解我食咁多嘢,佢都唔吸收?

等咗2個鐘15分鐘,終於見到醫生2。
因為冇預要等咁耐,我只好臨時取消 16:00-17:15 的補習。
這樣臨時取消課堂,家長、學生感覺一定唔好。唉。


醫生2提出幾點: 
1.BB太細,吸收得唔好,不如早d出世,等佢自己食奶,可能仲好。

2.Sept 9 產檢,Sept 14 催生。

一哥知道我唔想改補習時間,問醫生可唔可以改星期二產檢。
醫生話: 舊症一律只有星期四下午有期。
佢諗咗一陣,反建議: 既然產檢、催生日期咁接近,不如直接安排星期二入院催生。

3.催生注意事項
催生係落藥,軟化子宮頸。
有些孕婦催生幾個鐘,就可以順產。有些催生3日,唔成功,就要開刀。

4.黃疸處理方法
BB早產,佢可能肝臟未發育好,會有黃疸。
到時媽咪出院,BB可能要留院瞓箱。
到時可能要出出入入母嬰健康院、醫院檢查。

出咗診斷室,再等見護士。

護士問需唔需要丈夫陪產。我好肯定講需要。

佢話要Sept 14 催生,Sept 12要交樽仔返醫院,進行檢測。
否則,即使丈夫已經打咗2劑疫苗,都唔可以陪產。

如果BB早產,孕婦冇檢測報告,結果為陰性,都唔可以畀老公陪產。
如果催生唔成功,要開刀,老公都唔可以陪產。

聽完,我又好驚。
我唔要自己一個入去生BB。
但我又唔知濼言幾時出世。
聽講佢自己提早出生,唔會好似催生咁辛苦。順產機會都大少少,唔駛食全餐,捱完催生嘅漫長宮縮,冇晒力,就要開刀。
開完刀,傷口有大概 10 cm 長。如果傷口埋得唔好,會生肉芽。

但如果佢太早出生,或者檢測報告未出到,就冇得陪產。
我好驚好驚好驚好驚。
今朝,食食吓早餐,我又愈諗愈驚,又喊到傻咗。
一哥教我深呼吸。慢慢冷靜返。



媽媽谷嘅谷友話,去私家生,要17萬左右。最便宜嘅7萬。
2萬幾係最低消費,但埋單出院一定唔係呢個價。
不過丈夫可以12—8嚟探病。
公立醫院就冇得探。
媽咪如果開刀,就冇得咁快落床。留院那幾天,丈夫即使送物資嚟,都只可以在門口,畀護士轉交媽咪。

即係話,我可能要自己一個入產房生濼言,生完,又要自己一個照顧佢。
我好驚好驚好擔心。😭😭😭😭😭😭

後來,一哥上網搵資料: 

醫管局有限度恢復陪產服務 準爸爸需持陰性證明、非隔離人士

似乎情況唔係咁惡劣。我自己每2日,做一次檢測就可以畀一哥陪產。



好多嘢,我都控制唔到。唔知邊日生BB,唔知有冇得陪產,唔知濼言出世之後係點,健唔健康。唔知補習點樣安排。

我而家都係日日上緊堂,補習時,我唔會亂諗嘢,感覺好踏實。補習時,我可以全神貫注,同學生有講有笑,好開心。
只係個肚愈嚟愈大,坐時都頂住頂住,恥骨開始痛,個肚又成日因為濼言彈嚟彈去,會硬晒,有時仲抽筋。

未上堂,我返到補習社,仲可以備課、整筆記、打卷、改練習。
上完堂,獨處時,又情緒失控。
其實我都好驚自己。
從來冇試過情緒持續失控,係又喊,唔係又喊。
好多嘢擔心。就算理智話我知,擔心冇用,仲係會擔心。

我甚至唔知道,濼言出生後,呢種情況會唔會停止。
睇書話係荷爾蒙分泌問題,導致情緒波動。
知道係一回事,但實際上控制唔到自己情緒,呢種無力感,又係另一回事。

一哥話: 唔開心,擔心,喊咗,紓發咗,係可以嘅。
但係,要提自己,適當時候,要停。
唔可以捲咗入個漩渦,出唔返嚟。

我努力緊。自己嘅情緒,自己控制。
呢個係我嘅課題。
我都唔想濼言被我影響,一齊唔開心。



小濼言:
你雖然出世時,比其他小朋友輕咗、細咗,但一定要健健康康呀。
媽咪好驚好擔心你。😭
早兩日,有個媽咪,因為妊娠毒血症,30周就生咗。BB只有1.1 kg. 
佢話BB都健康,只係出唔到院。

你出世會係咩情況??
我剛才聽神奇之路,又忍唔住喊。
"落後未落敗 大步行下去 要逐漸後來居上 唯有再追" 你出世雖然比其他人細粒,但出世後,一樣可以食多d嘢,慢慢追返,做返大隻B,健康冇病痛,對不對? 我好驚好擔心。你點解喺我肚裡面,唔吸收?? 你出世後,乖乖哋,食返多d, 瞓多d, 要健康成長呀。

至於媽咪,我知道自己最近比較奇怪。總係喊喊喊。 不過,好似首歌咁: "落淚未落敗 大大步行下去 微笑地再一次追上 是你天賦" 我相信,自己嘅問題,只係暫時嘅。 畀d時間我,我一定可以克服嘅。

大前提係: 你一定要健健康康,順利出世。

8 comments: